СӨ үтүөлээх артыыската, Судаарыстыбаннай эстрада тыйаатырын хатыламмат кэрэ, кылыһахтаах куоластаах артыыската Варя АМАНАТОВА – АЛААС КЫЫҺА бүгүн, балаҕан ыйын 7 күнүгэр, орто дойду олоҕор ыллыыр чыычаах буолар аналланан кэлбит ААННЬАЛЫН күнэ.
Бу күн Варя Дьокуускай куорат төрүүр дьиэтигэр күн сирин көрбүтэ. Төрөппүттэрэ аҕата Аркадий Афанасьевич көҥүл тустуу тириэньэрэ, ийэтэ Розалия Васильевна – култуура эйгэтин үлэһиттэрэ буолан, кинини өрөспүүбүлүкэҕэ биллэр-көстөр спортсменнар, ырыаһыттар, аҕатын табаарыстара – Роман Дмитриев, Павел Пинигин, ийэтин кэллиэгэлэрэ Владимир Татаринов, Владимир Заболоцкай уонна Аиза Решетникова итиити-истиҥник эҕэрдэлии көрсүбүттэрэ. Оннооҕор, оччотооҕу кэмҥэ сэдэх, тэнийбэтэх көстүүнэн – салют уонна фейерверк “тоҕута ытыалаан” көрсүбүттэрэ уос номоҕор сылдьар. Ол кэмтэн кырата суох... кэм ааспыт эбит. Варя кыысчаан билигин улахан дьиэ кэргэн тапталлаах ийэтэ, Далбар хотуна.
Варяны кытта “тет-а-тет” кэпсэтиибитигэр “Хамсык кэнниттэн киһи олоҕу саҥаттан анааран көрөр буолар эбит. Олох саҥа тыллан эрэр сибэккилии киэркэйэр, тупсар. Онон доруобуйа баарын тухары дьоммор-сэргэбэр туһалаах буоларбыттан, кинилэр хас биирдии күннэрин алгыстаах ырыаларбынан киэргэтэрбиттэн, санааларын манньытарбыттан астынабын, дьоллонобун. Күндү сүгүрүйээччилэрим эһиги баар буолаҥҥыт үүнэр үтүө күнү үөрэ көрсөбүн. Айар-тутар, ыллыыр баҕам өссө күүһүрэр. Быйыл ырыа аартыгын көнө суолунан айанныыр 28-с театральнай сезоммун арыйабын” – диэн санаатын үллэһиннэ.
* * *
Таҕыста сахалыы таҥастаах
Сахалыы дэгэрэҥ ырыалаах,
Номоҕон мин сахам кыысчаана
Нап-нарын ырыаһыт чыычааҕа.
Ыллаата сүрэхпин долгутан
Кылыһах куолаһын уһааран,
Сахалыы матыыппын дэгэтэн
Үс куппун уйгуурда эргитэн.
Сүрэхпэр бу сөҥмүт дьүрүскэн
Салгыҥҥа наҕыллык налыйда,
Өр кэмҥэ кэтэспит ахтылҕан
Дууһабын уйаннык уулларда.
Ырыаһыт Варя Аманатоваҕа төрөөбүт күнүгэр аныыбын! Барыта кэрэ буоллун!
Сүгүрүйээччитэ Н.Дьуур.
* * *
Бары билэрбит курдук өрөспүүбүлүкэбитигэр быйылгы сыл ИЙЭ сылынан биллэриллэн турар. Онно анаан бэҕэһээ киэһэ эрэ, Варя Аманатова "Дьоллоох дьиэ кэргэн" ырыатын сүрэхтээтэ. Ырыа тылын ааптара Ирина Колодезникова - Ымыы, матыыбын айааччы Эрхаан. Варя бу ырыатын төрөөбүт күнүн эрэ иннинэ сүрэхтээбитэ, түбэһиэхчэ буолбатах. Кини бэйэтэ элбэх оҕо ийэтэ, дьиэ кэргэн Далбар мааны хотуна.
Киһи дууһатын кылын таарыйар дьиэ кэргэҥҥэ анаммыт ырыата, Аанньалын күнүгэр күн сирин көрөн үрдүккэ көччүйдүн, ыраахха диэри дуораһыйа иһилиннин!
Саамай сөбүлээн, уйадыйа истэр тапталлаах ырыаһыппын ВАРЯны төрөөбүт күҥҥүнэн истиҥник эҕэрдэлиибин. Ырыа чыычаах буолаҥҥын, дохсун, күүстээх энергетикалаах ырыаҕынан сүрүрүйээччилэргин соһута тур! Эн ырыаларгар уйдаран, сарсыарда чаҕылхай күнү өрөгөйдүү көрсөбүт, киэһэтин эн наҕыл, уоскулаҥ ырыаларгынан сыттыкпытын сымнаҕастык ыга кууһан, бигэнэн утуйабыт. Дьиэ кэргэниҥ дьоллоох уйата оҕолоруҥ чуопчаарар саҥаларынан эйээрдин!
Саргылаана БАГЫНАНОВА.
