Киир

Киир

Төрүт көрүҥмүтүгэр бастакы аан дойду чөмпүйэнээтэ 2014 сыл сэтинньитигэр Дьокуускайга ыытыллыбыта. Икки сыл буолан баран (2016 сыл балаҕан ыйыгар) аан дойду түһүлгэтин хаһаайынынан Кыргызстан Чолпон-Ата куората буолбута. 2018 сыллааҕы III аан дойду чөмпүйэнээтэ Дьокуускайга эмиэ сэтинньигэ ыытыллыбыта. Көрөргүт курдук, аан дойду чөмпүйэнээттэрэ иккилии сыл буола-буола ыытыллар үтүө үгэстэрэ олохтоммута.

– Сэтинньи бүтэһигэр бастакы тоһуттар тымныылар түһэллэр, – диэбитэ 2019 сыл биир тэрээһинигэр оччотооҕу успуорт миниистирэ Иннокентий Григорьев. – Ыалдьыттарбыт аны Саха сирин самаан сайынын көрүөхтээхтэр. Онон эһиилги аан дойду чөмпүйэнээтин бэс ыйыгар буолуоҕа. Муҥутуур кыайыылааҕы быһаарар түһүлгэ Үс Хатыҥҥа, Туймаада ыһыаҕар ыытыллыаҕа.

Ол эрээри, хомойуох иһин, хара дьайдаах хамсык өрө туран – ити улахан түһүлгэ буолбатаҕа.

Аан дойду IV чөмпүйэнээтэ быйыл сайын бэс ыйыгар Дьокуускайга ыытыллара быһаарылынна. Ити туһунан Ил Дархан ыйааҕа олунньу саҥатыгар тахсыбыта. Бүгүҥҥү күҥҥэ 14 дойду хамаандата чөмпүйэнээккэ кытта кэлэрин бигэргэппит. Ол – Азербайджан, Аргентина, Бангладеш, Бразилия, Венгрия, Греция, Индия, Кыргызстан, Монголия, Пакистан, Сербия, Словакия, Узбекистан, Киин Африка өрөспүүбүлүкэтэ (ЦАР) уонна Япония.

Аан дойду чөмпүйэнээтин ыытыллар сүрүн эбийиэгэ – “Өрөгөй” успуорт комплекса. Оттон муҥутуур кыайыылааҕы быһаарар түһүлгэ Үс Хатыҥҥа, Туймаада ыһыаҕар ыытыллара былааннанар. Үс Хатыҥҥа аан дойду ааттаахтарын чиэһигэр сэргэ туруоруллуохтаах. Бары сиэри-туому тутуһан ыытыллар тэрээһиҥҥэ спортсменнар, тириэньэрдэр кыттыахтаахтар.

Тарҕат:

Санааҕын суруй

Бүтэһик сонуннар