АЛРОСА корпоративнай университета

Хаачыстыбалаах үөрэҕи уонна наадалаах дьо­ҕурдары АЛРОСА корпоративнай университетыгар ылыахха сөп. Алмаас хампаанньата Корпоративнай университеты 2022 сыл саҥатыгар каадыры бэлэмниир киин төрүтүгэр тэрийбитэ. Университет сүрүн соруга – хампаанньа үлэһиттэрин кыаҕын, таһымын сайыннарыы.

Соторутааҕыттан ыла АЛРОСА-ны кытары сибээ­һэ суох туора дьон кытта бу корпоративнай университет бырагырааматын истээччитэ буолар толору кыахтаннылар.

Университекка оробуочай идэҕэ үөрэтэл­лэрин сэргэ, оскуолаҕа идэни талыыга кө­мө­лөөх үлэни ыыталлар уонна биисинэс тосхоллоох (стратегическай) сайдыытыгар ту­һу­ламмыт бырагыраамалары оҥороллор.

Үөрэтии хабар сирдэрин иэнэ (географията) киэҥ – Мииринэй, Айхал, Удачнай, Ленскэй, Дьо­куускай, Новосибирскай, Москуба, Смоленскай уонна Архангельскай.

 Олохтоох каадыры – бырамыысыланнаска

АЛРОСА корпоративнай университета «Олохтоох каадыры – бырамыысыланнаска» бырагырааманы олоххо киллэриигэ дьоһун оруоллаах. Бу үлэ АЛРОСА уонна «Анаабыр алмаастара» АУо СӨ Судаарыстыбаннай кэмитиэтин кытта нэһилиэнньэ дьарыктаах буолуутугар сыһыаннаан, бииргэ үлэлэһэр туһунан 2018 сыллааҕы Сөбүлэҥ чэрчитинэн ыытыллар.

АЛРОСА ыччаты уонна тыа сирин олохтоохторун үөрүү­нэн үлэҕэ ылар, кинилэр үлэ­ҕэ дьоҕурдарын салгыы сайын­нарар кыаҕы биэрэр. Ыччат араас идэлэргэ, оробуочайынан, инженер-тиэхиньигинэн үлэлииллэр. Эрдэ идэ ылбатахтар АЛРОСА корпоративнай университетыгар үөрэнэллэр. Саҥа кэлбиттэргэ үлэһиккэ көмөлөөх настаабынньыктааһын бырагыраамата уонна иһинээҕи тириэньэрдэр институттара үлэлиир.

Университет хампаанньа үлэһиттэрэ араас үөрэтэр корпоративнай бырагыраамаларга кыттан, салгыы сайдан иһэллэригэр толору кыаҕы биэрэр. Баар бырагыраамалартан муҥутуур улаханнара:

«АЛРОСА кыаҕа» – инновациялаах уонна рационализатордыы үлэҕэ көҕүлүүр, хампаанньаҕа инженердэри уонна билимҥэ ыччат каадырга саппааһын оҥорорго анаммыт бырагыраама.

«АЛРОСА лиидэрдэрэ» – хампаанньа салайар састаабын корпоративнай бырагыраамата. Корпоративнай кэмпитиэнсийэни уонна салайар дьоҕуру сайыннарарга көмөлөһөр.

«Аргыс» («Спутник») – дойду араас муннугар, чиэски сытар сирдэргэ үлэлиир саҥа үлэһиттэр, ол иһигэр хотугу сир аҕыйах ахсааннаах төрүт омуктар бэрэстэбиитэллэрэ киирсэллэр. АЛРОСА бырамыысыланнай былаһааккатыгар үөрүйэҕи ыларга көмөлөһөр бырагыраама.

Идэни таларга көмөлөөх үлэ

Корпоративнай университет идэни таларга көмөлөөх кэлим бырагырааманы утумнаахтык олоххо киллэрэр. Ол соруктар ортолоругар оскуола үөрэнээччилэригэр уонна орто, үрдүк үөрэх кыһаларын устудьуоннарыгар АЛРОСА-ны эппиэтинэстээх үлэни биэрээччи быһыытынан билиһиннэрии, ыччат корпоративнай бэлиитикэтин олоххо киллэрии, хампаанньа талааннаах ыччатын холбоһуктарын тэрийии киирэр.

Билигин АЛРОСА корпоративнай кылаастара Мииринэйгэ политехническай лиссиэй төрүтүгэр 10-с уонна 11-с кылаастарга бааллар. Быйыл бырайыак хабар иэннэ онлайн-үөрэхтээһин киирбитин суотугар биллэ кэҥээбит. Сотору 10-с «АЛРОСА-кылааска» сайаапкалары түһэрии саҕаланыаҕа, манна баҕалаах үөрэнээччи барыта, тургутугу ааһан, үөрэнэ киирэр кыахтаах.

