Киир

Киир

Заполярная диэн туруупкаттан олунньу 25 күнүгэр булуллубут, 62,60 карат маассалаах Алмааска АЛРОСА Социалистическай үлэ Дьоруойа Екатерина Новгородова аатын иҥэрдэ.

Екатерина Иннокентьевна Новгородова Мэҥэ-Хаҥалас оройуонун Ленин аатынан колхуоһугар агроном-овощеводунан үлэлээбитэ. Кини 1929 сыллаахха Чурапчы оройуонун Кытаанах нэһилиэгэр күн сирин көрбүтэ. Дьокуускайдааҕы салайар каадыр тыа хаһаайыстыбатын оскуолатын бүтэрбитэ. 1957 сыллаахтан Ленин аатынан Мэҥэ-Хаҥаластааҕы колхуоска младшай агрономунан үлэлээн саҕалаабыта. Кини биэнсийэҕэ тахсыар диэри, 30-н тахса сыл колхуоска уонна сопхуоска оҕуруот аһын биригээдэтин салайааччытынан үлэлээбитэ.  

Ленин аатынан сопхуос өрөспүүбүлүкэҕэ аан маҥнайгынан парниктары электричество көмөтүнэн сылытар буолбута, маны таһынан, оҕуруот аһын үүннэриитигэр саҥа технологиялары туттубута.  Новгородова биригээдэтэ сылтан сыл үлэтигэр үрдүк ситиһиилэрдэнэн испитэ.

Екатерина Иннокентьевна Новгородова оҕуруот аһын үүннэриигэ уһулуччулаах ситиһиилэрин иһин, Үлэ Кыһыл Знамятынан, Ленин, Өктөөп өрөбөлүүссүйэтин уордьаннарынан уонна «Серп и молото» кыһыл көмүс мэтээлинэн наҕараадаламмыта. Кини - ССРС VIII-XI ыҥырыытын дьокутаата, Саха Өрөспүүбүлүкэтин бочуотунай олохтооҕо.

Социалистическай Үлэ дьоруойун аата 1973 сыллаахха иҥэриллибитэ.

Тарҕат:

Санааҕын суруй

Бүтэһик сонуннар