Ил Дархан бирииһигэр ат сүүрүүтүн кыайыылааҕа – Мэҥэ Хаҥаластан Крит!

Туймаада ыһыаҕын иккис хонугар, Үс Хатыҥ ипподруомугар, Ил Дархан бирииһигэр өрөспүүбүлүкэтээҕи ыраас хааннаах аттары сүүрдүүгэ күрэхтэһии буолла.

Ат сүүрүүтүн үөрүүлээх аһыллыытыгар СӨ Ил Дархана Айсен Николаев Саха сирин олохтоохторун уонна ыалдьыттарын кэтэһиилээх бырааһынньыкпыт сүрүн күрэҕэ үүммүтүнэн эҕэрдэлээтэ.

«Биһиги өрөспүүбүлүкэбит сылгыһыттарын, сүүрүүк аттары иитээччилэри өйүөх тустаахпыт. Онон, биһиги Саха сирин ат успуордун Федерациятын бэрэсидьиэнэ Руслан Федотовтуун уонна эрэгийиэммит бырабыыталыстыбатын кытта соторунан буолуохтаах дерби күрэхтэһиитигэр 2 мөлүйүөн солк. сууммалаах бириис пуондатын олохтуурга быһаарынныбыт. Маны сэргэ, «Национальное достояние» ат сүүрүүтүгэр, Саха сиригэр төрөөбүт ыраас хааннаах, 4 саастаах уонна ол саастарын ааспыт боруода аттарга 3 мөл.солк. сууммалаах бириистээх пуонданы олохтуурга быһаарыныы ыллыбыт. Бу күрэхтэһии балаҕан ыйыгар буолуоҕа», - диэн Айсен Николаев иһитиннэрдэ.

Ат сүүрүүтүн үөрүүлээх аһыллыытыгар СӨ ат успуордун Федерациятын бэрэсидьиэнэ, Ил Түмэн норуодунай дьокутаата Руслан Федотов эҕэрдэ тылын эттэ.

Саха Өрөспүүбүлүкэтин Ил Дарханын 5 мөл сууммалаах бирииһэ 4 уонна онтон үөһээ саастаах, ыраас хааннаах сүүрүүк ат боруодаларын 2400 м. уһуннаах дистанцияҕа сүүрүүлэригэр ананна. Бириис успуонсара – СӨ бырабыыталыстыбата.

Сүүрүүгэ муҥутуур кыайыылааҕынан Мэҥэ Хаҥаластан сылдьар Крит диэн сүүрүүк ат буолла, түмүгэ – 2 мүн. 42 сөкүүндэ. Кини 2,5 мөл. солкуобайы кыайда. Иккис миэстэни Уус Алдантан Эйр Бен Барс ылла (бирииһэ – 1 мөл. 250 тыһ. солк.), үһүс миэстэ Ньурба улууһун Эллизиум атыгар тигистэ (бирииһэ 750 солк.), онтон төрдүс миэстэни Чурапчы улууһуттан Мэин Кониг ылла (бирииһэ 500 тыһ.).

Маны сэргэ, ыраас хааннаах сүүрүүк аттарга 4 күрэхтэһии буолла – 800, 1000, 1600 уонна 2000 миэтэрэҕэ сүүрүү. Манна туһунан арахсан, Саха сиригэр төрөөбүт, ыраас хааннаах, 2 саастаах уонна онтон үөһээ саастаах сүүрүүк аттарга, маны таһынан, Саха сиригэр төрөөбүт, 3 уонна онтон үөһээ саастаах сүүрүүк аттарга аналлаах күрэхтэһиилэр буоллулар.

Ат сүүрүүтүн күрэхтэрин успуонсардарынан Алмазэргиэнбанк, Дьокуускай куорат дьаһалтата, «Югория» страховай хампаанньалар бөлөхтөрө» АУо, «Өрөспүүбүлүкэтээҕи инвестиционнай хампаанньа» АУо буоллулар.

Оттон 3 саастарыттан үөһээ саастаах аттар 2000 миэтэрэ уһуннаах сүүрүүлэригэр Арассыыйа Үтүөлээх фермерын сырдык аатын, СӨ Тыатын хаһаайыстыбатын үтүөлээх үлэһитин Константин Макаров-Үөкүйэ Куоста сырдык кэриэһигэр анаммыт бирииһи Константин Макаров дьиэ кэргэнэ, аймахтара уонна доҕотторо туруордулар.

Ат сүүрүүтүгэр «Чолбон продакшн» продюсерскай киин, өрөспүүбүлүкэтээҕи ат сүүрүүтүн Өрөспүүбүлүкэ бэрэсидьиэнин бирииһин үс төгүллээх кыайыылааҕар анаммыт «Спид Стар» диэн уус-уран киинэ тизерин көрдөрдүлэр.

Андрей Сорокин хаартыскалара