Үөрэтээччилэр таһымнарын үрдэтэргэ «FluentRussia» үөрэх хампаанньатын кытары сөбүлэҥ түһэрсилиннэ. Ол түмүгүнэн «АЛРОСА-кылаастарга» Челябинскай куорат физико-тэхиниичэскэй лиссиэйин педагогтара, СКЭ сорудахтарын ааптардара уонна эспиэрдэрэ үөрэтэллэр. Ону таһынан корпоративнай кылаастар оҕолоро англиялыы тэхиниичэскэй тылы үөрэтэллэр, бырагыраамаҕа идэни сатаан талыы блога уонна «Топ-кылаас» бырайыагынан хампаанньа салайааччыларын кытары көрсүһүү киирэллэр.

Мииринэй улууһун 8-10-с кы­лаастарын бары үөрэнээччи­лэригэр анаммыт «Мой выбор» идэни талыы оонньуута сыл аайы ыытыллар буолла. Корпоративнай кылаастар ону таһынан CASE-IN диэн аан дойдутааҕы инженер чөмпүйэнээтин оскуолатааҕы лиигэтигэр кытталлар. 2019 сылтан саҕалаан АЛРОСА – чөмпүйэнээт устудьуоннарын лиигэтигэр «Хайа дьыалата» уонна «Геологоразведка» хайысхаларыгар стратегическай бииргэ үлэлэһээччи буолар. Оттон 2022 сылга «Хайа массыыналара уонна тэриллэр» диэн саҥа хайысха эбилиннэ.

Корпоративнай университет саҥа кыттар бииргэ үлэлэһээччилэргэ уонна үөрэх технологияларыгар аһаҕас. Үлэ атын хайысхаларыгар булгуччулаах уонна идэлээх үөрэх, иһинээҕи тириэньэрдэри бэлэмнээһин уонна сайыннарыы, идэлээх уопсастыбалары сайыннарыы, ыччаты кытары үлэ, араас сайыннарар уонна үөрэх хайысхаларыгар хамаанданан уонна стратегическай сиэссийэлэри ыытыы, үлэһиттэри сайыннарарга бырагыраамалары оҥоруу уонна олоххо киллэрии уо.д.а. киирэллэр.

Корпоративнай университет бартыбыалыгар оҥорон таһаарыы (производственнай) үөрэх 273 бырагыраамата, 60 онлайн-куурус, 49 тренинг баар. Университет исписэлиистэрэ вебинардары, трениннэри ыыталлар, сорох истээччилэр бэйэлэрэ асинхроннай онлайн-куурустары бараллар, кэккэ түгэннэргэ үөрэх булкаас көрүҥэ туттуллар.

АЛРОСА 8 тыһыынчаттан тахса үлэһитэ бырамыысыланнаска куттал суох буолуутун уонна үлэ харыстабылын бырагырааматыгар үөрэнэр. 9 тыһыынчаттан тахса киһи сыл аайы идэни үрдэтиигэ, идэҕэ бэлэмнэниигэ хабыллар.

«Үлэһиттэри үөрэтии уонна сайыннарыы – биһиги хампаанньабыт корпоративнай тосхолун дьоһуннаах өрүтэ. АЛРОСА-ҕа, арааһа, биһиги университет үөрэтэр бырагыраамаларыгар кыттыбатах киһи суоҕа да буолуо»,– диэн АЛРОСА корпоративнай университетын салайааччы Алла Попова кэпсиир. Бырагыраамалары кытта тэҥҥэ саҥа трениннэр оҥоһуллалларын уонна бөлөҕүнэн хардарыта бииргэ үлэлээһин саҥа көрүҥнэрэ тургутуктаналларын эбэн эттэ.

Корпоративнай университет биир сүрүн уонна суолталаах соруга – оробуочай идэҕэ бэлэмнииргэ быраактыка-ориентация өттүн сайыннарыы. Уопсай тэхиниичэскэй куурустары уонна сокуону кытары сибээстээх бырагыраамалар түөрүйэлэрэ онлайн-көрүҥҥэ көһөллөр. Бу – үөрэнээччилэргэ бэйэҕэ табыгастаах кэмҥэ дьарыктанар кыаҕы биэрэр. Түөрүйэ чааһа бүттэҕинэ, хаалбыт кэми оҥорон таһаарыы уратытын учуоттаан, дьоҕуру, үөрүйэҕи иҥэринэргэ аныахтарын сөп. Ол үөрэппит тэриллэригэр дьиҥ олоххо үлэлиир сатабыллара улаатарыгар көмөлөһөр. Ону тэҥэ оҥорон таһаарыы кэмигэр дэҥ-оһол тахсар кыаҕын биллэ намтатар.

