Оҕо саас – хас биирдии киһиэхэ сырдык өйдөбүл буолан өйгө-сүрэххэ хаалар олоҕуҥ саамай кэрэ түгэнэ буоллаҕа. Ол эрэн сорох оҕолор толорута суох дьиэ кэргэҥҥэ иитиллэллэр. Соҕотох ийэ уонна аҕа оҕолорун иитэллэригэр, атахтарыгар туруоралларыгар үп-харчы өттүгэр ыарахаттары көрсөллөр.
Суут бириистэптэрэ оҕо сокуоннай быраабын көмүскүүллэр: ол курдук улахан дьон өттүттэн элэмиэн эбэһээтэлистибэтин толоруу, тулаайах уонна көрүүтэ-истиитэ суох хаалбыт оҕолорго дьиэ-уот бэриллиитин о.д.а.
Аан дойдутааҕы оҕо көмүскэлин бырааһынньыгын иннинэ, СӨ суут бириистэптэрин Федеральнай сулууспатын управлениетын Дьокуускай куораттааҕы отделын начаалынньыгын солбуйааччы Виктор Николаевтыын элэмиэни төлөөбөт дьону кытта туох үлэ ыытылларын кэпсэттибит.
-- Виктор Иванович, элимиэн эбэһээтэлистибэтин толорбот киһи уобараһын оҥорон биэриэҥ дуу?
-- Биллэрин курдук, бу биир эбэтэр икки оҕолоох эр киһи. Үксүгэр саҥа олоҕун оҥостон иккис кэргэнигэр олорор, оҕолордоох. Иэстээх киһи суут бириистэптэрэ хамнаһыттан быһа элэмиэни туппатыннар диэн официальнай туох да докумуона суох үлэлиир, ханнык да үлэ дуогабарын түһэрсибэт. Маннык элимиэҥҥэ иэстээх киһи суут бириистэптэриттэн мэлдьи куота сылдьар.
Сокуоҥҥа уларыйыы киирбитинэн, ол эбэтэр 2017 сыл алтынньы 30 күнүнээҕи 309 №-дээх “О внесении изменений в статьи 27.2 и 27.3 Кодекса об административных правонарушениях РФ” федеральнай сокуоҥҥа олоҕуран суут бириистэптэрэ административнай кэһиини оҥорон дьыалаламмыт элэмиэҥҥэ иэстээх дьону тутан, эппиэккэ тардыахтарын сөп (ст.5.35.1 КоАП РФ “Неуплата средств на содержание детей или нетрудоспособных родителей”).
Сокуоҥҥа тахсыбыт уларыйыылар суут бириистэптэрин иэстээх дьону кытта үлэлэригэр үчүгэй дьайыылаах буолла. Ол курдук, Дьокуускай куоракка бу сылга киирэн баран 114 иэстээх дьон административнай эппиэккэ тардылыннылар (ст. 5.35.1 КоАП РФ), мантан сорохторо 15 сууккалаах административнай хаайыыга (арест), сорохторо эбэһээтилинэй үлэнэн хабылыннылар.
-- Элэмиэҥҥэ иэстээх дьону кытта эриэйдэ төһө элбэхтик ыытылларый?
-- Суут бириистэптэрэ маассабай бэрэбиэркэни Дьокуускай куоракка кыбаартал аайы, онтон үлэ бэрээдэгинэн ыытыллар эриэйдэлэр күн аайы ыытыллаллар. Маны тэҥэ көннөрү күннэргэ “Дорожный пристав” Суол инспекциятын үлэһиттэрин (ГАИ) кытта ыытыллар.
-- РФ Холуобунай кодексатын 157 ыст. олоҕуран (“Неуплата средств на содержание детей или нетрудоспособных родителей) көбүтүллүбүт дьыалалаах иэстээх дьон суумата төһөнүй?
-- Дьокуускай куорат олохтоохторугар тэриллибит холуобунай дьыала суумата 2 302 787 солкуобайга тэҥнэһэр. Ол эбэтэр хас биирдии холуобунай дьыала тэриллибит киһиэхэ ортотунан 35-40 тыһыынча солкуобай тиксэр. Манна биири бэлиэтээн этиэххэ наада, РФ ХК 157 ыст. олоҕуран холуобунай дьыала тэриллиэн инниннэ, иэстээх киһи бастаан административнай эппиэтинэскэ тардыллыахтаах.
-- Иэстээх дьоҥҥо саамай көдьүүстээх миэрэ туһунан кэпсиэҥ дуу?
-- Иэстээх дьоҥҥо суут бириистэптэрин өттүттэн күһэлэҥ миэрэлэр ылыллаллар: ол курдук, иэстээх киһи үлэлиир тэрилтэтиттэн хамнаһыттан ирдээн тутан ылыы, салгыы бухгалтерия харчыны тутан ылан иһэрин хонтуруоллааһын ыытыллар. Өскөтүн иэстээх киһи ханна да үлэлээбэт буоллаҕына иэһин суотугар кини бас билэр баайыттан, счекка баар үбүттэн тутуллар.
Маны тэҥэ иэстээх киһи РФ тас өттүгэр тахсара хааччахтаныан сөп. Үлэлээбэт иэстээх дьон олорор сирдэринэн үлэ булуналларыгар Үлэнэн хааччыйыы кииннэригэр ыытыллаллар.
Өскөтүн иэстээх киһи туһунан туох да иһитиннэрии суох буоллаҕына бу киһи көрдөбүлгэ бэриллэр.
Иэстээх дьону кытта үлэ ГИБДД үлэһиттэрин кытта “Дорожный пристав” автоматизированнай программнай комплекс нөҥүө ыытыллар. Ол курдук иэстээх дьон массыына хаһаайыттара буоллахтарына ГАИ нөҥүө биллэллэр.
СӨ ФССП пресс сулууспата.
