Киир

Киир

Арассыыйа бэрэсидьиэнэ Владимир Путин дьиэ кэргэн институтун бөҕөргөтүүгэ уонна оҕолору иитиигэ үтүөлэрин иһин Пестряковтар дьиэ кэргэни «Төрөппүт албан аата» уордьанынан наҕараадалыыр туһунан Ыйаах таһаарда. 

Людмила уонна Петр Пестряковтар 1993 сыллаахха Уус Алдан улууһун Бороҕон сэлиэнньэтигэр  ыал буолбуттар, онтон Дьокуускай куоракка көһөн киирбиттэр. Кэргэнниилэр сэттэ кыталык кыыһы төрөппүт дьоллоохтор. Билигин  номнуо икки сиэн эбэтэ-эһэтэ буолан олороллор.  

Бу иллээх саха ыалын киин куорат Сайсары уокуругар үчүгэйдик билэллэр. Ол курдук кинилэр олоххо көхтөөхтөр, үтүө майгылаахтар.

Аҕа баһылык Филипп Пестряков баһаарынай чааһы салайар туйгун үлэлээх ис сулууспа майора, Саха сирин аҕаларын лигатын көхтөөх кыттыылааҕа. Кини тус көҕүлээһининэн, 2016 сылтан баһаарынай сулууспа үлэһиттэрин элбэх көрүҥнээх күрэхтэһиитэ ыытыллар. 2014 сыллаахха Дьокуускайга доҕотторун кытта «Аурум» диэн волейбол кулуубун тэрийбитэ. 2020 сылтан киин куорат волейболга сүүмэрдэммит хамаандатын сүрүн тириэньэрэ буолар.

Далбар хотун Людмила кыргыттарын уонна сиэннэрин тус холобурунан иитэр, дьахтар сатабылын барытын үөрэтэр, дьиэни-уоту бэрийии кистэлэҥин толору иҥэрэр.

Пестряковтар улахан кыыстара Любовь хайыы үйэ икки оҕо күн-күбэй ийэтэ, Арктикатааҕы судаарыстыбаннай агротехнологическай университет Инженернэй факультетын маҕыстыраана. Иккис кыыс Нарианна Дьокуускайдааҕы технология уонна дизайн коллеһын устудьуона. Үһүс кыыс Марианна иһит маҕаһыыныгар үлэлиир, SMM-менеджмены баһылыыр. Балыстар Людмила, Елена уонна Лариса Саха политехническэй лицейигэр үөрэнэллэр, оскуола олоҕор көхтөөхтүк кытталлар . Аччыгый кыыс Машенька 51№-дээх «Кэскил» уһуйаан иитиллээччитэ.

Төрөппүттэрин үтүөлэринэн, оҕолор таптал, кыһамньылаах сыһыан уонна өйдөһүү эйгэтигэр иитиллэллэр. Ийэлээх аҕа биир сүбэнэн оҕолоро эйэҕэс, аһыныгас, үлэһит, төрөөбүт дойдуга бэриниилээх, дьоһуннаах дьон буолан тахсалларыгар биир сүбэнэн кыһаллаллар. 

Сонун төрдө: СӨ Бырабыыталыстыбатын уонна Ил Дарханын пресс-сулууспата.
Хаартыска: Пестряковтар дьиэ кэргэн архыыбыттан
Тарҕат:

Санааҕын суруй