Регионнар бэчээттэрин уонна интэриниэт таһаарыыларыгар судаарыстыба көмөтө ирдэнэр 

 

Ол туһунан муус устар 11 күнүгэр Арассыыйа Уопсастыбаннай Палаатата тэрийбит «Региональные СМИ как инструмент политики информационного суверенитета. Актуальные проблемы и меры поддержки»  диэн улахан мунньахха Ил Түмэн билимҥэ, үөрэххэ, култуураҕа, маассабай информацияҕа уонна  уопсастыбаннай тэрилтэлэргэ кэмитиэтин бэрэссэдээтэлин солбуйааччы, Национальнай СМИ-лэр Ассоциацияларын бэрэссэдээтэлэ, «Ил Түмэн» бэчээт кыһатын генеральнай дириэктэрэ, сүрүн эрэдээктэрэ Мария ХРИСТОФОРОВА чопчу этиилэрдээх дакылаат оҥордо.

 

Кини Саха сиригэр СМИ, бэчээт эйгэтэ бүгүн хайдах-туох туруктааҕын, ол иһигэр Дьокуускайга судаарыстыбаннай хаһыаттары, сурунааллары бэчээттиир соҕотох  «Ю.А. Гагарин аатынан  өрөспүүбүлүкэтээҕи типография» АУо улахан уустуктары көрсүбүтүн, матырыйаал сыанатын үрдээһинэ хаһыаттарга улаханнык охсубутун тоһоҕолоон эттэ: 

 

 «Кириисиһи сэрэтэр миэрэлэр чэрчилэринэн бу сүҥкэн суолталаах тэрилтэ судаарыстыбаннай таһаарыылары бэчээттииргэ туох даҕаны субсидия, эбии үп- харчы ылбат. Онон, типографияҕа  «Сахапечать» ГАУ, «Сахамедиа» АО РИИХ, Н.Е. Мординов-Амма Аччыгыйа «Кэскил» оҕо бэчээтин кыһатын, «Ил Тумэн» бэчээт кыһатын таһаарыыларын уонна чааһынай таһаарыылары бэчээттииригэр судаарыстыбаттан көмө оҥоһуллара ирдэнэр. Оччоҕо тэрилтэ бу сыллааҕы ороскуотун аччатыа уонна бэчээт матырыйаалынан хааччыныа этэ».

 

Ону таһынан, Мария Христофорова хаһыаттары өйүүргэ, сурутуу сыанатын үрдэппэт туһугар, 2014 сыллаахха диэри “Арассыыйа почтатыгар” төлөнөр федеральнай субсидияны төннөрөрү туруоруста.  Хаһыаттар, сурунааллар эрэдээксийэлэрин  көмүскүүргэ сыл иккис аҥаарыгар  5 тыһ. тахса, Арассыыйа омуктарын тылларынан тахсар 500-тэн тахса тиражтаах бэчээттэнэр таһаарыыларга РФ Бырабыыталыстыбатын 2020 сыл ыам ыйын 16 күнүнээҕи 696 №-дээх уурааҕын холобурунан көмө оҥорорго этии киллэрдэ. 

 

Ураты болҕомтону дьокутаат, дойдуга сорох социальнай ситимнэр бобуллубуттарын түмүгэр, бэчээт кыһалара уонна бэчээттэнэр таһаарыылар үгүс аудиторияларын сүтэрбиттэрин, онтон Telegram уонна Vkontakte ситимнэргэ көһүү, аудиторияны саҥаттан хомуйуу уустуктардааҕын уонна элбэх сыраны эрэйэрин бэлиэтээтэ. Онон сибээстээн, информационнай суверенитеты ситиһэргэ иһитиннэрэр-сырдатар таһаарыылары тас дьайыыга бэриммэт эрэллээх бэйэ бырагырааматынан (программнай обеспечение)  хааччыйарга маннык миэрэлэри түргэнник киллэриэххэ диэн көрдөстө:  

 

1. РФ цифровой сайдыыга, сибээскэ уонна маассабай коммуникацияҕа министиэристибэтэ социальнай суолталаах региональнай электроннай СМИ-лэр диэн статуһу бигэргэтэригэр;

 

2. Интэриниэт СМИ-лэргэ: информационнай ааҕыныстыбаларга, сетевой таһаарыыларга субсидиялары уонна граннары олохтуурга; 

 

3. Роскомнадзорга СМИ быһыытынан регистрацияламмыт  электроннай барыйааннаах уонна социальнай ситимнэргэ күүскэ үлэлиир таһаарыылары  IT-эйгэтигэр тэҥнииргэ маннык ОКВЭД-тары ( 63.12.1 – деятельность сетевых изданий и 63.91 – деятельность информационных агентств) киллэрдэххэ, бу тэрилтэлэр IT- эйгэҕэ көрүллэр чэпчэтиилэри туһанар кыахтаныа этилэр; 

 

4. Эрэдээксийэлэргэ саҥа социальнай ситимнэргэ үлэлииргэ үөрэх тиһигин тэрийэргэ; 

 

5. Кэмиэрчэскэйэ суох тэрилтэлэргэ ананар  граннар холобурдарынан,  эрэдээксийэлэргэ Vkontakte, Yandex, mail.ru ситимнэргэ таргеттаммыт рекламаҕа диэн граннары олохтуурга .