Михаил Присяжнай, Саха Өрөспүүбүлүкэтин үөрэххэ уонна билимҥэ миниистирин бастакы солбуйааччы:

– Хампаанньалар боппу­руоһу биир кэлимник быһаа­рарга холоноллор. Кинилэр кэлэктиипкэ уһун кэм үлэлиэхтээх хамаандалары оҥороллор. Ааспыт сыл чаҕылхай холобурдарыттан биирдэстэрэ – АЛРОСА каадыры бэлэмниир киинин төрүтүгэр корпоративнай университеты арыйыы буолар. Университет тэриллэрин өйүүбүт. Бырагыраамаларга сүрүн тирэх аныгы технологияларга уонна үөрэх нымаларыгар олоҕурбут трениннэр, хамаанданы үөскэтэр уонна стратегическай сиэссийэлэр туһаныллар куурустарыгар ууруллар. Корпоративнай университет идэ таһымын үрдэтэргэ эрэ туһуламмат, үлэһит сайдарыгар, хампаанньа иһигэр карьераланарыгар көмөлөһөр.

Алла Попова, АЛРОСА корпоративнай университетын салайааччыта:

– Корпора­тивнай университет урук­ку каадыры бэлэмниир киин курдук – биисинэс наадыйыытыгар оло­ҕуран, үөрэтии бородуукталарын бэлэмниир тутаах аналын оннунан илдьэ сылдьарын өйдүүрбүт суолталаах. Үөрэҕи таҥан таһаарыыга сыһыан билигин улаханнык уларыйда.

Корпоративнай университет үөрэх киинигэр ылар саҥа ньыматыгар салайтаран, билигин бэйэтэ биисинэскэ тиийэн, эрдэттэн маннык соруктары быһаарыаҕа. Холобур, маннык үөрэтии көрүҥэ наада диэн этиилээх тахсар, ол эбэтэр туруохтаах соруктары урутаан быһаарар, үөрэтэр аналлаах. Корпоративнай үөрэх хампаанньа бэлиитикэтигэр саҥа өйдөбүллэри киллэрэр. Уларыйа турар билиҥҥи эйгэ бэйэтин сокуонун олохтуур. Саҥа эйгэҕэ уларыйыы киһиттэн бэйэтиттэн тахсыахтаах, кини бэйэтин көҕүлээн сайдыахтаах, ону университет өйүөхтээх.

Үөрэх уонна сайдыы туора туран хаалыа суохтаахтар. Туохха барытыгар автоматизация киирэр.

Соторутааҥҥа диэри би­һиэ­хэ ким даҕаны үлэһит кыттыытын кэмнээбэт этэ, үлэни көҕүлээһин материальнай өттө эрэ көрүллэрэ. Хардарыта алтыһыы култуурата ситэтэ суоҕа, үөрэтии култуурата да олус сөбө суох курдуга.

Ол гынан баран биһиги уларыйабыт: үөрэҕи тэрийээччилэргэ кубулуйабыт, ахсааны сыаналыыртан хаачыстыбаны сыаналыырга киирэбит. Биһиги биисинэскэ хардыылыахтаахпыт уонна үөрэх саҥа көрүҥнэрин киллэриэхтээхпит, биисинэс бииргэ үлэлэһээччитэ буолуохтаахпыт, судургу сайаапканы толорооччуттан хамсааһын биир бырааптаах кыттааччытыгар кубулуйуох тустаахпыт.

Наталия Петухова, Үлэ­һит­тэри талар уонна сайыннарар управление начаалынньыга:

– Корпоративнай университет — муодаҕа сүгүрүйүү буолбатах, билиини үлэһиттэн үлэһиккэ биэрии култууратын оҥоруу.

Университет – идэлээх дьон (тириэньэрдэр, методологтар, устуоруктар, преподавателлар, администратордар) хамаандалара. Биһиги хамаандабыт Арассыыйа уонна аан дойду ырыынагар дэҥҥэ көстөр миэстэлээх, ол иһин үксүгэр биһигиттэн ирдэниллэр билиини, сатабылы, дьоҕуру «тастан» ылар кыахпыт суох. Ис ырыынакка биһиэхэ сөп түбэһэр уопуттаах дьон суох. Ол иһин корпоративнай университет билии олоҕурар сирэ буолуоҕа.

 Туһалаах иһитиннэрии: Көтүтүмэ!