Киир

Киир

Алтынньы 18 күнүгэр  Хатыҥ Арыы нэһилиэгин Аппааны сэлиэнньэтигэр саҥа  амбулатория үөрүүлээх аһыллыыта бэлиэтэннэ. Эбийиэк бастакы сүһүөх эмп тэрилтэлэрин аныгылыы саҥардыы бырагырааматынан тутулунна. Тэрээһиҥҥэ СӨ бырабыыталыстыбатын бэрэссэдээтэлин  солбуйааччыта Ольга Балабкина кыттыыны ылла.

WhatsApp Image 2022 10 22 at 19.23.49

Историяны сэгэтэн кэпсиир буоллахха, 1937 сыллаахха  Аппааны нэһилиэгэр оччотооҕу саха норуотун  иэдэппит  ыарыыны – трахоманы эмтиир медпуун аан бастаан аһыллыбыта.  Аҕа дойду Улуу сэриитин ыарахан сылларыгар Карл Маркс аатынан холкуос иһинэн санитарнай пууну үлэлээн, элбэх киһи өлөр өлүүттэн быыһаммыта. 1968 сыллаахха сельсовет хонтуоратыгар 10 куойкалаах учаастактааҕы балыыһа тэриллибитэ. 80-с сылларга амбулаторияҕа физиокабинет, стоматологическай хос үлэлэрин саҕалаан, эмтээһин хаачыстыбата биллэрдик тупсубута. Кэнники сыларга үлэлии турбут амбулатория дьиэтэ олус эргэрэн, аныгы ирдэбиллэргэ эппиэттээбэт буолбута,  үлэлииргэ, эмтэнэргэ ыарахаттар үөскээбиттэрэ ыраатта. Өр сыллаах туруорсуу кэнниттэн  быйылгыттан саҕалаан,  саҥа врачебнай амбулатория  кылгас кэмҥэ тутуллан, олохтоохтор  үөрүүлэрэ үксээтэ.

Амбулатория модульнай конструкциянан оҥоһулунна, толору ирдэбилгэ эппиэттиир.  Ол курдук, врач-терапевт, врач-педиатр, смотровой, процедурнай, быһыы ылар, стерилизационнай  хостор, күнүскү стационар, эмп харалларыгар анал хостор,  раздевалка бааллар,   саҥа миэбэллэринэн, медицинскэй тэриллэринэн хааччылынна. Ол эрээри тастан эмтэнэргэ  анаан 2 эрэ куойкалаах. Бу  Кыһыл Дэриэбинэни кытта холбоон, 2100 киһи доруобуйатын көрөр-истэр тэрилтэ ирдэбилигэр эппиэттээбэтэ биллэр.

WhatsApp Image 2022 10 22 at 19.23.48  

Онуоха СӨ бырабыыталыстыбатын бэрэссэдээтэлэ Ольга Балабкина баар балаһыанньаны  учуоттаан, манна кэлэр сыл балаҕан ыйыттан  50 куойкалаах стационар тутуута саҕаланарын иһитиннэрбитин мустубут дьон, олус сүргэлэрэ көтөҕүллэн, ытыс тыаһынан көрүстүлэр. Маны сэргэ Ольга Валерьевна  санитарнай массыына ыларга сертификат туттарда.

Улуус баһылыга Юрий Слепцов эмтэнэргэ, нэһилиэнньэ доруобуйатын  харыстааһыҥҥа усулуобуйаны үөскэтиигэ салгыы үлэ барыахтааҕын иһитиннэрдэ, истиҥ эҕэрдэтин тиэртэ.  

Улуус кылаабынай бырааһа Ариан Сергеев медицинскэй тэрил ыларга сертификат туттарда уонна   46 сыл нэһилиэнньэ доруобуйата тупсарыгар туһугар өр сылларга бэриниилээхтик үлэлээн олохтоохтор ытыктабылларын ылыан ылбыт быраас Апреля Алексеева  аата  саҥа амбулаторияҕа  иҥэриллибитин туһунан үөрүүлээх быһыыга-майгыга иһитиннэрбитэ эмиэ биир бэлиэ түгэн буолла.

Бу күн бастыҥ эмп үлэһиттэрэ бэлиэтэннилэр. Ол курдук, терапевт-быраас Лидия Сидорова – “РФ доруобуйатын харыстабылын туйгуна”,  доруобуйа харыстабылын ветераннара Анна Габышева, Азалия Игнатьева,  медсестра Акулина Новгородова  улуус кылаабынай бырааһын Махтал суругунан, үлэ ветерана, лаборант   Татьяна Скрябина “Нэһилиэк туйгуна” бэлиэнэн наҕараадаланнылар.

WhatsApp Image 2022 10 22 at 19.23.46

Кэлэр сылларга балыыһаҕа тупсарыы үлэлэрэ ыытыллалларын туһунан нэһилиэк баһылыга Иван Ноговицын  билиһиннэрдэ. Ол курдук, эмтэнэ кэлбит дьон сынньаналларыгар анаан оҕо былаһаакката,  сырдатыы, көҕөрдүү үлэлэрэ ыытыллыахтара, эмчиттэр искибиэрдэрэ  тутуллуоҕа. Олохтоохтор саҥа, сырдык, аныгы  тэриллиилээх  балыыһаны күүтэн-күүтэн,  баҕа санаалара, дьэ, туолла.

Анастасия Корякина,
РФ уопсай үөрэхтээһинин Бочуоттаах үлэһитэ,
СӨ үөрэҕириитин туйгуна
Тарҕат:

Санааҕын суруй

Бүтэһик сонуннар