Өлүөнэ өрүс мууһа Кэбээйи улууһун сиригэр-уотугар балысханнык устар. Бу туһунан ЫБММ Саха сиринээҕи салаата иһитиннэрдэ. Дьолго, Халыма өрүс уута 13 см түстэ. Санатар буоллахха, бэҕэһээ уутаһыма кутталлаах кирбиини 2 см аһаран турбута.
Ыам ыйын 23 күнүн күнүс 13.00 чаастааҕы туругунан, Өлүөнэ өрүс алын кирбиитэ Кэбээйи улууһун Сангаар бөһүөлэгиттэн 110 км аллара бэлиэтэнэр. Муус хойуутук устар. Эдьигээн бөһүөлэгин таһынан уу таһыма 435 см. Үөһээ кирбиитэ Кэбээйи улууһун Сангаар бөһүөлэгиттэн 20 км аллара бэлиэтэнэр, уу таһыма 926 см, кутталлаах кирбии 1150 см, муус хойуутук устар.
Бүлүү Эбэ мууһа Кэбээйи улууһунан ааһар. Муус үөһээ кирбиитэ Кэбээйи улууһун Промышленнай бөһүөлэгэр бэлиэтэнэр. Уу таһыма 1727 см.
Халыма өрүс мууһа Орто Халыма улууһунан балысханнык устар. Муус алын кирбиитэ Орто Халыма куораттан 30 км үөһэ бэлиэтэнэр, муус хойуутук устар, уу таһыма 1180 см, кутталлаах кирбии – 1200 см. Пост аннынан харыы үөскээтэ. Суһал штаб иһитиннэриитинэн, Халыма өрүс уутун таһыма 1189 см тиийэ түстэ. Үөһээ кирбиитэ Орто Халыма куоратыттан 42 км үөһэ бэлиэтэнэр, муус сэдэхтик устар.
Индигиир өрүс мууһа Абый уонна Муома улуустарынан балысханнык устар. Алын кирбиитэ Абый улууһун Кириэс Майор сэлиэнньэтиттэн 10 км үөһэ бэлиэтэнэр. Белай Гора бөһүөлэгин таһынан уу таһыма 541 см, кутталлаах кирбии 1202 см, мууһун көтөхтө. Үөһээ кирбиитэ Муома улууһун Уус Муоматыттан 30 км аллара бэлиэтэнэр. Уу таһыма 357 см, кутталлаах кирбии 600 см, муус сэдэхтик устар.
Үөһээ Дьааҥы улууһугар Дьааҥы өрүс уута сууккаҕа 5-25 см эбиллэр, ырбыыланна, мууһун көтөхтө. Дьааҥы өрүс салааларыгар Сартаҥҥа уонна Дулҕалаахха муус алдьанан эрэр. Адыаччы өрүс мууһа устар.
Ууга барбыт нэһилиэнньэлээх пуун суох.
