Быйыл түөрт бастакы ый түмүгүнэн өрөспүүбүлүкэҕэ 4051 буруйу оҥоруу бэлиэтэммит (былырыын 4164 этэ). Уопсайа 19 улууска, куоракка буруйу оҥоруу намтаабыт. 1993 буруйу оҥоруу Дьокуускайга тиксэр (47,7 %). Бу туһунан СӨ Борокуратуурата иһитиннэрэр.
214 ордук ыар буруйу оҥоруу бэлиэтэммит: 25 өлөрүү, 110 доруобуйаҕа ыар эчэйиини оҥорууга сыһыаннаах буруй. 1905 баайга-дуолга сыһыаннаах буруйу оҥоруу тахсыбыт: 900 уоруу, 728 түөкүннээһин, 12 ороспуонньуктааһын, 76 халабыр, 42 массыынаны күрэтии, 11 күһэйии. Төлөпүөнүнэн, интэриниэтинэн дьону албыннааһын 13,9 % аччаабытын бэлиэтииллэр: былырыын 1016 эбит буоллаҕына, быйыл – 875.
290 экэнэмиичэскэй буруйу оҥоруу бэлиэтэммит (былырыыҥҥытааҕар 6,2 % үрдээбит) уонна 66 хоруупсуйа (20% үрдээбит).
Наркотикка сыһыаннаах буруйу оҥоруу 168-тан 198-ка диэри улааппыт. Сүрүннээн, Дьокуускайга бэлиэтэммит (121 дьыала).
Итирэн баран уруулга 234 суоппар олорбут. Суол саахалыгар 17 киһи өлбүт.
814 буруйу оҥоруу уопсастыбаннай миэстэҕэ тахсыбыт, итинтэн 589 – уулуссаҕа. Сокуоннай саастарын туола илик оҕолор 66 буруйу оҥорууга кыттыгастаахтар, сүрүннээн – уорууга (43,9%).
Буруйу оҥоруу биллэн турар сүрүннээн арыгылааһын кэнниттэн тахсар – 1127 (былырыыҥҥыттан 9,7% түспүт). Итирэн баран ордук уораллар (271), суол саахалыгар түбэһэллэр (203), дьону ортотук эчэтэллэр (80), халыыллар (34), былаас бэрэстэбиитэллэригэр саба түһэллэр (23).
Уопсайа буруйу оҥоруу 18 куоракка уонна улууска улааппыт, ол иһигэр – Удачнайга, Аммаҕа, Аллайыахаҕа, Эдьигээҥҥэ, Муомаҕа, Өлөөҥҥө уонна Уус Майдаҕа.
