Мииринэй к. «Интернациональнай» ХБКтыгар таска быһа тахсар сирэ суох (слепой скиповой ствол), урууданы дириҥ түгэхтэн көдьүүстээхтик таһаарыыны ситиһэр сонун оҥоһуулаах тутуу үлэҕэ киирдэ.
Бу тутуу кимберлит уруудатын таска таһаарыы тиһигин биллэ судургутутар уонна тэхиниичэскэй уонна материальнай да ис кыах (ресурс) ороскуотун лаппа кыччатар дииллэр.
“Слепой скиповой стволу” тутуу 2013 с. саҕаламмыт. Холбоһукка ствол, үөһэ таһаарар массыына, иккилии “рудоспуск”, бункер, кэмбиэйэр лииньийэтэ, ону таһынан скиби тиэйэр-сүөкүүр комплекстар бааллар. Билиҥҥитэ ити “ствол” сир анныгар -832 миэтэрэттэн -525 м дириҥҥэ киирэр. Ити комплекс сир дириҥ түгэҕиттэн хайа маассатын ороон, скип тутаах “стволугар” тиэрдэр. Онтон салгыы урууда сир үрдүгэр таһаарыллар.
«Бу иннинэ сир түгэҕинээҕи урууданы сир анныгар үлэлиир самасыбааллар таһаараллара. Ол туһугар бу тимир көлөлөр 4 км тиийэ уһуннаах айаны көрсөргө күһэллэллэрэ. Онтуларыгар биир өттүнээҕи айаҥҥа бүтүн 40 мүн. барара. Хайа маассатын “слепой скип стволунан” таһаарар уһуннара билигин 300 м. Онон маннык тутуу олоххо киириитэ барыстаахтык дьаһаныы буолар. Бу “стволунан” сууккаҕа 950 т тиийэ урууда таһаарыллыаҕын суоттууллар. Бу туһунан АЛРОСА кылаабынай инженерэ Андрей Черепнов кэпсээбит.
Мантан салгыы скип ствола киирэр дириҥин -950 м тиэрдэр сорук турар.
«Интернациональнай» рудник 1999 с. үлэлиир. 2018 сыл саҕаланыытынааҕы чахчыларынан, бу рудникка алмаас саппааһа ГКЗ ыстандаардынан, 51,3 мөл. караакка тэҥ. Ону тэҥэ бу сир уруудатыгар алмаас көстүүтэ үрдүк. Ортотунан, биир туонна уруудаттан 7,3 караат алмаас көстөр. Сабаҕалаан ааҕыынан, маннык тэтиминэн бардаҕына, “Интернациональнай” рудник 2033 сылга диэри алмааһынан хааччыйа сытар кэскиллээх.
