Киир

Киир

Арассыыйа бырабыытылыстыбата 36 миллиардтан тахса солкуобайы 8-17 диэри саастаах оҕолоох соҕотох төрөппүттэргэ көрдө. Төлөбүрдэри от ыйын 1 күнүттэн оҥотторуохха сөп. Ол туһунан бэс ыйын 24 күнүгэр Арассыйа премьер-миниистирэ Михаил Мишустин иһитиннэрдэ.

«От ыйыттан 8-17 диэри саастаах оҕолоох, толорута суох, кыра төлөбүрдээх ыалларга босуобуйалары биэрэн барыахпыт. Бу манна 36 миллиард солкуобайы туһаайыахпыт», - диэн эттэ Мишустин.

Кини чопчулаабытынан, бу босуобуйа кээмэйэ Арассыйа Федерациятыгар олоруу алын кээмэйигэр тэҥнэһэр. Ортотунан ыйга 5,5 тыһ. солкуобайга тэҥнэһиэҕэ. Сыл бүтүөр диэри төлөбүрү мөлүйүөнтэн тахса оҕо соҕотох төрөппүттэрэ ылыахтара.

Премьер-миниистир, саҥа босуобуйаны от ыйын 1 күнүттэн судаарыстыбыннай портаал нөҥүө оҥотторо туруохха сөбүн туһунан эттэ, онно анаан анал суруйар форма баар буоларын болҕойон туран бэлиэтээтэ.

Бу иннинэ, ыам ыйын 18 күнүгэр Судаарыстыбыннай Дуума оҕолоох дьиэ кэргэттэри уонна төрөөрү сылдьар дьахталларга анаан сокуоҥҥо көннөрүүлэри ылыммыта. Бу көннөрүүлэр Арассыыйа бэрэсидьиэнэ Владимир Путин Федеральнай мунньахха ыыппыт көҕүлээһиннэрин олоххо киллэрии үлэтэ буолар. Манна бэлиэтэммитинэн, биир көннөрүүгэ, эрэгийиэҥҥэ оҕо олорор алын кээмэйин аҥаарынан көрөн толорута суох, кыра төлөбүрдээх дьиэ кэргэттэргэ эбии төлөбүр анааһына киирбитэ ( ортотунан бу көрдөрүү 5660 солк. буолар). Ол курдук, 2021 сыл бэс ыйыттан маннык төлөбүрдэр сууммалара ортотунан ыйга 6350 солк. Буолуоҕа.

Өссө биир көннөрүүгэ киирбитэ, 12 нэдиэлэҕэ диэри хат буолбутунан мэдьиссиинэ тэрилтэлэригэр учуокка турбут уонна ыарахан матырыйаалынай балаһыанньаҕа сылдьар хат дьахталларга – ый ахсын босуобуйа төлөөһүнэ. 2021 сыл от ыйын 1 күнүттэн маннык төлөбүрдэр кээмэйдэрэ 6350 солк. Буолуоҕа. Бырабыытылыстыба бу сыалга 10 миллиард солк. көрүөҕэ.

Маны таһынан, Путин Федеральнай Мунньахха ыытыытын чэрчитинэн, балаҕан ыйын 1 күнүн иннинэ хас биирдии оскуола үөрэнээччитигэр 10 тыһ.солк төлүүргэ этии киллэрбитэ. Бу сокуон бырайыага Судаарыстыбыннай Дуумаҕа муус устар 23 күнүгэр киирбитэ.

Докумуоҥҥа көрүллэринэн, төрөппүттэргэ уонна эппэкииннэргэ хас биирдии оҕолоругар, хас сыл ахсын, үөрэх дьыла саҕаланыан иннинэ 10 тыһ.төлөбүрдээх харчы ылар быраап бэриллэр. Ону таһынан, сыл ахсын төлөбүр индексацияланан иһиэҕэ.

Тарҕат:

Санааҕын суруй

Бүтэһик сонуннар