«Сыл бастыҥ дьиэ кэргэнэ» күрэс регионнааҕы түһүмэҕэ алта номинациянан ыытыллан түмүктэннэ диэн CӨ Үлэ уонна социальнай сайдыы министиэристибэтин пресс-сулууспата иһитиннэрдэ.
Күрэскэ өрөспүүбүлүкэ 29 муниципальнай тэриллиититтэн барыта 108 дьиэ кэргэн кыттыбыт. Саамай элбэх кыттааччы «Элбэх оҕолоох дьиэ кэргэн» номинацияҕа күрэстэспит. Кыайыылаахтарга Айсен Николаев 2022 cыл сэтинньи 12 күнүнээҕи Ыйааҕынан 300 тыһ. солк. кээмэйдээх бириэмийэлэри туттарыахтара.
«Элбэх оҕолоох дьиэ кэргэн» номинацияҕа Мэҥэ Хаҥалас улууһуттан Михаил уонна Татьяна Игнатьевтар кыайбыттар. 2-с миэстэни Өлөөн эбэҥки национальнай улууһуттан Алексей уонна Наталья Федоровтар, 3-с миэстэни Амма улууһуттан Афанасий уонна Надежда Осиповтар ылбыттар.
«Дьиэ кэргэн – төрүт үгэс араҥаччыта» номинацияҕа Амма улууһуттан Дмитрий уонна Александр Егоровтар кыайбыттар. 2-с миэстэни Мэҥэ Хаҥалас улууһуттан Анатолий уонна Светлана Стручковтар, 3-с миэстэни Алдан оройуонуттан Иван уонна Екатерина Плоцких ылбыттар.
«Тыа сирин дьиэ кэргэнэ» номинацияҕа Мэҥэ Хаҥалас улууһуттан Спиридон уонна Марина Федоровтар кыайбыттар. 2-с миэстэни Үөһээ Бүлүүттэн Николай уонна Анна Васильевтар, 3-с миэстэни Чурапчы улууһуттан Станислав уонна Яны Сивцевтар ылбыттар.
«Кыһыл көмүс дьиэ кэргэн» номинацияҕа Өлүөхүмэ улууһуттан Петр уонна Светлана Горбуновтар кыайбыттар. 2-с миэстэни Дьокуускай куораттан Иван уонна Анна Копыриннар, 3-с миэстэни Чурапчы улууһуттан Семен уонна Валентина Пинигиннар ылбыттар.
«Көс дьиэ кэргэн» номинацияҕа Эбээн-Бытантай национальнай улуустан Алексей уонна Туйаара Юмшановтар-Колесовтар кыайбыттар. 2-с миэстэни Томпо улууһуттан Григорий уонна Галина Замятиннар, 3-с миэстэни Өлөөн эбэҥки национальнай улууһуттан Петр уонна Надежда Андреевтар-Николаевтар ылбыттар.
«Иитиэх дьиэ кэргэн» номинацияҕа Өлөөн эбэҥки национальнай улууһуттан Николай уонна Татьяна Петровтар кыайбыттар. 2-с миэстэни – Уус Алдан улууһуттан Сергей уонна Саина Григорьевтар, 3-с миэстэни Дьокуускай куораттан Петр уонна Светлана Тарабукиннар ылбыттар.
Күрэс түмүгүнэн ахсынньы 15 күнүгэр Дьокуускайга Ю.А. Гагарин аатынан Култуура уонна аныгы ускуустуба киинигэр кыайыылаахтары эҕэрдэлиир үөрүүлээх тэрээһин буолуоҕа.
Сонун төрдө: CӨ үлэ уонна социальнай сайдыы министиэристибэтин пресс-сулууспата
