Киир

Киир

 Бэс ыйын 3-6 күннэригэр дойдубут тэбэр сүрэҕэр — Москуба куоракка VIII төгүлүн ыытыллар «Кыһыл болуоссат» кинигэ бэстибээлэ буолан ааста. Бу сүҥкэн тэрээһиҥҥэ Арассыыйа 50 эрэгийиэниттэн 400 кинигэ кыһата кэлэн кыттыыны ылла. Онон, бу күннэргэ Кыһыл болуоссакка мустубут ааҕааччылар 100 тыһыынчаттан тахса умсугутуулаах кинигэни билистилэр, кинигэ бырааһынньыгар ыалдьыттаатылар.

С.А. Новгородов аатынан «Айар» национальнай кыһа эмиэ ситиһиилээхтик кытынна. Сылын аайы кинигэ нөҥүө Сахабыт сирин төрүт олохтоох норуоттарын уһулуччу ураты култуурабытын, үгэстэрбитин өрө тутан, дьону сөхтөрөр, кэрэхсэтэр гына кыттыыны ыларга дьулуһабыт. Бэстибээл чэрчитинэн ойууннар уонна айдарыылаах дьоҥҥо итэҕэл туһунан кинигэлэрбитин сүрэхтээтибит.

Ол курдук, саҥа кинигэлэрбит — «Великий шаман Никон», «Шаманы — избранники Небес и духов»; 2021–2022 сс. саамай ааҕыллар кинигэтэ — «Одержимая тайным даром»; маны сэргэ «Алыһардаах Аана», «Эдьиий — Удаганка Дора» диэн кинигэлэри таһаараары бэлэмнии сылдьарбыт туһунан сонуну манна кэлбит ыалдьыттарбытыгар аан бастакынан иһитиннэрдибит.

WhatsApp Image 2022 06 08 at 17.30.38

Ыҥырыылаах ыалдьыттарбыт уонна бэстибээл кыттааччылара ойуун кыырар сиэрин-туомун көрөн, өбүгэбит үгэһинэн алгыстанан, арчыланан, саха үйэттэн үйэҕэ илдьэ кэлбит таайыллыбат кистэлэҥин сэгэтэн, сөҕүү бөҕөтүн сөхтүлэр. Онтон илии-илииттэн ылсыһан, сомоҕолоһуу оһуохайын оройуттан туттубут.

«Айар» кыһа айымньылаах үлэтэ бары күрэхтэргэ үрдүктүк сыаналанна. Кытта барбыт дэлэгээссийэбит көтөх муҥунан наҕарааданы илдьэ иһэрин долгуйа күүтэбит.

WhatsApp Image 2022 06 08 at 17.30.38 1

П.И. Чайковскай дойдутугар «Сыл кинигэтэ» күрэххэ ситиһиилэр:

- «Оҕолорго уонна үүнэр көлүөнэҕэ аналлаах бастыҥ таһаарыы» номинацияҕа I истиэпэннээх лауреат диплома — «Чем хороши еноты», ааптар Е.А. Киричек (2021 с.);

- «Арассыыйа норуоттарын тылынан бастыҥ таһаарыы» номинацияҕа II истиэпэннээх лауреат диплома — «Бииргэ ааҕыахха», хомуйан оҥорооччу Кулаковская С.Н. (2021 с.);

- «Оҕолорго уонна үүнэр көлүөнэҕэ аналлаах бастыҥ таһаарыы» номинацияҕа II истиэпэннээх лауреат диплома — «Мегалодон и другие акулы», ааптар С.Е. Егорова;

- «Бастыҥ научнай-популярнай, үөрэххэ, наукаҕа аналлаах таһаарыы» номинацияҕа II истиэпэннээх лауреат диплома — Ф.Н. Татаева, А.Н. Татаева, Н.В. Ситникова ааптардар бөлөхтөрүн «Wадун аруу» («Тундренный юкагирский язык») үөрэх-мэтэдьиичэскэй кэмпилиэгэ (2021 с.);

- «Бастыҥ кыраайы үөрэтэр таһаарыы» номинацияҕа II истиэпэннээх лауреат диплома — Б.Ф. Неустроев-Мандар Уус «Узоры и орнаменты Саха» альбом-кинигэтэ (2021 с.);

- «Бастыҥ уус-уран, графическай оҥоһуулаах таһаарыы» номинацияҕа II истиэпэннээх лауреат диплома — «Подпольная книга домовых. Домовые Западной Европы» (2021 с.);

- «Оҕолорго уонна үүнэр көлүөнэҕэ аналлаах бастыҥ таһаарыы» номинацияҕа III истиэпэннээх лауреат диплома — «История Якутии» энциклопедия (2022 c.);

