Быйыл кыһын бассаапка саха биэс байыаһа кыргыһыы хонуутугар охтубуттарын, биһиги биир киһибит өстөөхтөргө куттаммакка тиийэн, “ытыалаамаҥ” диэн кэпсэтэн, дьоннорун ылбыттарын туһунан аудио Саха сиригэр киэҥник тарҕаммыта. Ол хорсун уол кимэ биллибэт этэ. Онтон сотору буолан баран, ити өлөртөн куттамматах хорсун саллаат “Өлүөхүмэттэн төрүттээх бааһынай уола эбит” диэн атын аудио тарҕаммыта.
Ити ким буоларын чуолкайдыырга СӨ Донбаска тирэх пуун уолаттарыттан көрдөспүтүм. Кинилэр ити ким буоларын билэн, кэпсэтэн кэлбиттэр. Биллэр биричиинэнэн, хорсун байыас аатын толору эппэппит.
Бу Дьокуускай куорат Сабыылаах ырыынагын түөлбэтигэр олохтоох “Ярый” диэн ыҥырыллар ааттаах, 28 саастаах, 64-с биригээдэҕэ сулууспалыыр эдэр нуучча уола эбит.
Кини бойобуой доҕотторо кыргыһыы хонуутугар охтубуттара хас да хоммутун кэннэ (бары саха буолбатах эбиттэр), санаата батарбакка, “баран ылыахха” диэн дьонун кытта сүбэлэспиттэр. Хаһыытаан кэпсэтэ сатаабыттара табыллыбатах. Онуоха коптёрунан рацияны илдьэн бырахтарбыттар. Анарааҥҥылар рацияны ылбыттарыгар “утарыта кэлэн кэпсэтиэҕиҥ” диэн аптамаатын ууран баран, куттаммакка утары хааман тиийбит. 15 м тэйиччи туран “дьоммутун ылыахпыт, ытыалаамаҥ” диэн кэпсэппит. Анарааҥҥылар “барыларын манна аҕалыахпыт, эһигиттэн эмиэ ким да ытыалыа суохтаах” диэбиттэр, бэрт кыра бириэмэни биэрбиттэр.
Ити курдук, бойобуой доҕотторун сир-халлаан икки ардыгар хаалларбакка, Саха сирин хорсун уола кэпсэтэн бэйэлэригэр аҕалбыттар. Уолбут ытыллан да хаалыан сөбө. Өлөртөн куттаммат, чахчы, хорсун байыас эбит.
Бу иһитиннэриини чуолкайдаабыт тирэх пуун уолаттарыгар махталбытын тиэрдэбит.
Владимир Степанов.
