Юрий Петрович бэҕэһээ буолбут “Саха сирэ инновационнай экосистиэмэни олохтооһуҥҥа уопута” диэн сүбэ мунньахха: “Саха сирэ Уһук Илиҥҥэ үрдүк технологиялар сайдыыларын эйгэтигэр лиидэр буолар. Бүгүн өрөспүүбүлүкэҕэ манна 3,5 тыһ. киһи үлэлиир. Үс сыллааҕыта 1,5 тыһ. эрэ киһи үлэлиирэ.
Биһиги Айсен Сергеевичтыын хас да тэрилтэҕэ сырыттыбыт. Кини 2024 с. бу эйгэҕэ 10 тыһ. киһи үлэлиир буолуоҕа диирэ дойду сайдыытыгар улахан суолталаах. Манна үлэлиир дьон бэйэлэрин биисинэстэрин, саҥа технологиялары сайыннараллар, үрдүк хамнастаах үлэ миэстэтин тэрийэллэр. Технопааркаҕа, Саха сирин лабораторияларыгар үөскээбит технологиялар мэдиссиинэҕэ туттуллаллар, аан дойдуга барытыгар тарҕанар оонньуулар айыллаллар, араас хайысханан элбэх үлэ барар эбит. Бүгүн биһиги Саха сиригэр туох буоларын буолбакка, Саха сиригэр бу саҥа хайысхаҕа күүскэ сайдарыгар тугунан көмөлөһөрбүт туһунан кэпсэтиэххэ”, - диэн биһиги үлэбитин үрдүктүк сыаналыырын биллэрдэ.
Ил Дархан Айсен Николаев Саха сиригэр инновационнай экосистиэмэни тэрийии туһунан кэпсээтэ. Бу систиэмэни тэрийиини кини өссө 2018 с. ылбыт инновациянан уонна сыыпаранан сайдыы туһунан стратегическай ыйааҕынан саҕалаабыта. Ыйаахха 2024 с. технологическай инновациянан дьарыктанар хампаанньалар ахсааннара 2 элбиэхтээхтэрэ, IT уонна инновация эйгэтигэр сыл аайы 1 млрд солк. итэҕэһэ суох инвестиция тардыллыахтааҕа ыйыллыбыта.
2018 с. бүтүүтэ Дьокуускайга Уһук Илиҥҥэ бастакы арыллыбыта. Бүгүн манна 108 резидент тэрилтэ үлэлиир. Сыл аайы 1 млрд солк. итэҕэһэ суох үбү өлөрөн киллэрэллэр. Өрөспүүбүүлүкэҕэ IT-бородууксуйаҕа наадыйыы элбээн иһэр. Онон бу эйгэни кэҥэтэр туһугар Саха сирэ саҥа “Үлэ кыбаартала” диэн бырайыагы үлэҕэ киллэриэхтээх. IT эйгэни тэнитэргэ улуустарга 11 IT-кииннэр тэриллибиттэр. Сыл бүтүөр диэри өссө 4 арыллыахтаах.
2020 с. түмүгүнэн Саха сирэ IT-өҥөнү экспордааһыҥҥа Уһук Илиҥҥэ лиидэр буолла, өссө Арассыыйаҕа 11 бастыҥ регионнар ахсааннарыгар киирдэ.
Айсен Николаев: “Биһиги айылҕа баайынан Арассыыйаҕа 1 миэстэҕэ сылдьабыт. Сир баайын хостооһуҥҥа инники кэккэҕэ баарбыт. Онон биһиги айылҕабыт биэрэр кыаҕар тирэҕирэн, киһи өйүгэр уонна айар дьоҕуругар тирэҕирбит экэниэмикэ саҥа салаатын тэрийэргэ күүскэ ылса сылдьабыт”, - диэн түмүктээтэ.
Владимир Степанов
