Бүгүн, сэтинньи 25 күнүгэр Ил Түмэн дьокутаата Мария Христофорова, “Айыы кыһата” гимназия дириэктэрэ Лидия Шамаева ыҥырыытынан дойду гимнын толорууга кыттыыны ылла.
Санатар буоллахха, Ил Дархан Айсен Николаев ыйааҕынан саха оскуолаларыгар, “Мы – будущее России” диэн бырайыак чэрчитинэн күн аайы дойду гимнын толоруу быраактыката киирбитэ.
СӨ үөрэх уонна наука миниистирэ Владимир Егоров быһаарбытынан, кылаастар күн аайы бастакы уруок иннинэ дойду гимнын толоруохтарын эбэтэр истиэхтэрин сөп. Кылгатан толоруу көҥүллэнэр. Үөрэх тэрилтэлэрэ быһаарбыттарынан, нэдиэлэ саҥата гимны толору ыллыахха сөп.
“Биһиги бу күннэргэ дойду бэрэсидьиэнэ Өлүөнэ өрүһү туоруур күргэ тутуутун бигэргэппитин туһунан үөрүүлээх сонуну истибиппит. Айсен Николаев олус улахан үлэни ыытта. Хас биирдиибит бэйэбит үлэбитинэн, Саха сиригэр маннык улахан күргэ тутуллара сөптөөҕүн дакаастыахтаахпыт. Биһиги бары гимназиябыт,оскуолабыт, өрөспүүбүлүкэбит уонна дойдубут патриоттара буолуохтаахпыт”, – диэн Мария Николаевна оҕолорго баҕа санаатын эттэ.
“Айыы кыһатын” үөрэнээччилэрин линьиэйкэтигэр дойду эрэ гимнын буолбакка, өрөспүүбүлүкэ уонна гимназия гимнын толордулар.
Ону таһынан, манна саха тылын уонна национальнай култуура куруһуоктарын ыытар учууталлар ортотугар, Олоҥхо тиэмэтигэр авторскай семинар ыытылла турар.
Виктория СТАСЬ