- «Бастыҥ уус-уран, графическай оҥоһуулаах таһаарыы» номинацияҕа III истиэпэннээх лауреат диплома — «Неизвестное Солнце. Чудеса. Факты. Загадки. Расследование», ааптардар Е.А. Киричек, И.Е. Панченко (2022 с.);

- «Оҕолорго уонна үүнэр көлүөнэҕэ аналлаах бастыҥ таһаарыы» номинацияҕа тэрийээччилэр анал дипломнара - Е.А. Степанова «Откуда берется еда?» (2021 с.) кинигэтэ;

- «Бастыҥ кыраайы үөрэтэр таһаарыы» номинация анал диплома - «Иллюстрированная энциклопедия Республики Саха (Якутия)» (2021 с.);

- «Бастыҥ региональнай таһаарыы» күрэх лауреатын диплома — «Предтеча», бырайыак ааптара, хомуйан оҥорооччу А.Н. Жирков (2021 с.);

- «Бастыҥ региональнай таһаарыы» күрэх лауреатын диплома — С.А. Новгородов алпаабытынан оҥоһуллубут «Сурук-бичик = Якутский букварь» репринтнэй кинигэ (2022 с.).

WhatsApp Image 2022 06 08 at 17.30.39

Арассыыйа кинигэ таһаарааччыларын ассоциациятын «Сыл бастыҥ кинигэлэрэ-2021» күрэҕэр ситиһиилэр:

  • «Бастыҥ тылдьыт-энциклопедия таһаарыы» номинация дипломана — «Иллюстрированная энциклопедия Республики Саха (Якутия): цифры, факты, карты»;
  • «Төрүт култуураны тарҕатыыга сүҥкэн кылаатын иһин» дьүүллүүр сүбэ диплома — Б.Ф. Неустроев-Мандар Уус «Узоры и орнаменты Саха» альбом-кинигэтэ (2021 с.);
  • Б.Ф. Неустроев-Мандар Уус «Узоры и орнаменты Саха» альбом-кинигэтин бэлэмнээн таһаарыы иһин биһиги кыһабытыгар Тутулуга суох судаарыстыбалар кинигэ тарҕатааччыларын Ассоциацияларын Бэрэсидьиэнин Н.И. Михайлова диплома туттарылынна.

«Айар» национальнай кыһа салайааччыта А.В. Егоров «Сибээс, информационнай технология, маассабай коммуникация уонна бэчээт сайдыытыгар өҥөтүн уонна өр сыллаах таһаарыылаах үлэтин иһин» АБ цифровой сайдыыга, сибээскэ уонна маассабай коммуникацияҕа миниистирин М.И. Шадаев Бочуоттаах грамотатынан наҕараадаланна.

WhatsApp Image 2022 06 08 at 17.30.40

«Айар» кыһа генеральнай дириэктэрин солбуйааччы, талааннаах тылбаасчыт, публицист, очеркист, кыраайы үөрэтээччи, уопсастыбаннай диэйэтэл, Саха сирин устуоруйатыгар элбэх кинигэ ааптара В.Н. Луковцевка төрөөбүт кыраайын култуурунай нэһилиэстибэтин үйэтитиигэ өр сыллаах үлэтин иһин С.О. Шмидт аатынан «Подвижник краеведения» анал диплому туттардылар.

Киэҥ Арассыыйаҕа өрөспүүбүлүкэбит аатын ааттата тиийбит кэллиэгэлэрбитин Арассыыйа Бэрэсидьиэнин иһинэн үлэлиир СӨ Бэрэстэбиитэлистибэтиттэн Судаарыстыбаннай Дуума дьокутаата Федот Сергеевич Тумусов кэлэн көрүстэ. Федот Сергеевич «Айар» кыһа салалтатыгар уонна Саха сирин норуодунай суруйааччытыгар Владимир Николаевич Федоровка Махтал бэлиэлэри туттарда.

WhatsApp Image 2022 06 08 at 17.30.40 1

Бу маннык улахан таһымнаах тэрээһиннэргэ кыттааччылар регионнарын билиһиннэрэллэрин таһынан үлэҕэ-хамнаска сыаналаах уопуттарын атастаһаллар, дьыалабыай сибээһи олохтууллар. Онон С.А. Новгородов аатынан «Айар» кыһа дэлэгээссийэтэ дойдубут киин куоратын киин болуоссатыгар өрөспүүбүлүкэбит аатын доргуччу ааттатан, сыралаахтык үлэлээн кыайыы кынаттаах, үрдүк ситиһиилэрдээх, инникигэ хорсун былааннардаах айаннаан иһэр. Айар — сайдыыны саҕар!

«Айар» национальнай кыһа сырдатыытыттан

Тарҕат:

Санааҕын суруй

Бүтэһик сонуннар