Мунньах түгэннэриттэн
2019 сылга куорат суолун-ииһин өрөмүөннээһиҥҥэ уонна тупсарыыга 1,5 млрд. солк. көрүллүөҕэ. Бу үп быйылгы бүддьүөттэн икки бүк улахан уонна олохтоох дьаһалтаттан, өрөспүүбүлүкэттэн уонна федеральнай бүддьүөттэн тыырыллыаҕа. Бу туһунан мээр Сардана Авксентьева бэнидиэнньиккэ ыытыллыбыт оробуочай мунньахха эттэ.
Маны таһынан судаарыстыбаннай-чааһынай партнерствонан социальнай эбийиэктэри тутуу бырагырааматын иккис чааһын былаанын чочуйуу, хонтуруоллааһын үлэтэ түмүктэннэ. Салгыы бу бырагыраамаҕа олоҕуран Ил Дархан Айсен Николаев мунньах тэрийиэҕэ.
Интэриниэт ситимэ
Мунньах куорат олоҕун-дьаһаҕын хонтуруоллуур сулууспа исписэлиистэрин, куорат уокуруктарын уонна улахан тэрилэтэлэр салайааччыларын отчуоттарыттан саҕаланна.
Бу кэпсэтии бөҕү-саҕы ыраастааһыҥҥа, сыбаалкалары тиэйиигэ, көрүүтэ-истиитэ суох сылдьар ыттары хонтуруоллааһыҥҥа, тиэргэн таһын ыраастааһыҥҥа, о.д.а. үлэҕэ ананна.
Сардана Владимировна Авксентьева, Дьокуускай куорат баһылыга:
- Салайааччылар интэриниэт ситимигэр олохтоохтор тугу суруйалларыгар болҕомтону ууруоххутун наада. Тоҕо диэтэххэ, онно куорат дьоно-сэргэтэ эһиги хаачыстыбата суох толорбут үлэҕитин хаартыскаҕа түһэрэллэр, санааларын суруйаллар. Онон кыһалҕа баарын үрдүнэн, тустаах болҕомто кэмигэр ууруллубат буоллаҕына, мөлтөх үлэни көрдөрөр хаартыскалары планерка кэмигэр улахан экраҥҥа таһааран көрдөрөр буолуохпут.
Маны таһынан “Жилкомсервис” хампаанньаҕа уопсастыбаннай сирдэртэн бөҕү ыраастааһыҥҥа муниципальнай хантыраагы тутуспаттарын туһунан эттиллэр. Онуоха тэрилтэ салайааччыта Андрей Лебедев хас күн аайы бөҕү тиэйии үлэтэ кыайан ыытыллыбатын, ол иһин бөх мунньулларын иһитиннэрдэ. Маны таһынан чааһынай дьиэ олохтоохторо бөҕү хомуйууга туһуланар ыйдааҕы төлөбүрдэрин кэмигэр төлөспөттөрө үлэ хаамыытын атахтыырын туһунан эттэ.
Манна эбэн эттэххэ, тиэргэн таһын хомуйар үлэһиттэргэ аналлаах этии-тыыны эмиэ иһилиннэ. Кинилэр Дьокуускай куорат быраабатыгар сыһыарылла сылдьаллар, ол аата хас биирдии уокуруктарынан. Ол курдук, баһылыгы бастакы солбуйааччы Владимир Федоров этэринэн, уокуруктар отчуоттарыгар ыйар сыыппараларыгар, тиэргэн таһын хомуйар үлэһиттэр ахсааннара отой тиийбэт эбит. Онон күн бүгүн хас киһи чахчы үлэлиирин ыйыахха наада диэн эттэ.
Маны таһынан сотору кэминэн, эспэримиэн быһыытынан, куорат биир түөлбэтин тротуарыгар (дьон хаамар сиригэр) анал билииккэ ууруллуоҕа. Бу билииккэ халтараан кэмигэр дьоҥҥо-сэргэҕэ абыраллаах буолуохтаах диэн сабаҕалыыллар.
Өссө ыраастаныыга киирдэххэ, сыбаалкалары түбэһиэх сиргэ үөскэтэллэрин утаран, Сардана Владимировна, куорат дьокутааттарын өйөбүллэринэн, Ил Түмэн мунньаҕар тиийэ туруорсан, ыстараапка саҥа сокуону киллэриигэ туруорсар санаалаах.
Хочуолунай дьыссаакка буортута
АУо “Теплоэнергия” тэрилтэ дириэктэрэ Максим Трофимов «Пионерскай уулуссаҕа баар саҥа дьыссаат дьылҕатын быһаара тарт» диэн кытаанах сорудаҕы куорат мээриттэн ылла. Ол курдук, саҥа дьыссааттан чуп-чугас хочуолунай баар буолан, оҕо тэрилтэтэ лиссиэнсийэ ылыыга улахан кыһалҕаны көрсүбүт.
“Лже-кафелары” хонтуруоллуурга
Аһыы утаҕы атыылыыр болдьоҕу (чааһы) тутуспаттар, ол иһин маны хонтуруоллааһын күүһүрүөхтээх. Бу туһунан баһылык кыттыылаах мунньах буолла. Тэрээһиҥҥэ арыгыны эргинэр урбаанньыттар, уопсастыбаннай тэрилтэ бэрэстэбиитэллэрэ, лиссиэнсийэни биэрэр уорган исписэлиистэрэ кытыннылар.
“Кыһалҕа, чахчы, баар. Ону туоратыыга күүстээх быһаарыыны бары бииргэ ылыныахтаахпыт”, - диэн мээр эттэ.
