СӨ ТХМ агробырамыысыланнай холбоһук үлэһиттэрин быйыл сонотуоруй-куруорка сынньатарга Алтай кыраайын “Курорт Белокуриха” АУо-тун кытта хантыраак түһэрсибит. Манна сыһыаннаах ТХМ кулун тутар 22 к. 195 нүөмэрдээх бирикээһэ тахсыбыт.
Быйыл сынньаныан баҕалаахтартан сайабылыанньалары уонна ирдэнэр докумуоннары кулун тутар 24 күнүттэн ыам ыйын 20 күнүгэр диэри туталлар. Туттумахтаһыҥ!
Былырыыҥҥы курдук дьоммут, сири-дойдуну көрө таарыйа, Белокуриха “Сибиир” уонна “Катунь” сонотуоруйдарыгар сынньанар кыахтаммыттара үөрдэр. Бээ, араас сурах барыта баара, өрөспүүбүлүкэ иһигэр сынньатар буолаллар үһү диэххэ тиийэ.
АПК үлэһиттэрэ бүтүн 18 күн устата хаһаайыстыбаларын, сүөһүлэрин-астарын хаалларалларын уустугурдалларын быһыытынан, быйыл сынньалаҥ күнүн 14 күн оҥорбуттар. Ол оннугар былырыын 75 чэпчэтиилээх путевка көрүллүбүт буоллаҕына, быйыл 85 буола элбээбит.
Санатан эттэххэ, путевка сыанатын 80- %-нын судаарыстыба уйунар. Хаалбыт 20 % бырыһыанын эрэ үлэһит төлүүр. Путевка сыанатыгар сонотуоруйга олоруу, күҥҥэ үс аһылык уонна сүрүн эмтэнии киирэр.
Быйыл сынньаныан баҕалаахтартан сайабылыанньалары уонна ирдэнэр докумуоннары кулун тутар 24 күнүттэн ыам ыйын 20 күнүгэр диэри туталлар.
Баҕалаах киһи син иллэҥ булар кэмэ. Былырыын от ыйын 1 –атырдьах ыйын 29 күннэригэр түбэспитэ үлэ оройо буолан, табыгаһа суох этэ. Сорохтор баҕардаллар да ыыппакка хаалбыттара. Ону таһынан 10 киһи сайаапкалаһан баран, тустаах кэмигэр кыайан барбатаҕа. Түмүгэр хаарыан 21 путевка халтай хаалбытын сырдатан турабын. Бу боппуруоска “Кыымҥа” бүтүн балаһа анаммыта (19.01.2023).
Убаастабыллаах улуус баһылыктара, ТХУ-лар, ТХПК-лар салайааччылара, уопсайынан, үлэһит дьоҥҥутун сынньатар интэриэстээх АПК тэрилтэлэрин бас-көс дьоно! Былырыыҥҥы курдук балаһыанньа үөскээбэтин, путевка хаалбатын курдук, бу хайысхаҕа эрдэттэн үлэлэһиҥ, иһитиннэриини тиэрдиҥ.
Ирдэнэр докумуоннар
1. Анал халыыпка толоруллубут сайабылыанньа.
2. Олорор сиргитигэр баар эмп тэрилтэтиттэн путевка ыларга ирдэнэр 070/у формалаах ыспыраапка.
3. РФ гражданинын пааспарын куопуйата.
4. Үлэ киниискэтин куопуйата.
Хаһан сынньаныахха сөбүй?
Сынньана барыахха сөптөөх БЫҺА БАРЫЛЛААН кыраапык оҥоһуллубут. https://minsel.sakha.gov.ru/Gosudarstvennie-uslugi/putevka_san_kurort
Урукку курдук, хайаан да этиллибит биир-икки ый иһигэр буолбакка, хас да болдьохтон талар кыах баар буолбутун биһирии көрдүм. Ол курдук, бэс, от, атырдьах ыйдарыгар – 6-лыы, балаҕан ыйыгар, алтынньыга уонна сэтинньигэ – 20-лии, ахсынньыга – 7 путевка көстөр.
- Сынньаныан баҕарааччылар ыраахтан да олорон, Госуслуга уонна “Центр ресурсного обеспечения АПК” порталларын нөҥүө ыытар кыахтаахтар. Сигэлэрэ: http://e-yakutia.ru/, http://apksakha.ru/
- Уруккулуу почтанан ыытыахха эмиэ син (бу түгэҥҥэ докумуоннар куопуйалара нотариуһунан бигэргэммит буолуохтаах);
- Олорор сиргит МФЦ-тыгар тиийэн.
- “Центр ресурсного обесчпечения АПК” сирэй тиийэн туттарыахха сөп.
Сайабылыанньаҕытыгар, сынньаныы барыллаан оҥоһуллубут кыраапыгар олоҕуран, бэйэҕит баҕарар кэмҥитин Этот адрес электронной почты защищён от спам-ботов. У вас должен быть включен JavaScript для просмотра. суруйуохтааххыт. Ханнык кэмҥэ сынньаныахха сөбүн, уопсайынан сиһилии иһитиннэриини 8(4112) 50-97-49, 8 914-820-31-04 гэ эрийэн чопчулаһаргыт ордук.
“Центр ресурсного обеспечения АПК” сонотуоруй-куруорт боппуруоһунан дьарыктанар үлэһитэ Борис Федоровтан ыйыппыппар, билиҥҥитэ 21 сайабылыанньа кэлбитин эттэ.
Арктика улуустарын олохтоохторугар айан ороскуота төннөрүллэр
Ону таһынан Арктика 13 улууһугар киирсэр оройуоннартан сынньанааччылар олорор сирдэриттэн Беокурихаҕа диэри кэлэр-барар айаннарын төлөбүрэ 100 % кэмпэнсээссийэлэнэр. О.э. Абый, Аллайыаха, Анаабыр, Булуҥ, Үөһээ Дьааҥы, Үөһээ Халыма, Эдьигээн, Муома, Аллараа Халыма, Өлөөн, Орто Халыма, Усуйаана, Эбээн Бытантай АПКтын үлэһиттэрэ итиннэ хапсаллар.
Бастаан бэйэҕит төлөөн бараҕыт-кэлэҕит, ол кэнниттэн айан ороскуотун кэрэһилиир билиэттэргитин (а/ билиэт, “посадочнай” толуон уонна куораттар, оройуоннар икки ардыларынааҕы айан билиэтэ) кытта ТХМ миниистирин аатыгар сайабылыанньа суруйан, “ЦРО АПК” ГРУ туттараҕыт. Бааҥҥа баар счеккут реквизиттэрин ыйаҕыт. Оччотугар кэмпэнсээссийэ харчыта онно түһэр.
Татьяна Захарова-ЛОҺУУРА.
