Ааҕааччыларбыт, бары өйдүүр буолуохтааххыт – хаһыаппыт бу сыл сэтинньи 3 күнүнээҕи 43-с нүөмэригэр “Баҕа санаам – бааннаҕа суунан, өбүгэм дойдутугар аттаннарбын...” диэн суруйуум тахсыбытын. Бу суруйуу нэһилиэнньэ ортотугар улахан аймалҕаны таһааран, дьон дууһатын кылын таарыйан, уопсастыбаннас улахан долгуйуутун таһаарбыта.
Ол түмүгэр ыстатыйабыт сүрүн дьоруойа буолбут, сэрии оҕото, үлэ бэтэрээнэ 82 саастаах Лидия Игнатьевна Лыткина бүгүн саҥа дьиэтигэр көһөн киирэн, Саҥа дьылы саҥа дьиэҕэ көрсөрдүү бэлэмнэнэр.
Хайдах саҕаламмытай?
Сэтинньи саҥатыгар эрэдээксийэбитигэр Мэҥэ Хаҥалас Майатыттан Ульяна Стручкова диэн аҕам саастаах ааҕааччыбыт төлөпүөннээн: “Дьокуускай куорат Короленко уулуссатыгар хаарбах дьиэҕэ кырдьаҕас баабыска олорор усулуобуйатын баран билсэргит буоллар”, – диэн көрдөспүтэ. Эрэдээксийэм сорудаҕынан, ол күн уталыппакка, Короленко уулусса 46-с дьиэтин 16-с кыбартыыратыгар бара сырыттым. Чахчы даҕаны, уустук усулуобуйаҕа олорорун киирэ түһээт бэлиэтии көрөҕүн – иҥнэл-таҥнал түспүт муоста, борук-сорук хараҥа дьиэ, испиэскэтэ көөрөттөн түспүт истиэнэ, таһырдьа аана, ойоҕоһо суох туалет... Ааҕан сиппэккин.
Уопсастыбаннас долгуйуута улаханнык көмөлөстө
Хаһыат ыстатыйата уонна онно сигэнэн оҥоһуллубут видео “вирустаах ролик” буолан социальнай ситимнэринэн тарҕанан, араас пабликка куоппуйаламмыта. Үрдүкү былаас уорганнарын бэрэстэбиитэллэрэ – куорат борокуруора Антон Николенко, куорат дьаһалтатын баһылыга Евгений Григорьев, Дьокуускай куорат дьиэ-уот сыһыаннаһыыларыгар дэпэртээмэнин салайааччыта Евгения Пак бэйэлэринэн кэлэн көрөн-истэн баран, Новокарьернай уулуссаҕа маневреннай дьиэҕэ 1 хостоох саҥа дьиэни биэрэргэ быһаарбыттара.
Эбээ Лидия ыра санаата туолуута
Лидия Игнатьевна, манньыйан олорон кэпсиирин истиэҕиҥ:
– 82 сааспар диэри наар мас дьиэттэн мас дьиэҕэ көһөн олорбут эмээхсиммин. Мас дьиэҕэ төрөөбүтүм, үйэбин мас дьиэҕэ моҥоон эрэбин. Таас дьиэҕэ “өҥнөөх-түүлээх” дьон олороллорун курдук ымсыыра саныырым. Онон, дьэ, үөйбэтэх-ахтыбатах өттүбүттэн “Кыым” хаһыакка тахсан хааламмын, дьон бөҕөтүн аймаатым быһыылаах. Хаһыат көмөтүнэн саҥа таас дьиэҕэ, ыра санаа оҥостубут бааннабар, дьэ суунуом диэн, үөрэн олоробун. Үйэм тухары улахан баҕа санаам “бааннаҕа суунан баран, өбүгэлэрим дойдутугар аттаннарбын” диэн этэ.
Маннык түргэнник дьиэлэниэм диэн өйгө-санааҕа суоҕа. Оҕонньорум аймаҕа Майа бөһүөлэгиттэн Ульяна Алексеевна Стручкова хаһыакка төлөпүөннээн, онно суруйбут ыстатыйаҕыт тойон-хотун болҕомтотугар киирэн, дьыала түргэнник быһаарыллыбытын билиҥҥэ диэри итэҕэйбэккэ олоробун. Хаһыат, чахчы, күүстээх эбитин итэҕэйдим уонна эрэдээксийэ кэлэктиибигэр улахан махталбын тиэрдэбин. Мантан инньэ эн сурутан биэрбит тапталлаах хаһыаппын кыбына сылдьан ааҕыам да ааҕыам. Саҥа дьыл остуоруйатын курдук дьоллоох түгэн – дьоһун бэлэх оҥоһуллубутуттан дьоллоннум, үөрдүм-көттүм.
