СӨ Национальнай бибилэтиэкэтэ кулун тутар – муус устар ыйдарга «Кинигэни бэйэ илиитинэн оҥоруу» өрөспүүбүлүкэтээҕи айар күрэх биллэрбитэ. Биһиги бу күрэхтэһиигэ аҕыс улуустан уонна Дьокуускайтан барыта 22 кыттааччы көхтөөхтүк кыттыбытын махтанан туран бэлиэтиибит.
Үлэлэр олус интэриэһинэйдэр, киһини сөхтөрөллөр. Дьон кинигэ оҥоһуутугар араас матырыйаалы туттубут. Холобура: туос, сиэл, сукуна, куруһуба, тесьма, баайар сап, мулине, оҕуруол, фетр, фоамиран, былыргы кумааҕыны оҥорорго кофены кытары туттубуттар. Аныгы технологияны туһанан, биир кинигэҕэ куар-код киллэрбиттэр, онон кинигэҕэ баар хоһооннору дьон аахпытын көрөр олус сонун.
Дьүүллүүр сүбэҕэ Иванова Линда Николаевна, П.А.Ойуунускай аатынан Дьокуускайдааҕы литературнай түмэл дириэктэрин солбуйааччыта, Андросова Надежда Петровна, Сэмэн Новгородов аатынан «Айар» Национальнай издательскай компания эрэдээктэрэ, Борисова Юлия Михайловна, тыл билимин хандьыдаата, Гуманитарнай чинчийии институтун саха тылын салаатын научнай үлэһитэ киирбиттэрэ. Бэйэ оҥоһуу кинигэтин күрэҕэр кыттааччылары саастарынан үс бөлөххө араарбыттара. Сүбэ киэҥ өрүттээх быһаарыытын кэннэ сыанабыл маннык буолла:
Бастакы бөлөххө: 1 миэстэ - Брагина Анастасия Аркадьевна, Технология уонна сервис коллеһын устудьуона, «Правила безопасности» фетрынан оҥорбут үлэтэ; 2 миэстэ – Амма улууһун Өнньүөс нэһилиэгиттэн Мартынова Алена Егоровна «Оҥоойукка» кинигэтэ (картон, замша, оҕуруонан киэргэтиилээх); 3 миэстэ - Федорова Валерия Борисовна, Технология уонна сервис коллеһын устудьуона, «Сага Тьмы и Света» кинигэтэ (кумааҕы, тушь, графит харандаас, баттах лааҕа кытары туттуллубут).
Иккис бөлөххө: 1 миэстэ – Орто Халыма улууһун Хатыҥнаах нэһилиэгиттэн Винокурова Мария Алексеевна «Саха суруйааччыларын бэргэн этиилэрэ» кинигэтэ (туос, тирии, саптан оҥорбут үлэтэ); 2 миэстэ - Мэҥэ-Хаҥалас улууһун Чүүйэ нэһилиэгиттэн Баал Хабырыыс «Туһа киһитэ» кинигэтэ (картон, мулине сап, өҥнөөх харандаас, кумааҕыны эргэрдэн биэриигэ кофены туттубут); 3 миэстэ - Амма улууһун Болугур нэһилиэгиттэн «Тыа кыыла куобах», «Дьиэ кыыллара» кинигэ (фетртан, фоамирантан оҥорбут).
Үһүс бөлөххө: 1 миэстэ - Дьокуускай куораттан Атласов Петр Николаевич «Санаам кустуга ийэбэр» кинигэтэ ( таһа велюр, куар-кодтаах); 2 миэстэ - Амма улууһун Болугур нэһилиэгиттэн С. А. Новгородов «Сахалыы букубаар» кинигэтэ (сиэл, таҥас, куорсун туттулубут); 3 миэстэ -Дьокуускайтан Никитина Ия Васильевна «Встретимся у Пушкина», «Хомус дьикти тылынан» (туойтан, контурнай быысапкалаах кырачаан кинигэлэр).
Ону таһынан, дьүүллүүр сүбэ «Тактильная книга» диэн номинация анаата. Ол Горнай улууһун Бэрдьигэстээх нэһилиэгиттэн Петрова Эмма Георгиевна, Андреева Софья Алексеевна харахтарынан мөлтөхтүк көрөр дьоҥҥо анаан оҥорбут «Таал-таал эмээхсин» кинигэлэригэр тигистэ.
Кыттааччыларга инникитин өссө ситиһиилэри, улахан махталбытын тиэрдэбит.
