Быйыл биһиэхэ, Өймөкөөҥҥө өтөр-наар буолбатах Өрөгөй Ыһыаҕа – Улуу Олоҥхо, саха норуотун туллаҥнаабат сүдү айымньытын – фольклорун, норуот айымньытын бырааһынньыга ыытыллаары турар. Бу, улахан чиэс – эппиэтинэс. Маннык түгэн кэлэр да кэмнэргэ бэрт кэмчи буолуоҕа. Ону таба өйдөөн, манна олохтоохтор, билиҥҥи баһылыктары, салайааччылары, тэрийээччилэри тула көхтөөхтүк, күүскэ түмсэн, саха суос-соҕотох бырааһынньыгын, Аар Айыылартан алгыс, тирэх-өйөбүл ылар кэммитин киһилии, хотугулардыы, хоодуот майгыбытын көрдөрүөх, көмүскүөх тустаахпыт.
Билигин ыгым, быһымах кэм. Урут, Аҕа Дойду Улуу сэриитин кэмигэр, ыһыахтар тохтуу сылдьыбыт майгыларын истэн, ааҕан билэбит.
Ыһыах, дьон-норуот сүргэтин, үтүө санаатын өрө көтөҕөр. Норуоту өссө сомоҕолуур, түмэр аналлаах. Бу кэмнэргэ, ыһыахха бэлэмнэнии былаан, график быһыытынан этэҥҥэ баран иһэр. Улахан ыһыах буоларынан, үлэтэ, тэрээһинэ син ол курдук уустук, ыарахан буолара өйдөнөр. Биһиги ыһыахпыт хотугу сахаларга, эбээннэргэ, эбэҥкилэргэ, кинилэр фольклордарыгар ананар. Сүрүн сыала-соруга, итиннэ түмүллэр.
Онон, Өймөкөөн кэрэ сирдэрэ, манна толору эппиэттииллэр. Ыалдьыттарга, Аар Айылҕа бэйэтэ аһыллан, үтүө сылаас илгэтин ыһан, араҥаччылыа диэн эрэнэбит.
Кэлэр 2024 сылга сайын, саха улуу бөлүһүөгэ Өксөкүлээх Өлөксөй Өймөкөөҥҥө Үрэх Төрдүгэр Тупсуу ыһыаҕын ыспыта төгүрүк 100 сыла буолар. Бу эмиэ сүдү даата, түгэн диэххэ. Өймөкөөннөр, хоту тыйыс майгыга бэрт кыраларыттан хатарыллыбыттара. Айылҕа араас күчүмэҕэйдэрин, эрдээхтик көрсүбүттэрэ уонна этэҥҥэ туораабыттара. Сүүрбэ, отут тыһыынча ахсааннаах сахалар уутуйан олорор улахан улуустара ол ыһыахтары дьиҥ сахалыы, ис-тас куттаан ыыппыттара биһиэхэ холобур буолуохтаах. Биһиги ураты аспыт, таҥаспыт-саппыт бастыҥ майгытын, ырыабыт, тойукпут, үлэбит-хамнаспыт, уопсай олохпут туруга тыктарыллан көстүөхтээх.
Хотулар уһун үйэлээх,чөл туруктаах, уһун тыыннаах, эйэҕэс-сайаҕас бастыҥ майгылаах Улуу Өбүгэлэр утум удьуордара буолабыт. Ону көрдөрөр, бигэргэтэр бэлиэ түгэн, кэм-кэрдии суолугар үктэнэн олорон эрдэхпит.
Киэҥ көҕүстээх, уһуну-киэҥи анаарар сабардам, дириҥ өйдөөх норуот оҕолоро бу Улуу Ыһыаҕы, уһун кэмнэргэ өйдүү-саныы сылдьар гына, ыһыахпыт, ыытыахпыт, көмөлөһүөхпүт диэн эрэннэриэҕиҥ!
Хаартыска: "Хотугу Сардаҥа" хаһыат
