Туймаада ыһыаҕын кэмигэр, Үс Хатыҥҥа, бэс ыйын 24 күнүгэр күнүс 14 чаастан 17 ч. диэри, 20 №-дээх “Кымыс кырдала” түһүлгэҕэ, өрөспүүбүлүкэ кымыһы оҥорооччуларын ортотугар СӨ Ил Дарханын бирииһигэр “Кымыс – Айыы Аһа” бэртээхэй куонкурус-бэстибээл тэриллэр. Куонкуруһу “Туймаада” Агрохолдинг” АУо иилээн-саҕалаан ыытар.
Бу туһунан биһиэхэ куонкурус Дьүүллүүр сүбэтин бэрэссэдээтэлэ, Өрөспүүбүлүкэтээҕи аһылык технологиятын Киинин салайааччыта Роза Петровна Гудуева маннык кэпсээтэ:
– Кымыс куонкуруһугар кымыс бэлэмниир тэрилтэлэр, урбаанньыттар, агрооскуолалар, биирдиилээн кэтэх хаһаайыстыбалар кытталлар.
Куонкуруска кыттыан баҕалаахтар бу дьыл бэс ыйын 19 күнүгэр диэри көҥүл хабааннаах сайаапка түһэриэхтэрин наада. Элэктириэн аадырыс: Этот адрес электронной почты защищён от спам-ботов. У вас должен быть включен JavaScript для просмотра. эбэтэр почтанан “Туймаада” Агрохолдинг АУо-ҕа – Дьокуускай к. Автодорожнай уул. 23 №-дээх дьиэтин 113 кэбиниэтигэр Тыа хаһаайыстыбатын оҥорон таһаарыы уонна хонтуруол Управлениетыгар тиксэриэхтэрин сөп.
Эмиэ ити күн, бэс ыйын 19 чыыһылатыгар – сарсыарда 9 ч. – 17 ч. диэри кэмҥэ – Дьокуускай к. Сэбиэскэй Аармыйа уул. 51/1-гэр баар Өрөспүүбүлүкэтээҕи Аһылык технологиятын киинигэр кымыстарын 5 л (0.5 л эбэтэр 1 л) бытыылкаларга кутан эбэтэр өстүөкүлэ, аска барсар былаастык иһиккэ тиксэриэхтээхтэр. Ону тэҥэ анал декларацияны сэргэ кымыска бэтэринээр-арыаллыыр докумуона – тустаах аккредитацияны барбыт ханнык баҕарар бэтэринээр лабораториятын микробиологическай анаалыһын түмүгэ наада, кымыстара “Үүт уонна үүт ас куттала суоҕун туһунан” 033/2013 ТР-ТС-ка олоҕуран, маркировкалаах буолуохтаах. Оттон физико-химическэй анаалыһын биһиги Кииммит бэйэтэ оҥоруо.
Бэс ыйын 22 күнүгэр киэҥ састааптаах, үрдүк кэмпитиэнсийэлээх хамыыһыйа куонкуруска киирбит кымыстары амсайар (дегустация). Хамыыһыйаҕа аһылык үрдүк таһымнаах, уопуттаах технологтар, ол иһигэр биһиги Кииммит исписэлиистэрэ, билим дуоктардара бааллар. Ол амсайыыга кымыстарга нүөмэр сыһыарыллар, аат-суол суруллубат. Амсайааччылар ханнык оҥорон таһаарааччы бородууксуйата буоларын билбэккэ туран, 1-тэн 5-кэ диэри баал туруораллар. Лаборатория анаалыһын түмүгэ учуоттанар. Бастыҥ кымыс быһаарыллар.
Дьэ, оттон бэс ыйын 24 күнүгэр куонкурус кэмигэр кымыс бэлэмнээччилэр бородууксуйаларын билиһиннэрбиттэрин (презентация) кэннэ кыайыылаахтар ааттара бар дьон иһитиннэриитигэр тахсар.
Манна эбэн эттэххэ, куонкурустааччыларга, баҕарар буоллахтарына, куонкурус ыытыллар сиригэр бэс ыйын 24 күнүгэр аҕалан, куонкурустаһар кымыстарын уонна да атын куонкурус тиэмэтигэр барсар бородууксуйаны атыылыыр кыах бэриллэр.
– Кыайыы кынаттаммыттарга туттарыллар бириистэри билиһиннэрбэккин ээ?
– Бастакы миэстэлээххэ – 300 тыһ. солк. иккис миэстэлээххэ – 250 тыһ. солк., үһүс миэстэлээххэ – 200 тыһ. солк. харчынан бириис, дьупулуом туттарыллар. Анал ааты ылбыттар бытовой тиэхиньикэ тутуохтара. Куонкурустан ким да кураанах барбат. Кыттааччыларга барыларыгар куонкуруска кыттыбыты кэрэһилиир сэртипикээт, көҕүлүүр бириис туттарыллыа.
– Олус үчүгэй! Куонкурус үрдүк таһымнаахтык барарын, кыттааччы элбэх буолуон баҕарабын! Оттон кымысчыттарга ситиһиилэри!
Татьяна Захарова-ЛОҺУУРА.
