Норуоттар икки ардыларынааҕы VII-с «Азия оҕолоро» успуорт оонньууларын үөрүүлээхтик арыйыы Владивосток куоракка киэһэ 18:00 саҕаланыаҕа. Манна 15 дойду уонна Арассыыйа 8 региона кыттыыны ылыахтара.
«Азия оҕолоро» оонньуулары көҕүлээбит, төрүттээбит уонна тэрийэн ыыппыт Саха Өрөспүүбүлүкэтин Бастакы Бэрэсидьиэнэ Михаил Николаев быйылгы оонньуулар кыттааччыларын уонна тэрийээччилэрин эҕэрдэлээтэ:
«Күндү оҕолор, ытыктабыллаах тэрийээччилэр, Норуоттар икки ардыларынааҕы «Азия оҕолоро» успуорт оонньууларыгар сыһыаннаах бар дьон!
Эһигини өрөспүүбүлүкэ уонна бүттүүн дойду баайа буолбут сүҥкэн суолталаах тэрээһин саҕаламмытынан эҕэрдэлиибин!
«Азия оҕолоро» оонньуулар үүнэр көлүөнэни иитиигэ, бастатан туран, киһи аймах чэчирии сайдарыгар олук уурар суолталаннылар. Төһө да уустук кэм бүрүүкээбитин иһин, Оонньуулар ыытыллан эрэллэриттэн олус үөрэбин. Тоҕо диэтэххэ, бу ураты сомоҕолуур суолталаах. Биһиги мэлдьи «Оҕо – ийэ сир инникитэ» диэн этэбит. Ол быһыытынан, Саха сирин олохтоохторо аан дойду чэчирии сайдарыгар улахан үтүөлээх буолбуппутунан киэн туттуохтаахпыт.
Кэм-кэрдии Оонньуулары ыытарга бастакы быһаарыыбыт сөптөөҕүн көрдөрдө. Оччолорго үгүс дьон соһуйара, утарара даҕаны. Онуоха биһиги, күннээҕи килиэби эрэ толкуйдуур сатамматын өйдөөн тураммыт, уустуктары аахсыбакка, омук уопсай сайдыытын, чөл туруктаах инникитин санаабыппыт. Бастакы Оонньуулар бүтүн аан дойду успуордун уопсастыбатын долгуппуттара. Биһиги аччыгый өрөспүүбүлүкэбит оҕолор аан дойду таһымнаах олимпийскай оонньууларын хаһаайына буолбута. Онон, үгүс дьон санаатыгар Саха сирэ тэтимнээх сайдыыны кытта ситимнэһэр буолбута. Билигин «Азия оҕолоро» оонньуулары тас дойдуларга улаханнык суолталыыр буоллулар уонна аан дойду успуордун таһымыгар билиннилэр.
«Азия оҕолоро» оонньуулар ыытыллалларын тухары 10 000 эдэр спортсмен кыттыбыта олус кэрэхсэбиллээх. Кыттыбыт оҕолортон сорохторо ааттаах-суоллаах чөмпүйүөннэр буола үүммүттэрэ. Олор истэригэр Георгий Балакшин, Арсен Галстян, Виктор Лебедев, Наталья Леонтьева, Дария Дмитриева бааллар. СӨ успуордун миниистирэ Леонида Спиридоновка «Азия оҕолоро» оонньуулара аан дойду таһымнаах бастакы күрэхтэһиитэ этэ. Ол эрээри бу оонньууларга сүрүнэ – бииргэ буолуу, доҕордоһуу иэйиитин, успуорка эрэ буолбакка, олоххо эмиэ кыайыыга тардыһыыны иҥэрии. Чөл туруктаах, күүстээх омук бары эйгэлэри - үөрэҕириини, науканы, тыа хаһаайыстыбатын, бырамыысалыннаһы - баһылыан уонна сайыннарыан сөп.
Биһиги сүрүн сыалбыт - дьулуурдаах, күүстээх санаалаах, чөл олоххо тардыһыылаах, омугун, дойдутун, бүтүн планета сайдыытын туһугар эппиэтинэстээх оҕолору уонна ыччаты иитии буолар. Бырааһынньыгынан, күндү доҕоттор!».
Санатар буоллахха, Михаил Николаев Оонньуулары ыытар туһунан Ыйааҕа 1995 сыл балаҕан ыйыгар тахсыбыта. Ол күнтэн саҕалаан Сахабыт сиригэр успуорт эйгэтэ тэтимнээхтик сайдан барбыта. Бу өрөспүүбүлүкэ сайдыытыгар бүтүннүүтүгэр үтүө өттүнэн дьайбыта.
Сонун төрдө: «Николаев киинин» пресс-сулууспата
