Дойду тэбэр сүрэҕэр ыытыллыбыт, үгэскэ кубулуйбут “Золотая осень” быыстапка-дьаарбаҥкаҕа Саха сирэ 43 мэтээли ылары ситистэ. Бу туһунан ТХМ пресс-сулууспата иһитиннэрэр.
Саха сирин тыатын хаһаайыстыбатын үлэһиттэрэ 28 кыһыл көмүс, 8 – үрүҥ уонна боруонса мэтээли ыллылар. “Полюс холода” ТХПК 13 мэтээли, ол иһигэр 11 кыһыл көмүс уонна икки боруонса мэтээли ылары ситистэ. “Чурапчы” ТХПК быйыл 6 наҕарааданы ылла: 5 кыһыл көмүс уонна биир үрүҥ көмүһү. “Амма” СППК – 2 кыһыл көмүс, “Хаҥалас-Ас” ТХПК – кыһыл уонна үрүҥ көмүс мэтээллэри, Дьокуускайдааҕы көтөрү иитэр фабрика – биир кыһыл уонна үрүҥ көмүс мэтээллэри ылла.
Софронов аатынан Тыа хаһаайыстыбатын билим-чинчийэр института (ЯНИИСХ) дьаарбаҥка кыһыл уонна үрүҥ көмүс мэтээллэринэн бэлиэтэннэ. Боруонса мэтээли ЯНИИСХ Аччыгый тыа хаһаайыстыбатын академията ылла. Оттон ССТХА кыһыл көмүс мэтээли ылла.
Биэс кыһыл көмүс уонна үрүҥ көмүс мэтээли саха пиэрмэрдэрэ племенной уонна табаарынай сүөһүнү иитиигэ ылары ситистилэр”, - диэн ТХМ пресс-сулууспата иһитиннэрэр.
Маны таһынан, Уус Алдан улууһун дьаһалтата “За информационное обеспечение в племенном и товарном животноводстве” диэн хайысхаҕа кыһыл көмүс мэтээли ылары ситиспит. Саха сирин ветеринарияҕа департамена уонна Амматааҕы ветеринария Управлениета кыттыһан 2010-2018 сс. лейкоз ыарыытын бохсууга ситиһиилэрин иһин үрүҥ көмүс мэтээлинэн наҕараадаланна.
Боруонса мэтээлинэн “Дьокуускайдааҕы килиэп кэмбинээтэ” ААУо “Сказки Туймаады” кэмпиэтин иһин наҕараадаланна.
Министиэристибэ биллэрэринэн, “Золотая осень” дьаарбаҥкаҕа Саха сирин дэлэгээссийэтэ 8 туонна бородууксуйаны батарбыт. Санатар буоллахха, дойду 50-тан тахса эрэгийиэниттэн 100-тэн тахса тыа хаһаайыстыбатын тэрилтэлэрэ быйылгы дьаарбаҥкаҕа кыттыбыт. Саха сириттэн 11 тэрилтэ кыттыыны ылла.
