Олунньу 7 күнүгэр Н.Е. Мординов-Амма Аччыгыйа аатынан Харбалаахтааҕы үөрэхтээһин холбоһугар "Снежный барс" хорсуннар-ходуоттар улуустааҕы күрэхтэрэ үрдүк таһымҥа буолан ааста.
Барыта 13 хамаанда, күөн көрсөргө ох курдук оҥостон, бэлэмнэнэн кэллилэр. Ытык Күөл 1 №-дээх оскуолата икки хамаанданы бэлэмнээн аҕалла. Бу оскуола эдэр байыастара Арассыыйа таһымнаах күрэхтэргэ ситиһиилээхтик кыттар идэлээхтэр. Салайааччылара Ирина Тарасенко үөрэнээччилэрин куруук олус ирдэбиллээхтик бэлэмнээн, үрдүккэ көтүтэр учуутал буолар.
Тэрээһин аһыллыытыгар параады П.А. Ойуунускай аатынан Чөркөөхтөөҕү орто оскуолатын “Вече” кулуубун салайааччыта Айгылаан Никифоров салайан киллэрдэ уонна параад командира Тааттатааҕы казактар хутордааҕы уопсастыбаларын атаманыгар Иван Рахлеевка араапардаан туттарда. Үгэс быһыытынан, Арассыыйа уонна Саха сирин былаахтарын гимн тыаһыгар арыаллатан киллэриинэн тэрээһин үөрүүлээх чааһа саҕаланна.
«Снежный барс” тэрээһин Арассыыйаҕа - “Дьиэ кэргэн”, Саха сиригэр - “Оҕо саас”, Тааттаҕа - “Таптал, Эрэл, Итэҕэл” сылларыгар ананан, үүнэр көлүөнэ ыччаты Ийэ дойдуга бэриниилээх, эт-хаан өттүнэн сайдыылаах, сэргэх, тулуурдаах, кыайыгас-хотугас буоларыгар туһуланан ыытылынна.
Этиилэригэр ону чопчулаан, бэлиэтээн эҕэрдэлэрин тиэртилэр: улуус баһылыгын солбуйааччы Святослав Сунхалыров, улуустааҕы үөрэх салаатын кылаабынай испэсэлииһэ Туяра Егорова, улуустааҕы “Бастыҥнар хамсааһыннарын” салайааччыта Татьяна Тютрина, Харбалаахтааҕы үөрэхтээһин холбоһугун директора Анна Мосоркина уонна бу күрэххэ үрдүк ситиһиилэри баҕардылар. Күрэхтэһии кылаабынай судьуйата Ирина Тарасенко күрэх хаамыытын билиһиннэрдэ.
“Снежный барс” байыаннай-спортивнай күрэхтэһии барыта сэттэ этабынан ыытылынна. “Строевой хаамыы” күрэҕэр, “Байыаннай дьыаланы уонна историяны билии” тургутугар, байыаннайдыы эстафетаҕа, “Автомат магазинын иитии” көрүҥнэргэ, кэтэһиллибитин курдук, Ытык Күөл 1 №-дээх нүөмэрдээх оскуолата, кими да иннигэр түһэрбэккэ, бастакы миэстэлэри ылан, чахчы үчүгэй бэлэмнээхтэрин көрдөрдүлэр. “Аптамааты ыһыыга уонна хомуйууга”, күүс-уох сайдыытын көрдөрөр этапка, икки көрүҥҥэ, Чымнаайы оскуолатын байыастара чаҕылхай ситиһиини көрдөрдүлэр. Ытыы күрэҕэр Ытык Күөл иккис нүөмэрдээх оскуолатын “Албан” хамаандата кыайыыны сурунна.
Түмүккэ А.И. Софронов-Алампа аатынан Ытык Күөл 1 №-дээх оскуолатын бастакы хамаандата Муҥутуур кыайыылаах буолла. Иккиһи В.И. Ленин аатын сүгэр Уолба орто оскуолатын хамаандата ылла. Үһүскэ бары көрүҥнэргэ эриэ-дэхси көрдөрүүлээх Г.Д. Бястинов-Бэс Дьарааһын аатынан Чымнаайы орто оскуолата тигистэ.
Эдэр байыастар уйаннарын-хатаннарын тургутар араас күрэхтэргэ туох баар кыахтарын туһанан кытыннылар. Бэйэ-бэйэҕэ өйөбүл буолуу үтүө холобурун көрдөрдүлэр.
Үгүс түбүктээх тэрээһини Харбалаахтааҕы үөрэхтээһин холбоһугун салалтата, учууталлара уонна преподавателлэрэ, үөрэнээччилэрэ уонна устудьуоннара – бары биир сомоҕо буолан тэрийэн, үрдүк таһымҥа ааста. Волонтердар этэрээттэрэ үчүгэйдик үлэлээн, оннооҕор асчыттарга тиийэ күүс-көмө өйөбүл буолбуттарын бэлиэтиир наадалаах. Улуустан туһааннаах тэрилтэлэр салайааччылара, кэлэн кыттыыны ылан, үтүө-баҕа санааларын тиэрпиттэрэ күрэхтэһии кыттыылаахтарын сүргэлэрин көтөхтө.
.
