Бэҕэһээ, тохсунньу 30 күнүгэр, “Арассыыйа уопсастыбаннай тэлэбиидэнньэтэ” Ленскэй оройуонун Витим бөһүөлэгэр 4 тыһыынчаттан тахса киһи, дьиэлэрэ 0 кыраадыска тиийэ сойон, тоҥон олороллорун туһунан сонуну тарҕаппыта. Онно “быһылаан бөһүөлэк киин хочуолунайыгар оттук быһыытынан туттуллар мас сыыһа, аһаҕас халлаан анныгар сытан кыайан умайбат буолбутуттан, бөһүөлэк дьаһалтата атын оттугу хааччымматаҕыттан таҕыста” диэн суруйбуттара. Онон Витимҥэ, Сатал айдааныгар тиийбэтэр да, балай эмэ улахан айдаан таҕыста.
Бүгүн СӨ ОДьКХ уонна энэргиэтикэ миниистирэ Вячеслав Емельянов Витимҥэ үчүгэй хаачыстыбалаах мас сыыһын тиэртилэр диэн иһитиннэрдэ. Кини этэринэн, температура түһүүтэ 7 элбэх кыбартыыралаах дьиэҕэ, 70 чааһынай дьиэ уонна 2 социальнай эбийиэккэ тахсыбыт. Өссө кини “Квартальная” хочуолунайы «Восточные энергетические сети» хампаанньа көрүүтүгэр-истиитигэр сылдьар диэн бэлиэтээтэ.
Бачча улахан тымныы сатыылаан турдаҕына, бөһүөлэк туохтан маннык уустук балаһыанньаҕа киирбитин билээри, Витим дьаһалтатыгар эрийэ сырыттыбыт. Баһылык Виктор Ни, уоппускаттан саҥа таҕыстым диэн, солбуйааччытын кытта кэпсэтэргэ сүбэлээтэ. Онон, баһылык солбуйааччыта Алена Васильева быһаарыытын таһаарабыт:
Алена Борисовна, бөһүөлэккэ хас хочуолунай баарый уонна тоҕо мас сыыһынан оттоҕутуй?
- Барыта түөрт хочуолунай баар. Олортон бу кыһалҕаламмыт “Квартальная” хочуолунай чопчу мас сыыһынан эрэ оттуллар. Атыттар ниэбинэн оттуллаллар. Бу хочуолунайы сэттэ сыллааҕыта, тулалыыр эйгэҕэ буортута суох буоллун диэн, мас сыыһынан оттуллар гына туппуттара. Чахчыта да оннук.
Оттуллуохтаах мас сыыһа аһаҕас халлаан анныгар сыппыт диэн суруйаллар. Оннук дуо?
- Хочуолунайы хааччыйарга олус элбэх мас сыыһын бэлэмнээн таһаарар ирдэнэр. Дьаһалтаны кытта ЛПК “Алмаз” диэн тэрилтэ оттуллар мас сыыһын бэлэмнээн биэрэргэ дуогабар түһэрсэн үлэлии сылдьар. Ааспыт сайын уонна күһүн биһиэхэ олус элбэх ардах түспүтэ. Онтон сылтаан мас сыыһа үчүгэйдик куурбакка тоҥон хаалбытын оттуу түмүгэр, бу хочуолунай үлэтэ кэһилиннэ.
Уопсайа, төһө киһи дьиэ иһинээҕи температура түһүүтүттэн уустуктары көрүстэ?
- ОТР суруйбутун курдук 4000 буолбатах. Бу нэһилиэнньэ ахсаана. Мин ааҕыыбынан, чопчу бу хочуолунайга холбонон олорор 612 киһи. Билигин дьиэлэргэ +18 +21 тиийэ сылыйда. Киэһээҥҥэ диэри дьиэ иһинээҕи температура нуормаҕа тиийиэ.
Саҥа сыл үүнүөҕүттэн ОДьКХ эйгэтигэр дьон олоҕор кутталы үөскэтэр ыксаллаах быһыы-майгы хаста да таҕыста. Гааһынан оттуллар дьиэлэр уот барыытыттан тоҥмут буоллахтарына, Витимҥэ – хаачыстыбата суох оттуктан. Дьиҥэр, чааһынай дьиэлэргэ олорор тыа дьоно бары даҕаны оттуллар мас эрдэттэн бэлэмнэниллиэхтээҕин бэркэ билэбит. Оттон Витимҥэ оттуллар мас сыыһын үчүгэйдик куурдан баран туһанар тоҕо сатамматаҕа эбитэ буолла? Хааччыйар тэрилтэ көтүмэхтик сыһыаннаспыт дуу, сакаасчыт үчүгэйдик хонтуруоллаабатах дуу?
Санатар буоллахха, “Квартальная” 2017 сыллаахха үлэҕэ киирбитигэр “мас сыыһын туһаҕа таһаарар, оттугу кэмчилиир улахан барыстаах уникальнай хочуолунай тутулунна” диэн элбэх хайҕаан суруйуу тахсыбыта. Биллэн турар, хочуолунай үчүгэйигэр саарбахтааһын суох. Арай, хаһаайын үчүгэйигэр саарбахтыах санаа кэлэр.
Бэлэмнээтэ Күндэли
