Саха сиринээҕи ветеринария департамена алтынньы 28 күнүгэр Москубаҕа Кыыллар доруобуйаларын харыстабылын федеральнай киинигэр (ВНИИЗЖ) бүрүсүллүөскэ 23 ыт уонна куоска анаалыстарын ыыппыта. Анал лабораторияҕа 19 ыт уонна 4 куоска хаанын ИФА ньыматынан бэрэбиэркэлээбиттэр. Сэтинньи 16 күнүгэр анаалыс түмүгэ чопчуламмыт: 12 ыт уонна 2 куоска анаалыһа – “положительнай”, 7 ыт уонна биир куоска – “сомнительнай” уонна биир куоска анаалыһа чопчу ыалдьыбатах диэн буолбут.
Ити “положительнай” анаалыстан биэһэ уонна 4 “сомнительнай” Дьокуускайга баар дьэллик ыттар приюттарыттан (Очиченко,57) ылыллыбыттар.
Инньэ гынан, приют “эпизоотическэй очаг” буолара билиннэ (билиҥҥитэ Дьокуускайга уонна Жатайга уопсайа 10 итинник очаг баар), ол эбэтэр, мантан инньэ бу приютка РФ ТХМ 533№-дээх ыйааҕар олоҕуран, карантин олохтонор. Ветеринария департамена “Помоги выжить” пуонданы кытары приютка чопчу төһө ыт баарын ааҕарга хамыыһыйаны тэрийбит, ол кэннэ ыттартан барыларыттан босхо анаалыс ылыллыахтаах.
Оттон биирдиилээн дьон кыылларгытын бэрэбиэркэлэтиэххитин баҕардаххытына, Чехов уул.66 баар килииньикэҕэ төлөбүрдээх анаалыһы туттарыаххытын сөп, ону салгыы өрөспүүбүлүкэтээҕи лабораторияҕа ыыталлар. Санатар буоллахха, бүрүсүллүөстээбитэ чопчу биллибит ыттары уонна куоскалары быраабыла быһыытынан өлөрөргө күһэллэллэр, эмтии сатыыр бобуулаах.
Инньэ гынан, “зоозащитниктарбыт” дэнэр сорох бөлөхтөр “Дьокуускайга бүрүсүллүөһүнэн саба бүрүнэн приют ыттарын барытын өлөрөөрү соруналлар” эҥин диэн “долгуйан” эрэллэр. Маны таһынан, билигин приютка ыттар киириилэрэ-тахсыылары кыккыраччы бобуллар, онон куораттан дьэллик ыттары тутан аҕалан хаайбат буоллулар.
Хаартыска: https://www.sakhaparliament.ru
Бэйэ кэрр.
