Аҕыйах хонуктааҕыта Кутана нэһилиэгин үтүө тэрээһинигэр сылдьан, кыттыһан тутум үрдээн турдубут. Тыа сирин үлэһит дьоно биир сомоҕо буолан тэринэн кэлбиттэрэ үчүгэйин. Хас биирдии сылдьыбыт дьоҥҥо сүрэхтэрин ортотунан киирэн ааспыта буолуо... Өссө кэнсиэри таһынанхоннохторун анныгар кэһии уктан кэлэн, көрөөччүлэрин маанылаан, үөрүү үлүскэнин үөскэттилэр.
Нэһилиэк күүһүнэн, уран тарбахтаахтар үлэлэрин хомуйа тутан аҕалан, куоракка олорор биир дойдулаахтарын уонна ыалдьыттарга хараҕы, дууһаны сымнатар сэргэх быыстапкалара улахан сэҥээриини ылла. Сарсыарда 11.00 чаастан киэһэ 20.00 чааска диэри сүрэҕи сылаанньытар, дууһаны уоскутар үтүө тэрээһиннэри тохтообокко көрдүбүт.
Бастакы тэрээһин норуот суруйааччыта Наталья Михалева-Сайа иилээн- саҕалаан, Альберт Бүлүүйүскэй саҥа кинигэтин - «Уоттаах тыл сүмэтин хаалларан...» сүрэхтээһинин бэрт сэргэхтик, биир дойдулаахтарын истиҥ дьүүллэһиитинэн, ахтыытынан ааста. Кыттыбыт, кэлбит дьон талааннаах суруйааччы айымнньытын кытта билсэн, истибэтэхтэрин истэн, астыныы долгунугар устан аастылар. Кинигэ күн сирин көрүүтүгэр киһи хараҕар көстүбэт сүдү көмөнү Кириллин Трофим Семенович олоҕун аргыһа З.Г. Кириллина, кинилэр оҕолоро төһүү күүс буолбуттарын бэлиэтиир тоҕоостоох. Биир соһуччу сонунунан бу үтүө күҥҥэ Альберт Бүлүүйүскэй, Герман Егоров, Лидия Егорова (билигин суох), бииргэ төрөөбүт убайдарын булан, дьол түһүлгэтин үөскэттилэр. Убайдара Васильев Владимир Васильевич Бүлүү улууһугар култуура эйгэтигэр биир биллэр киһи буоларын биллибит... Ити курдук аймах ситимэ салҕанан барар буолла.
Кэнсиэргэ Кутанаттан төрүттээх талааннаах ырыаһыттар, тойуксуттар, үҥкүүһүттэр, сценка артыыстара кыттан, бэрт сэнэх кэнсиэр буолла. Биһиги, куоракка олорор Кутанаттан, Күүкэйтэн төрүттээх «Ыаллыылар» бөлөх Далбар Хотуттара, талааннаах ырыа айааччы Фатина Иванова «Хаар» диэн ырыатыгар уһулбут клиппитин кытта көрөөччүлэр күүстээх ытыс тыастарын утары тутан ыллыбыт. Аттыбытыгар талааннаах дьүөгэлээхпититтэн дууһабытыгар киэн туттуу, астыныы иэйиитэ киирэн олохсуйда. Дьүөгэбитигэр махталбыт өссө улаатан, үтүөнү-кэрэни, доруобуйаны, өссө да айа-тута сылдьарыгар баҕардыбыт. Күүкэй мааны кыргыттара Мария Саввинова-Захарова, Нина Акимова тэтимнээх, мааны куоластарынан көрөөччүлэр куттарын толору туттулар. Күүстээх ытыс тыаһынан доҕуһуоллаттылар.
Ити курдук биир күннээх үтүө тэрээһин Дьокуускай куоракка кустук араас өҥүнэн оонньоон, кэлбит биир дойдулаахтарыгар умнуллубат үтүө бэлэҕи утары ууммуттарыгар махтанабыт уонна этэҥҥэ буолууну эрэ баҕарабыт. Бу тэрээһини иилээн-саҕалаан ыыппыт, тэрийбит Кутана нэһилиэгин баһылыгар Давыдов Н.В. барҕа махталбытын тиэрдэбит. Инники өттүгэр нэһилиэк өссө сайдан, кэнэҕэски көлүөнэ дьоно бу үтүө бачыымы батыһан сайдан-үүнэн истиннэр диэн баҕарабыт.
