Манна кэпсэнэр барыта кырдьык буолбатах. Сороҕун дьонтон истибитим, сороҕун онтон-мантан «сойбоппутум», ону, көрү-нары тарда таарыйа, бэйэм ааппыттан кэпсиибин.
Саарбах хоруоллар
Уол төрдүс кылааска үөрэнэр. Оскуолатыттан кэлэн баран, эр дьон буолан, аҕатыныын бэйэлэрэ туспа кэпсэтэллэр.
– Паапачыка, эн оскуолаҕа кылааскар хаһыс хоруол этигиний?
– Ээ, мин саамай күүстээхтэрэ буоллаҕым, бастакы хоруол этим!
– Оо, жуоскай чубаак эбиккин дии!
– Оттон эн хаһыс хоруолгунуй?
– Ээ... Оттон... ити мин буоллаҕына... Паашка уонна Ваася кэнниттэн үһүс хоруолбун!
– Оо, эн да син үчүгэй ыччат эбиккин! – аҕата үөрэр.
Сотору соҕус буолан баран, төрөппүт мунньаҕа буолар. Арай аҕата онно тиийэн билбитэ – үһүс хоруолун кылааһыгар үс эрэ уол баар буолан биэрэр!
Эбиитин уола, учуутала эппитинэн, биир даҕаны олоҥхо бухатыырын аатын билбэт үһү... Ону, чахчыта, аҕата даҕаны соччо-бачча ыйдаҥардыбат.
Күрүлгэн. – 2008. – 2-с №.
