Дьокуускай куорат суһал ыстааба биллэрдэ, Роспотребнадзор ирдэбилинэн Туймаада ыһыаҕын ыытыыта бобулунна. Бырааһынньыктааҕы тэрээһиннэр дистанционнай көрүҥүнэн ааһыахтара, диэн иһитиннэрэр уокуруктааҕы дьаһалта пресс-сулууспата.
Бэс ыйын 7 күнүгэр, хамсыгы утары охсуһар куораттааҕы суһал ыстаап мунньаҕа буолан ааста.
«Мунньах кытыылаахтара, Саха сирин сүрүн бырааһа Маргарита Игнатьева сүбэлиир суругун ааҕан, сүбэлэһэн баран Туймаада Ыһыаҕа – 2021 тэрээһини дистанционнай көрүҥүнэн ыытарга быһаарыннылар. Бу быһаарыныы нэһилиэнньэ доруобуйата чөл буоларын туһугар ылылынна», - диэн этиллэр иһитиннэриигэ.
Роспотребнадзорга бэлиэтээбиттэринэн, өрөспүүбүлүкэ үрдүнэн ыалдьыбыттартан 60 %-на Дьокуускай куорат олохтоохторо. Манна даҕатан эттэххэ нэһилиэнньэ хамсыктан быһыыны ылыытын тэтимэ бытаарда.
«Ыарыы тарҕанар куттала баар. Сабаҕалааһын быһыытынан куорат ыһыаҕар быһыыны бириинсиптэһэн ылбатах элбэх аҕам сааастаах дьон уонна эмиэ оннук санаанан ылбатах эдэр дьон кэлиэхтэрин сөп. Ону таһынан чугас сытар улуустарга ыһыахтар бобулланнар, үгүс киһи тоҕо анньан кэлиэхтэрэ. Барыта түмүгэр ыарыы өрө туруутугар аҕалыа», - диэн бэлиэтээтилэр мээрийэҕэ.
Бу ыйыллыбыт биричиинэлэринэн, итиэннэ Саха сирин сүрүн бырааһа Маргарита Игнатьева сүбэ суругун болҕомтоҕо ылан, куорат баһылыга Евгений Григорьев бырааһынньык тэрээһиннэрин дистанционнай көрүҥүнэн ыытарга быһаарыы ылынна.
