Киир

Киир

Арассыыйатааҕы Б.Н. Ельцин аатынан Президентскэй бибилэтиэкэҕэ тэйиччиттэн киирэр кыах Саха сирин бастакы бэрэсидьиэнэ Михаил Николаев аатынан бибилэтиэкэҕэ -  Николаев-Кииҥҥэ баар буолла. Онно анаан саҥа ааҕар саала арылынна.

Ельцин бибилэтиэкэтин электроннай көрүҥүгэр Арассыыйа судаарыстыбатын, устуоруйатын уонна нуучча тылын туһунан сүдү суолталаах докумуоннар куоппуйалара хараллан сыталлар. Бибилэтиэкэ сүрүн киинэ Санкт-Петербурга баар, итиэннэ Москуба уонна Тюмень куораттарга филиаллардаах. Маны сэргэ, дойду үрдүнэн 1500 тахса электроннай ааҕар саалалаах.

“Ельцин бибилэтиэкэтин туһанар көҥүлү Саха сиригэр аан бастакынан СӨ Национальнай бибилэтиэкэтэ уонна Ил Түмэн судаарыстыбаннай мунньаҕа ылбыттара. Оттон үсүһүнэн бу Николаев-Кииҥҥэ устуоруйа сэдэх докумуоннарын, федеральнай архыыбы кытта үлэлэһэр  кыах тосхойдо. Чаппаай бөһүөлэгэр оҕо талаанын, кыаҕын сайыннарар араас үөрэх-сайдыы кыһалара үлэлииллэр, онон ааҕар саала манна арыллыбыта сүдү суолталаах” - , диэн СӨ Национальнай бибилэтиэкэтин дириэктэрэ Саргылаана Максимова бэлиэтээтэ.

Eltsin3

Ааҕар саала үөрүүлээх аһыллыытыгар Ельцин бибилэтиэкэтин регионнары кытта үлэҕэ департаменын -  Тюменнээҕи филиал дириэктэрэ Олег Шор кыттыыны ылла. Кини: “Манна, чуолаан, Арассыыйа бастакы национальнай электроннай пуондатыгар хараллан сытар 1 мөл. тахса докумуону көрүөххэ сөп. Бу - 90 тахса куоппуйа. Үөрэхтээһин сайдыытыгар улахан суолталаах. Онон үүнэн эрэр көлүөнэ, оҕо-ыччат билиитин хаҥатарыгар биһиги өссө күүскэ үлэлэһиэхпит”, - диэн эттэ.

Саҥа ааҕар кииҥҥэ үлэлииргэ бары усулуобуйа тэрилиннэ. Ол курдук, манна 4 үлэлиир миэстэни оҥордулар. Онон хас биирдии баҕалаах киһи кэлэн Бэрэсидьиэн бибилэтиэкэтин пуондатын, ол иһигэр сэдэх кинигэ маҥнайгы таһаарыыларын сыыппаранан куоппуйаларын, архыып докумуоннарын, научнай үлэлэри, аудио уонна видео матырыйааллары кытта үлэлиэн сөп.

“Бэрэсидьиэн бибилэтиэктин пуондата биһиги ааҕааччыларбытыгар, итиэннэ манна кэлбит оҕолорго, манна үлэлиир дьоҥҥо улахан кыаҕы биэрэр. Кинилэр инникитин наукаҕа хардыы оҥороллоругар бу докумуоннар төһүү күүс буолаллара саарбахтаммат”, - диэн СӨ духуобунай сайдыыга уонна култуураҕа миниистирин бастакы солбуйааччыта Афанасий Ноев эттэ.

“Күн бүгүн Чаппаай бөһүөлэгэ - науканан умсугуйан дьарыктанар ыччат биһигэ. Манна наука Дьоҕус академията үлэлиир буолан, өрөспүүбүлүкэ бары муннугуттан үөрэнээччилэр, устудьуоннар мусталлар. Дойду сүрүн бибилэтиэкэтин пуондата үүнэн эрэр көлүөнэни патриотическай тыыҥҥа иитэргэ көмө буолуоҕа”, - диэн СӨ Национальнай бибилэтиэктэтин дириэктэрэ Саргылаана Максимова эбэн эттэ.

Eltsin2

Ааҕар киин үөрүүлээх арыллыытын кэнниттэн бибилэтиэкэ үлэһиттэрэ, муниципальнай тэриллиилэр үөрэҕириигэ салалталара кыттыылаах төгүрүк остуол ыытылынна. Бибилэтиэкэ үлэһиттэрэ Президентскэй бибилэтиэкэ пуондатын хайдах туһанары сиһилии кэпсээтилэр, инникитин өрөспүүбүлүкэ улуустарыгар арыйан үлэлэтэри дьүүллэстилэр. Төгүрүк остуолга видео сибээһинэн атын регионнар бибилэтиэкэлэрэ, Хабаровскай кыраай, Амур уобалаһа, Бурятия өрөспүүбүлүкэтэ уонна Приморскай кыраай холбоннулар.

Тэрээһин СӨ Национальнай бибилэтиэкэ уонна Б.Н. Ельцин аатынан Президентскэй бибилэтиэкэ бииргэ үлэлэһиилэрин туһунан сөбүлэҥҥэ илии баттаһыынан түмүктэннэ.

Николаев-Центр пресс-киинэ.