Соторутааҕыта МТРК үөрэх кыһатыгар саҥа үөрэх дьылын үөрүүлээх аһыллыытын бэлиэтээтилэр.
Бу үөрэх кыһата Саха сиригэр биллибитэ ыраатта. 18 сыл устата ГПТУ-14 диэн аатынан тигинэччи үлэлээн баран, 1995 сылтан регионнааҕы техническай колледж диэн ааттаммыта.
Икки сыл аннараа өттүгэр Светлайдааҕы индустриальнай техникум, Удачнайдааҕы уонна Айхаллааҕы орто техническай үөрэх кыһалара, быйылгыттан Чернышевскайдааҕы кадеттар куорпустара холбоспуттара.
МРТК тэриллиэҕиттэн ыла бырамыысылыннаска идэтийиилээх бэрт элбэх ыччаты бэлэмнээн таhаарда. Саха сирин арҕаа түөлбэтин тилэри хабар хайа бырамыысылыннаһын, ниэп-гаас ордук ирдэнэр идэлэригэр уhуйар кыhа буолла.
АЛРОСА хампаанньа бу үөрэх кыhатыгар балачча элбэх көмө оҥорор. Холобур, аныгы ирдэбилгэ эппиэттиир саҥа чочуйар станок турда. 2014 сыллаахха МРТК оройуон дьаhалтатыттан бүтүн автодромы бэлэх туппута. Онон устудьуоннар бэртээхэй автодромнанан, массыына ыытарга үөрэнэри таһынан, араас категорияны баhылыыр кыахтаннылар. Саха ыччата маны мүлчү тутумуон наада.
Бу үөрэх кыһатыгар ниэп оператора, хайа силиэсэрэ, электрослесарь, автомеханик, технологическай утум монтажнига курдук идэлэргэ уhуйаллар.
Саха сирин бары муннугуттан ыччат кэлэн үөрэнэр, ким да кэлбитин кэмсиммэт. Yгүс устудьуон алмаастаах хампаанньа үлэhитэ буолла. Электрослесарь, монтажник, хайа силиэсэрэ идэлээхтэри Мииринэй хайаны байытар кэмбинээт «Интер» руднига, «АЛРОСА-Гаас», «ПТВС», «Алмазтехмонтаж», «Алмазэлектромонтаж» тутар трест курдук хампаанньыйалар туох да харгыһа суох үлэҕэ ылаллар.
Устудьуоннары үлэнэн хааччыйыы дуогабара тиһигин быспакка үлэлиир. Онон хас биирдии бүтэрээччи бырамыысылыннас тэрилтэлэригэр холкутук үлэ булара чуолкай.
2018 сыл күhүнүн туругунан, МРТК үрдүнэн 700-тэн тахса устудьуон күнүскү уонна кэтэхтэн үөрэх салааларыгар үөрэнэллэр. Атын улуустартан кэлбит устудьуоннары олорор уопсайынан, куорат киинигэр турар тоҕус этээстээх дьиэлэринэн хааччыйаллар. Бу күннэргэ атын улуустартан кэлбит устудьуоннары уопсайдарга киллэрии бара турар. Уопсайга киирбиттэр иккилии буолан олороллор. Эбиитин иитээччилэр баар буоланнар, бэрээдэги кытаанахтык ирдииллэр.
Онон техническай үөрэххэ үөрэнэн, хамнастаах үлэҕэ киириэн баҕалаах ыччат манна кэлэн үөрэнэригэр бары усулуобуйа барыта баар. МРТК дьупулуомнаах киһи алмаастаах хампаанньаҕа эрэ буолбакка, «АЛРОСА-Гаас», «Таас-Юрях Нефтегазодобыча», «РНГ», «Илин Сибиир», «Транснефть» хампаанньаларга үлэлиэн сөп. Манна күнүскү эрэ буолбакка, кэтэхтэн үөрэх эмиэ баар.
Станислав Алексеев. Мииринэй куорат. Ааптар уонна МРТК СИТ салаатын архыыбын хаартыскалара.