Эрэдээксийэ толору миэбэлинэн хааччыйда
Лидия Игнатьевна санаатын таба таайан, кыбартыыратын “под ключ” миэбэлинэн толору хааччыйар бүччүм санаа кылам гынан, үлэлиир тэрилтэбэр – “Ситим-медиа” бөлөх (ген.дир. В.Н. Степанов) уонна “Кыым” хаһыат (эрэд. И.И. Гаврильев) эрэдээксийэтигэр уонна Ил Түмэн дьокутаата Мария Христофороваҕа эппиппин бары үөрүүнэн сөбүлэһэн, “Саҥа дьылы – саҥа дьиэҕэ” үтүө санаа бырайыакпыт баара-суоҕа икки нэдиэлэ эрэ иһинэн ыытыллан, дьиэни толору миэбэлинэн хааччыйан Лидия Игнатьевнаны 17-лээх устудьуон сиэнэ Славалыын сырдык, ыраас, сылааһынан сыдьаайар кыбартыыратыгар киллэрэн дьоһун бэлэх оҥордубут.
Кимнээх көмөлөстүлэр?
Сахабыт сиригэр үтүө санаалаах, дьон кыһалҕатыгар көмөлөһүөн баҕалаах дьон-сэргэ, тэрилтэлэр уонна биирдиилээн урбаанньыттар бааллара киһини үөрдэр, долгутар. Үтүө санаа бырайыакпытын өйөөн, наадалаах миэбэллэринэн хааччыйарга көмөлөспүт тэрилтэлэри, урбаанньыттары хайаан даҕаны ахтан, махтанан ааһар тоҕоостоох.
Ол курдук:
СӨ Үлэҕэ уонна социальнай cайдыыга министиэристибэтэ (миниистир Е.А. Волкова) – улахан тэлэбиисэр;
СӨ Идэлээх сойуустарын федерацията (сал. Н.Н. Дегтярев) – таҥас сууйар массыына;
Дьокуускай куорат социальнай харалтатын управлениета (сал. С.И. Матвеев) – бородуукта нобуора;
«Көмүлүөк» хампаанньа (сал. О.Г. Григорьева) – сахалыы иһит нобуора;
1-кы №-дээх поликлиника (кыл. быраас А.В. Эверстова) – остуол, олоппос кэмпилиэгэ;
Ил Түмэн дьокутаата П.В. Ксенофонтов – дьыбаан;
СӨ Суруналыыстарын сойууһун бэрэссэдээтэлэ Г.А. Бочкарева түннүк сабыыта, сыттык, бааннаҕа аналлаах тэриллэр;
ИП В.П. Лиханова – утуйар таҥас кэмпилиэгэ;
С.Н. Жиркова – “Горпечать” – лүүстүрэ (2 уст.);
«Аврора» мэдиссиинэ килииньикэтэ (сал. В.А. Охлопкова) – 3 сыттык, 2 суорҕан, 2 орон сабыыта.
Элбэх оҕолоох ийэ Л.К. Михайлова – Саҥа дьыллааҕы түннүк сабыыта.
ИП А.В. Боескорова - түннүк сабыыта.
Манна улаханнык махтанан, дьоһуннук өрө тутан бэлиэтиибин – “Верона” (сал. С.Е. Фролов) миэбэл солуонун уонна “МебельКомплект” хампаанньаны (дир. В.И. Яндреев). Солуон, хампаанньа үлэһит уолаттара бэрт кылгас кэм иһигэр сүрдээх үчүгэй хаачыстыбалаах, кырасыабай бэйэлээх миэбэллэри таҥан, туруора охсон биэрдилэр.
Эдэр урбаанньыт ыччат туора турбата
Маннык бырайыак олоххо киирэрэ чэпчэки буолбатаҕын бэйэм эппинэн-хааммынан биллим. Түмүктүүр биэтэккэ чугаһаан иһэн, “көрдөһөр да күттүөннээх, ааттаһар да ахсааннаах” дииллэринии, саамай наадалаах миэбэл тиийбэккэ, ууга-уокка түһэн ыллым. Бу кэмҥэ миигин сүрдээҕин уонна көрүөх бэтэрээ өттүгэр, аҕыйах чаас иһигэр, эдэр урбаанньыт кыргыттар: 23 саастаах Айна Попова уонна 27 саастаах Сандаара Чемезова үтүө санааларынан халадыынньык, стенка, орон, микроволновай оһох, иһит-хомуос көстүрүүлэ нобуора, баанна хоһугар аналлаах тэриэбэлэринэн, 10 тыһ. суумаҕа куулунан эт атыылаһан, маны таһынан уу харчынан, о.д.а. бытархай көмөнү оҥоро охсон, сүрдээҕин соһуттулар, долгуттулар. Аныгы үйэ эдэр ыччата түргэн быһаарыныыта, миэбэллэри көрүөх бэтэрээ өттүгэр аҕалтара охсубуттара өмүтүннэрдэ. Этэргэ, хайгыырга тыл тиийбэт... Маннык ыччаттар баалларыттан киһи үөрэр эрэ. Барахсаттарым, кырдьаҕас киһиэхэ оҥорбут үтүөҕүт бэйэҕитигэр уон оччонон үтүөнэн эргилиннин диэн алгыыбын.
* * *
Маннык уустук кэмҥэ түөн саҕа үтүө дьыаланы кыаммат, кырдьаҕас дьоммутугар оҥорон, кинилэр үтүө алгыстарыгар арыаллатан Саҥа дьылы көрсөбүт. Кэлэр сыл барыгытыгар дьолу-соргуну тосхойдун, үтүө санаа, үтүө дьыала үксээтин!
