Ю. Платонов аатынан Судаарыстыбаннай эстрада тыйаатырын тус түмэлэ бэйэтин үлэтин саҕалаабыта биир сыл буолбут. Артыыстар хаартыскаларынан, эгэлгэ наҕараадаларынан, таҥастарынан-саптарынан, афишаларынан тулаламмыт бэрт сиэдэрэй киэҥ хоско киирэн кэллим. Саха Өрөспүүбүлүкэтин үтүөлээх артыыһа, Мэҥэ-Хаҥалас улууһун бочуоттаах гражданина Александр Бурнашев үөрэн-мичилийэн көрүстэ.
– Александр Валерьевич, үтүө күнүнэн! Дьэ, бу сабыс-саҥа түмэл төрүттэммит устуоруйатын кэпсии түс.
– Бу түмэлбитин саҥа дьиэбитигэр кэлэн бараммыт төрүттээбиппит биир сыла буолла. Бу иннинэ, саха профессиональнай эстрадатын тыйаатыра баарын тухары маннык түмэл суох этэ. Маныаха, матырыйаал хомуйар уустуктардаах этэ. Артыыстарбыт өрөспүүбүлүкэни биир гына кэрийэр дьон буоллахтара дии, ити оҥоһуллубут афишалара, матырыйааллара, дискалара эҥин барыта тыа сирдэринэн тарҕанан хаалбыттар. Ол иһин бу биирдиилээн эрэ матырыйааллар бааллар, ону хомуйан, мунньан бу түмэли былырыыҥҥаттан тэрийдибит.
– Дьэ, манна ханнык экспонаттары биһиги көрөбүтүй?
– Манна биһиги ырыаһыттарбыт саамай үчүгэй көстүүмнэрин, сыанаҕа кэппит былааччыйаларын, афишаларын, кинигэлэрин, дискэлэрин, сорох наҕарадааларын, киэн туттар артыыстарбыт улахан кээмэйдээх мэтириэттэрин туруордубут. Сорох ырыаһыттарбыт бэйэлэрэ биһиэхэ бэлэх оҥорбуттарын эмиэ экспонат быһыытынан туруорабыт. Холобура, опера ырыаһыта Анегина Егоровна Ильина бэйэтин матырыйаалларын биһиэхэ биэрбитэ бу сыталлар. Мин кинини олус сөбүлүүбүн, киниэхэ сүгүрүйэбин, ытыктыыбын.
–Түмэлгэ дьон төһө сылдьарый уонна хайдах сыаналыылларый?
– Эстрада, уопсайынан, норуокка олус чугас. Биһиги испэктээхтэрбитигэр, кэнсиэрдэрбитигэр кэлбит көрөөччүлэр түмэлбитин киирэн көрөн баран: “Барыта бэйэбит билэр дьоммут туралларын курдук”, - диэн истиҥник саныыллар. Кинилэр сөбүлээн истэр артыыстарын, ырыаһыттарын хаартыскалара баар буоллахтара дии, ол иһин норуот үчүгэйдик ылынна диэн этиэхпин баҕарабын.
– Саамай эксклюзивнай экспонаккыт ханныгый?
– Бу – олус былыргы, алта уонус сыллардааҕы «Росконцерт» таһаарбыт собус-соҕотох афишата. Бу, холобура, Марфа Колесова олох урукку афишата ыйанан турар. Марина Константиновна Попова бүтэһик кэнсиэрин былакаата эмиэ биир эксклюзив.
– Кинигэ бөҕөтүн көрөбүн. Ханныктарый?
– Элбэх саха мелодистарын хомуурунньуктара, саха ырыаларын антологиялара, эстрадабыт уонна култуура араас хайысхатыгар сыһыаннаах чулуу дьоммут тустарынан кинигэлэр бааллар. Бу, холобура, Раиса Захарова, Степан Сивцев-Доллу, Христофор Максимов, Галина Шахурдина, Мария Расторгуева, Афанасий Ефремов уонна даҕаны атын талааннаах дьон туһунан таһаарыылары көрөбүт.
– Тыый, оттон бу урукку пластинканы холбуур проигрыватель турар дии...
– Былаан быһыытынан, бу урукку проигрывателгэ дьон киирэрин саҕана наһаа үчүгэйдик пластинкаларбытын холбоон көрсүөхтээхпит. Билиҥҥитэ, кыайан холбообокко турабыт.
– Оттон бу сиэркилэлээх комуод тугу кэпсиирий?
– Артыыс урукку гримернайа маннык этэ диэн оҥорон уурдубут. Маннык сиэркилэ, дьоҕус комуод, оттон үрдүгэр туттар мала-сала...
– Түмэли салгыы сайыннарыыга туох былаан баарый?
– Сотору харчы көрүлүннэҕинэ бу түмэл силигин ситэн дьиҥнээхтии оҥоһуллуохтаах. Мин, дьиҥинэн, бэйэм музейга аналлаах үөрэҕим суох даҕаны буоллар бу түмэли тус баҕа санаабынан арыйдым. Үөрэхтээх испэсэлиистэр, дьиҥинэн, үчүгэйдик оҥоруохтара эбитэ буолуо. Кэнэҕэски өттүгэр дьиҥнээх түмэл үлэһиттэрин, ити Ойуунускай аатынан литературнай, Ярославскай аатынан национальнай түмэллэртэн эҥин испэсэлиистэри ыҥыртаран сүбэлэттэриэхпин баҕарабын. Инникитин түмэлбитин аныгылыы моһуоннаах гына көрөбүн. Салайааччыларбытынаан силигин ситэрэр туһунан толкуйдуубут.
–Александр Валерьевич, кылгас сырдатыыҥ иһин барҕа махтал!
