Нам улууһун үөрэнээччилэрэ “СОБО Chips” диэн соботтон чипсы оҥорбуттар. Бу туһунан тыа хаһаайыстыбатын министиэристибэтин пресс-сулууспата иһитиннэрэр.
Былырыын “Sobo хруст” диэн батон быһыылаах чипсыларын “Саҕалааччы фермер” оонньууга сүрэхтээбиттэрэ. Бырайыак II Хомустаах орто оскуолатын бизнес-инкубаторыгар оҥоһуллубут.
Диетическэй чипсы састааба: буспут, бытарыллыбыт собо, туус уонна чеснок (эбэтэр күөх луук). Технологията олус судургу: бастаан сибиэһэй балыгы буһаран баран сиидэлииллэр. Онтон хойуутун духуопкаҕа хатараллар. Хаппытын кэннэ блендергэ бытарыталлар. Аҕыйах бириэмэ микроволновай оһоххо туруоран уутун таһаараллар.
Оҥорооччулар этэллэринэн, чипсы олус элбэх битэмииннээх: фосфор, хром, арыылаах кислоталар, цинк уо.д.а. Тута сылдьан аһыыр дьоҥҥо олус табыгастаах ас.
