Киир

Киир

Харчылаах бириистэри оонньотуу уонна оскуолаларга экспресс-тиэстэр. Путин мунньаҕар хамсыгы утары охсуһууга туох миэрэни ылыахтарын сөбүн туһунан этиилэр киирдилэр.

Арассыыйа үрдүнэн хамсык бүгүҥҥү туруга былырыыҥҥытааҕар уустугурда, ыалдьааччы ахсаана үс төгүл элбээтэ, ол быыһыгар оҕолор ортолоругар эмиэ улаатта. Аны аҕыйах ыйынан дойдубутугар кириип икки саҥа көрүҥэ кэлиэ, ол ону утары охсуһар иммунитет Арассыыйа олохтоохторугар суох.

Маныаха вице-премьер Татьяна Голикова хамсыгы кытта утары охсуһууга саҥа былаанын туһунан кэпсээтэ. Ол курдук, кини «ковидтан босхоломмут» эрэгийиэннэргэ уонна олохтоох дьаһаныыларга граннары олохтуурга, хамсык анаалыһын түмүгүн билии болдьоҕун кылгатарга уонна быһыыны ылыыга көҕүлүүр ньымалары туттуу туһунан эттэ.

Ыарыы саҥа долгуна

Дойду Доруобуйаҕа харыстабылын тойоно Михаил Мурашко этэринэн, Арассыыйа олохтоохторун мэдиссиинэ өттүнэн кэтээн көрөөһүнүн түмүгүнэн хоруонаттан эбэтэр хоруонаҕа сутуллууга уорбаланар дьон ахсаана 15% үрдээбит (967 тыһ.диэри). Балыыһаҕа сытан эмтэнээччи ахсаана 212 тыһыынча буолбут.

Сахабыт сиригэр уустук балаһыанньа Бүлүү, Дьааҥы, Нам, Таатта, Хаҥалас уонна Чурапчы улуустарыгар бэлиэтэнэр. Алтынньы ый 4-с күнүнээҕи көрдөрүүтүнэн, өрөспүүбүлүкэҕэ 165 ыарахан туруктаах киһи баара биллэр, балартан 30 ыалдьааччыта тыҥаҕа киирэр салгыны искусственнайдык ыраастыыр тэрилгэ холбонон сытар.

Голикова бэлиэтииринэн, ыалдьааччы ахсаана былырыыҥҥыга холоотоххо үс төгүл элбэх. Кэмигэр бырааска көрдөрбөтөх бирчиинэттэн уонна бэйэни эмтиэкэлэнииттэн үөдүйбүт дьиэ кэргэнинэн сутуллуу түмүгэр оҕо аймах ыалдьара элбээбит. Саха сиригэр ол курдук оҕо ыалдьара үксээн иһэр.

Билигин даҕаны быһыыны ылбыт биир дойдулаахтарбыт ахсааннара аҕыйах. Биир доза быһыыны 47,4 мөл.киһи, икки быһыыны 42,2 мөл.киһи ылбыт, оттон 1,9 мөл.быһыыны хаттаан эбэтэр ыалдьан баран ылбыттар. Бүтүн уопсай иммунитет үөдүйэрин туһугар бастакы сүһүөххэ 35,9 мөл. биир дойдулаахтарбыт быһыыны ылаллара, оттон 7,6 мөл. киһи хаттаан быһыыланаллара ирдэнэр.  

Ол эрэн биир проблема баар – кириип уонна араас тымныйыы көрүҥнэрэ тарҕаныылара. Роспотребнадзор хотуна Анна Попова иһитиннэрэринэн, кэлиҥҥи көрдөрүүлэринэн 62 эрэгийиэҥҥэ хамсык боруогун куоһарбыт. Уопсайынан, өрөспүүбүлүкэҕэ 11 386 тымныйан ыалдьыы баара биллибит. Эбиитин сотору кэминэн аҕыйах ыйынан дойдубутугар кириип икки саҥа көрүҥэ кэлиэ, ол ону утары охсуһар иммунитет Арассыыйа олохтоохторугар суох.

Хамсыгы утары охсуһууга былаан

Голикова хамсыгы утары охсуһууга толору хааччаҕы олохтооһуҥҥа тиийбэт курдук миэрэлэри ылыы туһунан этии киллэрдэ. Ол курдук, хоруона көрдөрүүтэ улааппыт олохтоох дьаһаныыларыгар кыра уонна орто биисинэһи федеральнай өйөбүллээх хааччахтааһыны олохтуур туһунан эттэ.

Арассыыйа эрэгийиэннэрэ бэйэлэрин «хоруонаттан босхоломмут» диэн биллэриэхтэрин уонна итини ситиспиттэрин иһин граннары ылыахтарын сөп, маныаха ол сиргэ олохтоох нэһилиэнньэ этиитигэр сөп түбэһиэхтээх. Маннык «анал ааты» олохтоох дьаһаныылар эмиэ ылыахтарын сөп.

Алтынньы ый ортотуттан күн ахсын эрэгийиэннэргэ хас киһи быһыыны ылбытын ахсаана уонна ыалдьааччы ахсаанын көрдөрөр “сылаас хаарта” тахса туруоҕа.

Бырабыыталыстыба QR-куоттары туттууну олоххо киллэриини модьуйар: тэрээһиннэргэ сылдьыыга булгуччу баар буолуохтаах уонна кыаллар буоллаҕына олох араас эйгэтигэр ити куоттары тарҕатыы үлэтэ барыахтаах.

Хоруона вируһун айахтан уонна мурунтан ылан быһаарар тиэстэр түмүктэрин болдьоҕун икки төгүл кылгатыы – лабораторияҕа киирбититтэн саҕалаан 48 чаастан 24 чааска диэри кылгатыы.

Вице-премьер маны таһынан быһыыны ылбыттарга анаан анал тэрээһиинэри ыытарга сүбэлээтэ – холобура, харчыны сүүйүүгэ оонньуу ыытыы. Онуоха Путин итинник биһирэбиллэри дьон ыспыраапка көрдөрдөхтөрүнэ буолбакка быһыыны ылар түгэннэригэр олохтуурга быһаарда.

Москуба тойонун этиитэ

Москуба тойоно Сергея Собянин киин куорат дьаһабыла туох былааннааҕын туһунан кэпсээтэ.

Куоракка түргэнник быһаарыллар тиэстэри оскуолаларга киллэриэхтэрин, маны таһынан эрдэ эксперимент быһыытынан ыытылла сылдьыбытын курдук бу тиэстэри атыы-эргиэн кииннэригэр уонна судаарыстыба усулуугатын оҥорор сирдэргэ элбэтиэхтэрин сөп.

Улахан үлэ өссө биир туһаайыытынан аҕам саастаах дьоҥҥо быһыынын биэрии буолла, улуу Москубаҕа бу көрдөбүл орто көрдөрүүттэн намыһах эбит. Собянин этэринэн, киин куоракка билиҥҥи туругунан быһыыны ылбыт киһи ахсаана 5 мөл.кэриҥэ буолбут, ааспыт ый ортотугар эмиэ маннык көрдөрүү этэ.

Тарҕат:

Санааҕын суруй

Бүтэһик сонуннар