Бэс ыйын 2 күнүгэр, Оҕо көмүскэлин күнүн тилэх баттаһа, Дзержинскэй уул.,22/3 дьиэтигэр саҥа оҕо спорт былаһаакката арылынна.
Былаһаакка үөрүүлээх аһыллыытыгар бочуоттаах ыалдьыттар, Губинскай уокурук уопсастыбаннаһа, аттынааҕы дьиэлэр оҕолоро кытыннылар.
Аалай лиэнтэни “Губинскай ДьУОХХ” салайар хампаанньа дириэктэрин солбуйааччы Александр Ноев уонна Ил Түмэн дьокутаата Виктор Федоров көмөлөһөөччүтэ Юлия Федорова быстылар. Мустубут дьону Губинскай уокурук дьахталларын сэбиэтин бэрэссэдээтэлэ Ольга Голдобина эҕэрдэлээтэ.
Оҕолорго бэһиэлэй оонньуулар ыытылыннылар, аниматордар саататтылар. Олбуорга ыытыллыбыт оҕо бырааһынньыгар хас биирдии кырачааҥҥа минньигэс бэлэх туттарылынна.
Губинскай уокурук Управлениета спорт былаһааканы туттарбыт Ил Түмэн дьокутаатыгар Андрей Акимовка, “Губинскай ДьУОХХ” СХ генеральнай дириэктэригэр Владислав Дмитриевка, “Бастион” ХЭУо дириэктэригэр Евгения Ивановаҕа махталларын тиэрдэллэр.
