Өймөкөөн Томторугар 220 миэстэлээх саҥа оскуола тутуута өссө икки сыллааҕыта саҕаламмыта. Бу күннэргэ СӨ тутууга миниистирэ Вера Кузакова бырабыыталыстыба отчуотун чэрчитинэн Томторго сырытта. Олохтоохтор биир бастакынан оскуола хаһан үлэҕэ киирэрин ыйыттылар.
Миниистир: “Саҥа оскуола тутуута хара маҥнайгыттан сейсмическэй бөҕөргөтүү тус сыаллаах федеральнай бырагыраама үбүлээһининэн саҕаламмыта. Ол эрээри, Арассыыйа тутууга министиэристибэтэ үбүлээһини 2015 сыл ахсынньы 28 күнүгэр биирдэ ыыппыта. Ити – бүддьүөт харчытын толору туһаныы болдьоҕо түмүктэниэ үс күн инниттэн! Инньэ гынан, төннөрөргө күһэллибиппит. Ол иһин оскуоланы өрөспүүбүлүкэ бэйэтин харчытыгар тутар буолбута. Эбийиэккэ кыра харчы көрүллэн, тутааччылар былааннаммыт болдьоххо кыайан бүтэрбэтилэр. Быйыл оскуоланы тутуу салҕаныаҕа уонна ахсынньыга киллэриэхпит”,- диэтэ.
