Кулун тутар 19 күнүгэр "Арассыыйа -- мин устуоруйам" түмэлгэ Саха Өрөспүүбүлүкэтэ тэриллибитэ 100 сылыгар анаммыт устуоруйаны уонна кыраайы үөрэтээччилэр Дьокуускай куораттааҕы билим-быраактыка кэмпириэнсийэлэрэ буолан ааста.
Манна учуонайдар, устуоруйа учууталлара, кыраайы үөрэтээччилэр, аспираннар, устудьуоннар, оскуола үөрэнээччилэрэ, устуоруйаны интэриэһиргээччилэр сырыттылар, көхтөөх кыттыыны ыллылар. Кэмпириэнсийэ пленарнай чааһын арыллыытыгар мустубут дьону устуоруйа билимин дуоктара, академик, профессор Анатолий Николаевич Алексеев эҕэрдэлээтэ. Анатолий Николаевич Саха сирин устуоруйатын чинчийэр билим иннигэр турар соруктар туһунан, ону саҥа көлүөнэ чинчийээччилэр атыннык көрөн, саҥа ньыманы туттан чинчийиэхтэрэ турдаҕа диэн бэлиэтээн эттэ. Ону сэргэ устуоруйа билимин дуоктара, профессор Розалия Иннокентьевна Бравина "зуум" нөҥүө саха сирин устуоруйатын археология уонна этнография саҥа булумньуларын нөҥүө үөрэтии туһунан лиэксийэ аахта.
Кэмпириэнсийэ кыттыылаахтара саха устуоруйатын билимин тирээн турар проблемаларын туһунан ГЧИ устуоруйа билимин дуоктара Андриан Афанасьевич Борисов сүрдээх киэҥ ис хоһоонноох дакылаатын сэргээн иһиттилэр.
Устуоруйа билимин дуоктара, ХИФУ профессора Саассылаана Иннокентьевна Сивцева "Саха сирэ Аҕа дойду сэриитин кэмигэр: сыыппаралар уонна чахчылар" диэн ыстатыыстыка, биэрэпис дааннайдарынан ытаһаламмыт чинчийиитэ болҕомтону тарта.
Мустубут дьон устуоруйа билимин хандьыдаата Айтал Игоревич Яковлев "Этничность в современной культуре якутов" диэн Д.Г. Брагинаны кытта монографияларын презентациятын көрдүлэр-иһиттилэр.
Биллиилээх суруналыыс Владимир Николаевич Степанов "С.Ю. Широких-Полянскай Саха сиригэр гражданскай сэриини тохтотууга умнулла сыспыт ураты үтүөтүн" туһунан дакылаата кэрэхсэбили ылла, устуоруйа биллэ илик өрүттэрин арыйда.
Салгыы кэмпириэнсийэ кыттыылаахтара сиэксийэлэринэн хайдан үлэлээтилэр. Бастакы сиэксийэҕэ улахан дьон, иккис сиэксийэҕэ оскуола үөрэнээччилэрэ уонна алын куурус устудьуоннара кыттыыны ыллылар. Сиэксийэлэргэ ааҕыллыбыт бастыҥ дакылааттаах кыттааччылар дипломунан бэлиэтэннилэр.
Кэмпириэнсийэ сүрдээх көхтөөхтүк, тэрээһиннээхтик барда. Мантан салгыы кыайыылаахтар сотору буолуохтаах Өрөспүүбүлүкэтээҕи билим-быраактыка кэмпириэнсийэтигэр кыттыахтара. Кыттыыны ылбыт уонна кэмпириэнсийэни тэрийсибит дьоҥҥо барыларыгар улахан махтал буоллун.
