Казахстан бэрэсидьиэнэ Касым-Жомарт Токаев казах алпаабытын латыынныыга көһөрүү наадатын этэр.
Биллэрин курдук, кини иннинээҕи бэрэсидьиэн Нурсултан Назарбаев казах алпаабытын латыынныыга көһөрөр туһунан этиини бастаан өссө 2007 с. көтөхпүтэ, бэрэсидьиэннээн бүтэн барарын чугаһыгар “2025 с. Казахстан латыын алпаабытыгар толору көһөн бүтүөҕэ” диэбитэ. Даҕатан эттэххэ, Казахстаҥҥа элбэх нуучча тыллаах нэһилиэнньэ баар буолан, казахтар бу боппуруоска тиэтэйбэттэр, барытын олохтоохтук оҥосторго кыһаналлар. Онно холоотоххо, бу иннинэ Туркмения, Узбекистан, Азербайджан курдук түүр тыллаах урукку сэбиэскэй өрөспүүбүлүкэлэргэ алпаабыттарын латыынныыга туох да ньээҥкэлэһиитэ суох “хардырҕаччы” киллэрэн кэбиспиттэрэ.
Биллэрин курдук, 1920-с сыллар саҥаларыгар саҥа тэриллибит ССРС национальнай өрөспүүбүлүкэлэргэ, ол иһигэр Саха АССР-га эмиэ, тута латыынныы алпаабыты көҕүлээн киллэрбитэ. Тоҕо диэтэххэ, ол саҕана ССРС салалтата бэрт сотору кэминэн “мировой өрөбөлүүссүйэ” буолан аан дойдуга барытыгар коммунизм олоҕурарыгар бүк эрэллээҕэ. Онон “эрдэттэн бэлэмнэнэ турарга” быһаарыммыта. Таарыйа, ислам итэҕэллээх, арабтыы суруктаах Орто Азия, Кавказ омуктарын итэҕэллэриттэн тэйитэр кыһалҕа турара. Онтон 1930-с сыллар ортолоруттан “мировой өрөбөлүүссүйэ” кыайтарбат буолбутун өйдөөн, өрөспүүбүлүкэлэргэ барыларыгар нууччалыы кириллицаны киллэрбиттэрэ.
