От ыйын 6 күнүттэн киин куорат оскуолаларыгар 2022-2023 үөрэх дьылыгар маҥнайгы кылааска ылыы иккис түһүмэҕэ бара турар. Ол эбэтэр, от ыйын 6 күнүттэн саҕалаан миэстэ бүтүөр диэри (балаҕан ыйын 5 күнүттэн хойутаабакка), оҕону оскуолаҕа олорор сириттэн тутулуга суох ылаллар. Бүгүн Үөрэх управлениета ыыппыт иһитиннэриитин аҕыйах сыыппаратыгар тохтоон ааһыахпыт. Баҕар, тугу эмэ туһаныахпыт.
Үөрэх управлениета иһитиннэрэринэн, быйыл киин куорат 50 оскуолатыгар 4831 миэстэлээх 168 кылаас аһыллара былааннаммыт. Олортон 121 нуучча тылынан үөрэтэр уонна 48 саха тылынан үөрэтэр кылаастар. Кылаастары үөрэтэр тылынан араарыы туохха олоҕурара хаһан да чопчуламмат.
Оскуолаҕа ылыы бастакы түһүмэҕин түмүгүнэн, киин куорат 19 оскуолатыгар эбии 14 кылааһы арыйарга уонна кылаастарга миэстэлэри элбэтэргэ быһаарбыттар. Онон, барыта 5505 миэстэлээх 183 кылаас арыллыбыт ( ол эбэтэр 15 кылааһынан элбэх). Мантан төһөтө сахалыы үөрэтэр кылаас буолара ыйыллыбатах.
2022 сыл от ыйын 18 күнүнээҕи туругунан, муниципальнай үөрэх тэрилтэлэрин маҥнайгы кылаастарыгар 5 547 сайабылыанньа киирбит. Онтон 5 023 оҕону ылбыттар. Билигин 29 оскуолаҕа 363 миэстэ баар диэн суруйаллар. Мантан төһө саха оҕотун төрөппүтэ нууччалыы үөрэттэрэ ыыппыта көстүбэтэх. Сахалыы үөрэниэн баҕалаах оҕо баар миэстэлэргэ сананыан сөбө дуу, суоҕа дуу эмиэ ылы-чып кистэлэҥ.
Пресс-сулууспа суругунан сылыктаатахха, Куорат классическай гимназиятыгар, Саха политехническэй лицейгэ, Дьокуускайдааҕы национальнай гимназияҕа маҥнайгы кылааска ылыы кыһалҕалаах боппуруостара өссө да быһаарыллан бүтэ иликтэр. Ону сэргэ, 1, 7, 26, 20 №-дээх орто оскуолаларга уонна Саха гимназиятыгар үөскээбит күчүмэҕэйдэри хайдах быһаарары тобуллубут диэбиттэр. Ол эрээри туох кыһалҕа баарын, ону хайдах туоратаары сылдьаллара биллибэт. Били былдьаһыктаах «Айыы кыһабыт» айдаана буолбатаҕын курдук. Оннооҕор Ил Дархан кэнники быһа эпииригэр «ити оскуоланы атын сиргэ көһөрүҥ, олохтоохторго биэриҥ» диир кыттааччылар бааллара.
Үөрэх управлениета доруобуйатынан хааччахтаах оҕо ахсаана элбээн иһэр диэн бэлиэтээбит. Онон, оҕону коррекционнай оскуолаларга киллэрии кыһалҕата эмиэ сытыытык турар. Манна сайабылыанньаны анал хамыыһыйа (ПМПК) быһаарыытынан ылаллар. Ол курдук, 88 сайабылыанньа киирбититтэн 41 оҕону ылбыттар. 47 оҕо өссө даҕаны хамыыһыйаны ааһаллар. Миэстэ итинэн бүтэр кэриҥнээх. Манна даҕатан эттэххэ, коррекционнай оскуолалар тустарынан сонуннарга биирдэ даҕаны төрөөбүт тыл туһунан биир эмэ этии, санаа оҕото кыбыллыбат. Ыарыһах оҕолор барахсаттар туох да омуга, төрөөбүт тыллара суоҕун курдук сыһыан олохсуйбута ала-чуо көстөр. Маннык сыһыан көнүөх тустаах.
Дьиҥэр, киин куоракка сахалыы эйгэлээх оскуола, сахалыы үөрэтэр кылаас тиийбэт кыһалҕата өрүү сытыытык турар. Аны кэнники кэмҥэ бары, үтүктүспүт курдук, төрөппүт оҕотун сахалыы үөрэтиэн баҕарбат диэн этэр идэлэннилэр. Оттон иһигэр киирдэххэ, тустаах уорган төрөппүт оҕотун сахалыы үөрэттэрэригэр усулуобуйа тэрийбэтин, сэбиэскэй өй-санаа тутах өттүн илдьэ сылдьар сорох оскуола салайааччылара тыл кыһалҕатын өйдөөбөттөрүн, күүскэ утарса олороллорун кэннэ, сыыйа-баайа оннукка тиийэрбит чахчы.
Бэйэ кэр.
