Бэҕэһээ, култуура үлэһиттэрин күнүгэр, Вера Спиридоновна Солдатова-Нанова төрөөбүт күнүгэр сылдьаммын олус астынным.
Халымаҕа, Дьокуускайга бииргэ үлэлээбит, Москубаҕа биир кэмҥэ устудьуоннаабыт, чугас, истиҥ дьонноро толору мустубуттар. Иһирэх кэпсэтиигэ хоһоон да ааҕылынна, ырыа да ылланна, Вера Спиридоновнаҕа ордук махтал тыллара хойуутук этилиннилэр. Дьиҥнээх норуот кыыһа – кини!
Мин Вера Нанованы бастаан "Айанын ырыатынан" билэр этим, кэлин Москубаҕа билсэммин, кинини киһи быһыытынан чугастык ылыммытым. Ол иһин да буолуо, үйэ чиэппэрин кэриҥэ Верабын умнубатаҕым. Улахан үлэһит буолбутун истэ-билэ, киэн тутта сылдьыбытым.
Кэргэним суох буолбутугар, кинини күннэтэ санатар, аймыыр эйгэттэн тэйээри, оҕолорбун үөрэттэрээри, куоракка кэлбитим.
Кыра кыыспын бастаан алын кылааска Кирзавокка үөрэппитим, онтон 5-с кылааска 17-с оскуолаҕа көһөрөрбөр Вера Спиридоновна көмөлөспүтэ!
Вера Спиридоновна сылдьарын тухары дьоҥҥо наар үтүөнү оҥоро, ыйа-кэрдэ, сүбэлии-амалыы сылдьарын, үлэһит үтүөтэ буоларын дьоно-сэргэтэ, доҕотторо, кэллиэгэлэрэ тоһоҕолоон бэлиэтээтилэр.
Вера Солдатова дойдутун туһунан элбэх ырыалардаах эбит. Дуоһуйа иһиттибит.
Күргүөмнээх үлэ үөһүгэр үлүмнэһэ сылдьан, ситэ суруйбатаҕын Вера Солдатова билигин ситэриэ, өссө да айар үлэтинэн биллиэ-көстүө диэн эрэнэбин!
Саргылаана Спиридонова-Кэрэмэс Кийиитэ
