Ытыктабыллаах Саха сирин олохтоохторо!
Саха Өрөспүүбүлүкэтин салалтатын уонна тус бэйэм ааппыттан эһигини Билии күнүнэн ис сүрэхпиттэн эҕэрдэлиибин!
Балаҕан ыйын 1 күнэ – оҕолору уонна улахан дьону түмэр сырдык кэрэ бырааһынньык. Хас биирдии киһи оскуолаҕа, колледжка, училищеҕа, техникумҥа, университекка ылбыт билиитэ кэскилин түстүүр.
Өрөспүүбүлүкэбит тэриллибитэ 100 сылын туолар бэлиэ сылыгар 16 тыһыынча кырачаан билии киэҥ аартыгар аан бастаан үктэниэҕэ. Оттон 8 тыһыынчаттан тахса эдэр киһиэхэ эрэгийиэммит орто профессиональнай үөрэх тэрилтэлэригэр идэни баһылыыр үөрэхтэрэ саҕаланыаҕа.
11 кылааска тахсыбыт 7865 үөрэнээччигэ түмүктүүр эксээмэннэри туттарар эппиэтинэстээх кэмнэр үүнүөхтэрэ. Онтон атын бары үөрэнээччилэр уонна устудьуоннар саҥа үрдэллэргэ умсулҕаннаах айаннарын салгыахтара.
Күндү үөрэнээччилэр уонна устудьуоннар! Үөрэххэ тардыһыҥ, үөрэх-билии – уйгулаах олох төрдө буоларын умнумаҥ! Онуоха төрөөбүт өрөспүүбүлүкэҕит эһигини өйүөҕэ.
Кэнники сылларга 36 саҥа оскуола уонна 66 уһуйаан баар буолла. Быйыл 15 оскуола уонна 7 уһуйаан үлэҕэ киирэрэ былааннанар. Федеральнай киин өйөбүлүнэн 24 оройуоҥҥа уонна Дьокуускай куоракка уопсайа 58 оскуола хапытаалынай өрөмүөнэ уонна тэрилинэн хааччыллыыта бара турар. Улуустарга “Үүнүү туочуката” сыыппара уонна гуманитарнай үөрэх 207 киинэ аһылынна. 238 оскуола “Сыыппара үөрэҕин эйгэтэ” бырайыак чэрчитинэн аныгы тэрилинэн уонна тиэхиньикэнэн хааччылынна. Учууталлар идэлэрин утумнаахтык үрдэтэр киин тэрилиннэ. Өктөмҥө тутуллубут Наука аччыгый академиятын саҥа дьиэтигэр өрөспүүбүлүкэ араас куораттарыттан уонна сэлиэнньэлэриттэн сүүмэрдэммит үөрэнээччилэр бэйэлэрин дьоҕурдарын сайыннараллар. Бу барыта үүнэр көлүөнэ чиҥ билиини ыларын туһугар оҥоһуллар.
Аҕа дойдуга таптал, улуу Ийэ дойдубут дьиҥ сыаннастара оҕолорбут дэгиттэр сайдыылаах дьон буолан тахсалларыгар олук буолуохтара. Учууталларбыт идэҕэ үрдүк таһымнара Өрөспүүбүлүкэбит, дойдубут туһугар туох баар сыраларын барытын ууран туран үлэлиир, айар-тутар кыахтаах дьиҥнээх гражданнары иитэн таһаарарга тирэх буолуо диэн бигэ эрэллээхпин.
Быйыл алтынньы саҥатыгар буолар өрөспүүбүлүкэ учууталларын уонна педагогическай уопсастыбаннаһын XIV сийиэһигэр эрэгийиэҥҥэ үөрэҕи сайыннарыыга стратегическай быһаарыылары ылыахпыт. Бары күүспүтүн түмтэхпитинэ, 2024 сылга үөрэх хаачыстыбатынан дойду 15 бастыҥ эрэгийиэнин ахсааныгар киириэхпит диэн эрэнэбин.
Күндү доҕоттор! Сүргэҕит көтөҕүлүннүн, саҕалаабыккыт табылыннын! Үөрэххитигэр, үлэҕитигэр ситиһиилэри, чаҕылхай түгэннэри, кэрэхсэбиллээх түбэлтэлэри, чэгиэн-чэбдик туругу уонна энчирээбэт эрчими баҕарабын!
Саха Өрөспүүбүлүкэтин Ил Дархана Айсен Николаев.
