Киир

Киир

Өрөспүүбүлүкэтээҕи ИДЬМ пресс-сулууспата биллэрэринэн,  от ыйын 18 күнүгэр, Халыма айан суолун 203 килэмиэтиригэр суолга саахал таҕыста.

Иниспиэктэрдэр быһаарбыттарынан, толору пассажирдары тиэммит “Toyota Hiace” микроавтобус Дьокуускайтан Хаандыгалаан испит. 32 саастаах суоппар, Чурапчыны аһаран баран, Ытык-Күөл диэки айаннаан иһэн, куттала суох арыты тутуспакка, 55 саастаах эр киһи ыытан испит “MAN” улахан таһаҕас тиэйэр массыынатыгар тиийэн сааллыбыт.

Саха сиринээҕи ГИБДД пресс-сулууспата иһитиннэрэринэн: “Саахалга ылбыт ыар эчэйиилэриттэн “Toyota Hiace” суоппара, эмчиттэр кэлэ иликтэринэ тута тыына быстыбыт. Быһылаан буолар кэмигэр, таксыы иһигэр тоҕус пассажир баара биллибит, ол иһигэр 9 уонна 11 саастаах сокуоннай саастарын ситэ илик оҕолор. Оҕолор харыстыыр курдарынан баанан олорбуттар, эчэйии ылбатахтар”.

Аҕыс пассажиры балыыһаҕа көрдөрө аҕаллылар, онтон икки дьахтар улахан эчэйиилээх суһаллык госпитализацияннылар. Биир пассажир бэйэтин кыаҕынан быһылаан буолбут сириттэн салгыы айаннаата.

ГИБДД биллэрэринэн, микроавтобус суоппарыгар пассажирдары тиэйэргэ ирдэнэр туох баар докумуоннара бааллар эбит. Бу сыл устата кини суол быраабылатын 13 төгүл кэспит. Быһылаан буолар кэмигэр харыстыыр курун иилиммэтэх.

“«MAN» улахан таһаҕас массыынатын суоппара быйыл административнай эппиэтинэскэ биэс төгүл тардыллыбыт. Эчэйбэтэх. Арыгы испэтэх”, - диэн этиллэр иһитиннэриигэ.

Саахал хайдах быһыыга-майгыга буолбута, биричиинэлэрэ чопчуланыахтара.

Тарҕат:

Санааҕын суруй