Бүгүн эрэдээксийэбитигэр Дьокуускай куорат Марха түөлбэтин олохтооҕо, биэнсийэлээх Степан Дмитриевич Рожин кэлэ сырытта. Кини кэлбит кыһалҕатынан “ЯПАК” диэн тэрилтэ оптуобустарыгар биир дьиибэ уларыйыы киирэн дьону сордообута буолар.
- Мин 109, 104, 107, 105 нүөмэрдээх морсурууттарынан элбэхтик сылдьабын. Марха диэки барааччы мэлдьи элбэх буолар. Бу күһүҥҥүттэн оптуобустарга кып-кыараҕас инники аанынан киллэрэр буоллулар. Ортоку кип-киэҥ икки ааннаах киирии баарын үрдүнэн! Эбиитин сонно тута харчыларын төлүүр буоланнар, киирии олус бытаан. Онон хайаан да үтүрүйсүүлээх, этиһиилээх, айдааннаах буолар. Ол диэн өссө кыра буоллаҕа... Сорох дьон олох даҕаны кыайан киирбэттэр! Тоҕо диэтэххэ, суоппар ыксаан баран хаалар. Биир оскуола оҕотун нэһиилэ кыбытан киллэрбитим. Урут ортоку кэтит аанынан холкутук киирэр этибит. Кондуктор хаама сылдьан төлөбүрү хомуйар этэ. Дьону тоҕо итинник сордуур буолбуттарын өйүм хоппот. Өҥөнү оҥорооччу, бастатан туран, айанньыттарга табыгастаах буоларын саныахтаах буоллаҕа. Айан сыаната кырата суох эбээт, - диэн Степан Дмитриевич улаханнык сонньуйар.
Биһиги саастаах киһи муҥатыйыытын соһуйа истибэтибит, тоҕо диэтэххэ, күһүн бу кыһалҕаны нууччалыы суруйар телеграм-ханааллар сырдата сылдьыбыттара. Арай, бу кыһалҕа аныаха диэри быһаарыллыбакка турарыттан соһуйдубут. Степан Дмитриевич этэринэн, суоппардар, кондуктордар мээрийэ дьаһалын толоробут дииллэр эбит. Ол иһин кини Дьокуускай куорат дьаһалтатыгар иккитэ бара сылдьыбыт. Тырааныспар департаменыгар киирэ сатаабытын киллэрбэтэхтэр. Үҥсүүгүн кумааҕыга суруйан биэрдэххинэ эрэ ылабыт диэбиттэр.
Дьиҥэр, Марха курдук тэйиччи сиртэн кэлбит киһи кыһалҕатын биир эмэ туһааннаах үлэһиккэ салайан, истэн быһааран кэбиһэр тоҕо сатаммата буолла? Кини туруорар боппуруоһунан бүтүн түөлбэ дьонун кыһалҕатын билиэххэ, дьону таһар тэрилтэ үлэтин хаачыстыбатын сыаналыахха сөп этэ. Онон, өҥөнү быһаччы оҥорор “ЯПАК” тэрилтэ эксплуатация отделыгар эрийэн, мээрийэ туох дьаһалыгар олоҕуран дьону оптуобуска инники аанынан киллэрэр, харчыны киирэн истэхтэринэ төлөтөр буоллугут диэн ыйыталастыбыт.
Онуоха, отдел үлэһитэ маннык хоруйдаата:
- Мээрийэ ити туһунан туох да дьаһалы таһаарбатаҕа. Ити уопсастыбаннай тырааныспары туһаныы ирдэбилигэр олоҕурар. Дьиҥэр, ону оптуобуска барытыгар тутуспаттар. Оттон дьиҥ төрүөтэ – дьон харчыларын төлөөбөккө куотан хаалаллара буолар. Онтон сылтаан, тэрилтэбит сылга мөлүйүөнүнэн харчыны сүтэрэр.
Мантан, көстөрүнэн, “ЯПАК” тэрилтэ бу миэрэни харчытын сүтэримээри, бэрээдэгэ суох дьону саҕаларыттан харбаары киллэрбит курдук буолан тахсар. Ол эрээри, онтон сылтаан, харчыларын төлүүр бэрээдэктээх дьон, кырдьаҕастар уонна оҕолор, оптуобуска киирээри 40-50 кыраадыстаах тымныыга үтүрүһэ-анньыалаһа тураллара, таһырдьа хаалан хаалаллара сыыһа буолара ала-чуо көстөр эбээт.
Биһиги санаабытыгар, уопсастыбаннай тырааныспары туһаныы ирдэбилэ баарын да иһин, дьону оптуобуһунан таһар туһааннаах тэрилтэ, бастатан туран, куорат таһыгар айан уһунун, тымныыга таһырдьа уһуннук турара сатамматын, элбэх киһи айанныырын хайаан да учуоттуохтаах. Оттон Дьокуускай куорат дьаһалтата өҥөнү оҥорооччу хайдах үлэлиирин, өҥөнү туһанааччы ону төһө астынарын, айаҥҥа туох кыһалҕаны көрсөрүн чопчу билиэхтээх уонна, кумааҕынан эрэ муҥурдаммакка, нэһилиэнньэни кытта быһаччы үлэлиэхтээх.
Кыһалҕаны сырдатта Күндэли
