Ахсынньы 10 күнүгэр Саха Өрөспүүбүлүкэтин Национальнай библиотекатыгар Science cinema диэн ааттаах үөрэтэр-чинчийэр киинэ бэстибээлэ түмүктэннэ.
Тэрээһини СӨ Национальнай библиотеката Саха сиригэр аан бастакытын тэрийдэ. Киинэ бэстибээлэ «Грибановскай ааҕыылара» научнай-чинчийэр кэмпириэнсийэ чэрчитинэн ыытылынна.
Аҕыс күн устата библиотекаҕа уонна Былатыан Ойуунускай аатынан Литературнай түмэлгэ документальнай киинэлэри көрдөрдүлэр. Манна ким баҕалаах кэлэн буор-босхо киинэ көрдө, таарыйа билиитин хаҥатта.
Тэрээһини 2022 сыллаахха тахсыбыт Саха АССР 100 сылыгар аналлаах Былатыан Ойуунускай туһунан киинэ арыйда. Киинэ сценарийын ааптара - Евдокия Избекова, режиссер – Галина Раевская, туруорааччы оператор - Илья Жараев.
Ахсынньы 8 күнүгэр библиотека историческай саалатыгар 19 үйэҕэ саха уруутун туһунан документальнай киинэни көрдөрбүттэрэ.Бу киинэҕэ сахаларга урууну тэрийии түҥ былыргы үгэстэрэ көстөр. Киинэ оҥоһулларыгар этнограф Улла Йохансон, Анатолий Гоголев, Платон Слепцов, Розалия Бравина, Екатерина Романова курдук бөдөҥ чинчийээччилэр үлэлэспиттэр. Киинэ 2008 сыллаахха тахсыбыта. Киинэ бэстибээлин сабыллыытыгар Саха сирин норуоттарын муусука уонна фольклор түмэлин дириэктэрэ Мария Корнилова 15 сыл устата үлэлээн кэлбит үөрэтэр-чинчийэр киинэлэрин уонна медиа оҥоһуктарын туһунан сырдатта.
Оттон Надежда уонна Эдуард Торговкиннар 2018 сылтан саҕалаан биэс үөрэтэр-чинчийэр документальнай киинэни устан таһаарбыттар. Ярославскай аатынан Дьокуускайдааҕы түмэлгэ уонна Саха сирин түмэллэригэр олоҕуран бу киинэлэрин устубуттар. Олортон биирдэстэрэ - «Учуутал Н.В. Егоров суруктарыгар сэрии уонна эйэ». Киинэни манна көрүөххэ сөп https://new.nlrs.ru/news/9381.
Салгыы бу сигэнэн https://new.nlrs.ru/news/9397 СӨ Национальнай библиотекатын медиакиинэ устубут «Хотугу Пальмира кыыһа» диэн документальнай киинэтин көрүөххэ сөп. Киинэ биллиилээх тунгусовед Глафира Василевич туһунан сырдатар, учуонай кинигэлэрэ библиотекаҕа хараллан сыталлар.
Киинэ бэстибээлин чэрчитинэн ахсынньы 10 күнүгэр «Наука кулута» (Бескорыстный служитель науки») диэн документальнай киинэ сүрэхтэннэ.СӨ Национальнай библиотекатын Медиакиинэ оҥорон таһаарбыт киинэтэ Саха сиригэр библиотека уонна түмэл дьыалатын саҕалааччы, учуонай, библиограф Николай Николаевич Грибановскай олоҕун уонна үлэтин сырдатар.
«Бу киинэни наука уонна култуура үлэһитэ Николай Грибановскай олоҕун уонна үлэтин сырдатар сыаллаах уһуллубут. Киинэ 20-с үйэҕэ нуучча интеллигенцията Саха сирин социальнай экономическай сайдыытыгар, ону таһынан библиотекарь идэтэ наукаҕа уонна уопсастыбаҕа үрдүк суолталааҕын көрдөрөр», - диэтэ киинэ сценариһа Аина Прибылых.
Бэстибээл кыттыылаахтара төгүрүк остуол тула олорон, үөрэтэр-чинчийэр киинэни оҥоруу, киэҥ араҥаҕа таһаарыы туһунан кэпсэттилэр. Кыттааччылар уопуттарын үллэһиннилэр, наука чинчийиилэрин киинэҕэ кубулутан, тиийимтиэ оҥорор туһунан ырыттылар.«Күн оҕолоро» диэн айар устуудьуйа салайааччыта Сардаана Барабанова сахалар төрүт култуураларыгар аналлаах, тыа сирин олоҕун көрдөрөр улахан үлэлэрин туһунан сырдатта, маны таһынан улахан күрэхтэргэ кыайбыт «Сэрии оҕолоро» диэн киинэ туһунан кэпсээтэ.
Научнай-чинчийэр киинэ бэстибээлин түмүктүүр тэрээһини СӨ Национальнай библиотекатын медиа оҥоһуктарын продюсера, Медиакиин салайааччыта Галина Кутугутова уонна библиотека сүрүн режиссера Иван Кривогорницын иилээн-саҕалаан ыыттылар. Инникитин Саха сирин норуоттарын устуоруйаларын уонна култуураларын көрдөрөр научнай-чинчийэр киинэлэри барытын биир сиргэ муһар наадатын эттилэр.
СӨ Национальнай библиотекатын медиакиинэ