Бүгүн СӨ Үрдүкү суутугар бу сыл олунньу 24 күнүгэр Сунтаар улууһун Кутана сэлиэнньэтигэр икки киһини: 34 саастаах Иван Осиповы уонна 64 саастаах Валентина Федорованы кыыллыы сэймэктээн өлөрбүт Виктор Саввинов дьыалатынан суут силиэстийэтэ саҕаланна. Кини икки киһини сорунан туран өлөрбүтүн, дьон дьиэтигэр күүһүнэн киирбитин уонна умаппытын иһин Холуобунай Кодекс үс ыстатыйатынан (105 ыст. 2 ч. «а» п., 139 ыст. 1 ч., 167 ыст. 2 ч.) буруйданар.
Суукка өлбүттээхтэр чугас аймахтара ирдэһээччи уонна доҕотторо истээччи быһыытынан кытыннылар. Кинилэр дьонноро хайдах сэймэктэнэн өлбүттэрин хаттаан истэн харахтарын уутунан сууннулар. Ол курдук, буруйданааччы Виктор Саввинов Иван Осиповы төбөтүн биэстэ ломунан охсон, онтон салгыы Валентина Федорованы, дьиэтигэр тиийэн аанын тоҕо тардан киирэн, сүгэнэн алтата төбөтүн охсон өлөрбүтэ, маны таһынан, бу дьиэни уматан улахан хоромньуну таһаарбыта сиһилии ахтылынна.
Өлөрүөхсүт, ити этиллибиккэ барытыгар сөбүлэстэ эрээри, кини сирэйигэр-хараҕыгар, куолаһыгар кэмсинии баара көстүбэтэ. Саввинов 2020 сыллаахха киһини түөрт араас быһаҕынан анньан өлөрөн хаайыыга 9,5-тан икки эрэ сылын сытан тахсыбытын санатабыт. Ол иннинэ өссө тугу эрэ уоран уонна массыына күрэтэн иккитэ сууттана сылдьыбыт. Ити буруйдара анал байыаннай дьайыыга кыттыбытын кэннэ бүтүннүү сотуллан, кини бүгүҥҥү суукка «хаһан да сууттана сылдьыбатаҕым» диэн бигэтик хоруйдаата.
Дьон тыыныгар хаттаан турбутунан уонна тутта-хапта сылдьарынан көрдөххө, Саввинов хаайыыга киирэртэн куттаммат курдук. Онуоха сүтүктээхтэр рецедивист, төһө да хаайыллыбытын иһин, эмиэ биллэр суолунан босхолонон тахсыа диэн куттаналлар. Онон, биэс оҕолоох дьиэ кэргэн илии-атах оҥостор кыра уола, туох да буруйа суох Иван Осипов, өссө да элбэх көлүөнэни үөрэтиэхтээх-иитиэхтээх үтүөкэн учуутал Валентина Федорова сырдык тыыннарын быспыт сидьиҥ өлөрүөхсүт, кутталлаах рецедивист хаайыыга төннүбэтии барара буоллар диэн баҕа санаалаахтар.
Бэйэ кэр.
