Алтынньы 25-26 күннэригэр Дьокуускай куоракка “Анал Олимпиада” диэн ураты тэрээһин буолан ааста. “Арассыыйа анал Олимпиадата” – инбэлиит оҕолору өйүүр бүтүн Арассыыйатааҕы уопсастыбаннай тэрилтэ буолар.
Бу хамсааһын 1990 сылтан саҕаламмыт эрээри, 1999 сылтан тэрилтэ быһыытынан анаан-минээн үлэлээбит. Ол аата быйыл бу хамсааһын тэриллибитэ – 20 сыла. Бу тэрилтэ аан дойду таһымнаах Special Olympics уопсастыбаннай хамсааһыны кытта бииргэ үлэлиир.
Дьокуускай куоракка Ил Түмэҥҥэ билимҥэ, үөрэххэ, култуураҕа, маассабай иһитиннэриини киэҥник тарҕатар сириэстибэлэргэ (СМИ) уонна уопсастыбаннай тэрилтэлэр дьыалаларыгар сис кэмитиэтин бэрэссэдээтэлэ, СӨ “Анал Олимпиада” хамсааһын бэрэссэдээтэлэ Феодосия Габышева быһаччы көҕүлээһининэн, бу тэрээһин аан бастакытын ыытылынна.
Алтынньы 25 күнүгэр “Дохсун” успуорт комплексыгар оҕолор чэпчэки атлетикаҕа уонна остуол тенниһигэр кыттан, илин-кэлин түсүһэн күрэхтэстилэр. Онтон сарсыныгар “Самородок” бассейнҥа харбааһыҥҥа уонна пауэрлифтиҥҥа күрэхтэстилэр. Барыта 50-тан тахса оҕо кытынна.
Күрэхтэһиигэ кыайбыттары наҕараадалыыр кэмҥэ Феодосия Габышева “Оҕолор, эһиги историческай суолталаах ураты күрэхтэһиигэ кытынныгыт. Ол курдук, бу тэрээһин Саха сиригэр аан бастакытын ыытылынна. Барыгытыгар инники өттүгэр ситиһиилэри баҕарабын. Бу хамсааһыны өссө күүскэ сайыннаран, саха спортсменнара бүтүн Арассыыйатааҕы, аан дойдутааҕы анал тэрээһиннэргэ кытталларын ситиһиэхтээхпит.
Бүгүҥҥү күҥҥэ биһигини элбэх үлэ күүтэр. Биһиги федерациябыт ураты хайысхалаах, ол курдук Арассыыйатааҕы олимпийскай хамсааһыҥҥа тэҥнээбиттэрэ. Сыл аайа РФ Успуортка министиэристибэтин быһаччы өйөбүлүнэн, “Анал Олимпиада” бырагырааматынан 15-тэн тахса бүтүн Арассыыйатааҕы спортивнай күрэхтэһиилэр ыытыллаллар. Ону таһынан, Арассыыйа хамаандата аан дойду таһымнаах күрэхтэһиилэргэ үрдүк тэрэһиннээхтик кыттар”, — диэн эттэ.
Санатар буоллахха, быйыл сэтинньи 29 күнүгэр “Дохсун” успуорт комплексын баазатыгар юнифайд-путбуол диэн өрөспүүбүлүкэҕэ ураты тэрээһин ыытыллыаҕа. Уратыта диэн, хамаанда састаабыгар доруобай уонна инбэлиит оҕолор киирэн оонньууллар. Тэрээһиҥҥэ “Анал Олимпиада” бырагырааматынан бииргэ үлэлииргэ сөбүлэспит оскуолалар үөрэнээччилэрэ кыттыахтара.
Александр ТАРАСОВ.
