Күннээх Замбияттан төрүттээх, ХИФУ Мэдьиссиинэ Үнүстүтүүтүн устудьуона Матьюс Чуши Саха сиригэр хайдах олорорун туһунан күннэтэ, Куйаар ситимигэр, Tik-Tok ханаалыгар кэпсиир. Кэнники видео устууларын биирдэстэригэр, кини 45 кыраадыс тымныы турдаҕына, таһырдьа тахсан муустаах уунан ыстарыммытын уонна хаарга күөлэһийбитин туһунан үөрэ-көтө сэһэргээтэ.
Санаатын түһэрбэт эдэр омук уола, ХИФУ-га 2015 сыллаахха үөрэнэ киирбитэ. Манна олорбут сылларын тухары, кини тыйыс тымныы усулубуйаҕа хайыы-үйэ үөрэммит. "Холкутук тулуйабын", – диир. Саха төрүт култууратын, үгэстэрин олус интириэһиргиир, ону барытын Интернет нөҥүө Аан дойдуга көрдөрөн билиһиннэрэр.
Итии дойду уола бэйэтэ билинэринэн: "Мин Аан дойду дьоно Саха сирэ диэн кэрэ кыраай баарын биллиннэр диэн ис дууһабыттан видеороликтары устабын. Манна дьон олус үтүө санаалаахтар уонна хотугулуу ыалдьытымсахтар. Айылҕа үчүгэйин киһи кыайан тылынан эппэт". Тымныы уунан ыстарынар уонна тоҥуу хаарга күөлэһийэр бүтэһик видеотын Матьюс Томпо улууһун Кириэс-Халдьаайытыгар доҕотторугар ыалдьыттыы сылдьан устубута.